“Elabo Enere Okala Parayizu”

Yehova ohupaganya wi: ‘Wukuwa, widdela, oredda ni okwa kadhinaakalewo. Miyo ginere ovuda mitori dhaathu aatene teto kaawo muthu anubuwelege dhithu dhabure.’

Yehova afuna wihina Adawu ni Eva ekalegewo nuuhagalala vamodha ni murenddele mujardi oEdeni. Aliwa yerege omwebedha Mulugu ni waabala ahima wihina edhaale mwilaboni yavati. Adawu ni Eva okoodda omwiwelela Yehova, mbwenye naarive dhigaali ndo, Yehova anafuna wihina elaboya ekale parayizu. Mudhidhi nihudheraga livuru nna, nihoona wihina Mulugu onowakwanihedha dhaatedhene anapaganyiye. Teto Omwene waye onere odhana dhithu dhaatedhene dhapama Yehova ampaganyiye Abarawu.

Moohilegela, Saddana ni ademoniyu aaye, ni athu aatene abure enere otolosiwa. Odhulu watewene ni velaboni yavati anebedhiwege di Yehova baahi. Kanaakalewo muthu anaabulelege newene okwa. Malabo aamatene nnavenyege oohagalalene ni egumi yapama. Elabo enaakale parayizu! Athu aatene enere okanna dhoojha dhapama, nyumba dhoriya ni enagonege mburo woobareleya, ehoovaga ethu-siithu. Kanaakalewo muthu abure newene anamwerelege ethu yabure mukwaye. Anenyama kinanovege, teto iyo kannawovege.

Onowubuwela makalelo enakaliwa yapama Yehova abajha wavenyiha athu? Nnere waanona athu yaliwo mudhidhi wakale, ninga Abeli, Nowe, Abarawu, Sara, Moyizeji, Ruti Davidi ni Estere. Aliwa enere onikavihera osaddula elabo wi ekale parayizu. Nnerege wapara mabasa oohagalasa!

Yehova anafuna wihina niweya okale mparayizu. Mwebaribarene onere ohudhera dhithu dhowinjhiva wodhela Mulugu. Bumwahaya odhowegeve ogaali mukwaye Yehova. Werana ndo onere okala mukwaye nimukalakala!