Dhithu Oonihiwe Juwawu Murohani

Mudhidhi murumiwi Juwawu agaali mukambura eliga yoPatimu, Yesu ahimooniha dhoroha dhowakwana 16 dhatonyihedha dhithu dhaapadduwe osogolo. Mu dhoroha ndha Yesu aahimoniha Juwawu makalelo ndina na Yehova naatxenihiwiwa, makalelo waadhe Omwene waye ni makalelo efunelo ya Mulugu yakwaneliwa veelaboni yavati ni odhulu.

Yoroha yobajha, Juwawu woona mpaddo woomwene wa Yehova odhulu. Vampaddoniva, vikumaga ojerima ni dari. Teto Juwawu wawoona anamaholela 24 egaapele mpaddoya, egawanre dhowara dhotxena ni egawanre kara dha oru. Anamaholela ale 24 egakokore emwebedhaga Yehova. Yoroha emodha ya Juwawu, oliye woona muthithi waathu a veelaboni yavati emwebedhaga Yehova. Vano mwana Nimbila ali Yesu Kiristu onowathukulela athu aatene yaala vatxelani nnavaha manjhe eegumi. Yoroha emodhaya, onomoona Yesu abajhaga othonga ni anamaholela ale 24. Yoroha yoharela, Juwawu onomoona Yesu awanaga ni nowa enlubale vamodha ni ademoniyu aaye. Nowa eyo enlubale di Saddana. Yesu wigara nowa ele ni ademoniyu aaye odhulu odha okalaga veelaboni yavati.

Nuwindo Juwawu onowoona yoroha yoriya. Oliye onomoona mwana Nimbila agimenle omwangoni Siyawu naathu owakwana 144 000. Ohiya eyo, Juwawu onomoona mungero avavaga waapela elabo yaatene yavati. Mungero oyo onowawaddela athu wihina emwebedhege Mulugu ni emuthithimihege.

Yoroha yaye emodha, Juwawu onowoona koddo ya Armajedo. Va koddo ela Yesu ni anyakoddo aye enoowana ni saddana ni enomugonjhiha. Yoroha yogomihedha, Juwawu onowoona murenddele ni wiwanana odhulu ni elabo yavati. Saddana vamodha ni athu aatene enakosa epaddi yaye enotolosiwa. Omakuthulowa, athu aatene oodhulu ni avelaboni yavati enooriha ndina na Yehova ni enomwebedha oliye baahi.