We podi wandana ni Yehova

We ohandana ni muthu ohumunonniwe? Akala oni hee, emodhave ni Yehova. Oliye anofuna wandana ni we. Bumwahaya, agafuna wihina onone dhikalelo dhaye. Anofuna onone makalelo aneriyena dhithu, ni onone wi onofuna wuvaha osogolo wohagalasa. Yehova anajheha wihina wahudheraga wodhela oliye muthabwege wandana, mbwenye kabiha wubuwela. Dhinowandeya wandana ni Mulugu? (Omwileri Salmos 25:14.) Enahoweleya ddi wihina wandane ni Mulugu? Bibliya anowaakula nikoho nna. Teto anoowoga wihina wandana ni Yehova ethu yunlubale onahoweliwe okanna.

1. Yehova anuwithanela ddi?

Bibliya anowoga egi: ‘Mmwaddamele Mulugu oliye anere wuwaddamelani.’ (Tiago 4:8) Eyo enatapulela ddi? Yehova anuwithana wihina okale mukwaye. Amodha podi wubuwela yegi: ‘Enandeya avi miyo wandana ni Mulugu wula gahimonaga?’ Bibliya oni Yehova anowoga dhithu dhinahoweleya wi muthu andane nuliye. Mwamakalelo yala, iyo nnowanda wandana nuliye. Namwilerigi Bibliya, wandana wehu ni Yehova onothabwa oliba, naarive nihandaga omoona.

2. Mwahaya bwaddi Yehova muthu apama owandaneyana?

Kavo anathabwa wudhivela ompitha Yehova. Oliye anafuna ofwanye ohagalala teto osayele nikavihero wahowelaga. We podi ‘onvokedha mutholo dhawo dhatedhene, mwaha oliye onowusamalela.’ (1 Pedro 5:7) Yehova anoofuna wakavihera, walibiha ni wavuruwana akwaye. — Omwileri Salmos 94:18, 19.

3. Yehova anajheha wihina akwaye yeregena ddi?

Yehova onowadhivela athu atene, mbwenye ‘anathabwa wandana naale eli oororomeleya,’ obe, ni athu apama. (Provérbios 3:32) Yehova anajheha wihina akwaye yilibiherege wihina yeregena ele eli yapama vamentoni vaye teto ehiye werana eli yabure. Amodha enowubuwela yegi: ‘Kaginande werana dhatedhene anajheha Mulugu.’ Yehova anowonelamo. Mbwenye atene enamudhivela teto enilibihera wihina emuhagalase enowandana ni Mulugu. — Salmos 147:11; Atos 10:34, 35.

OHUDHERE DHITHU DHIMODHA

4. Abaraawu ahandana ni Mulugu

Bibliya anawogiye wodhela Abaraawu (ithaniwa Abarawu) enonikavihera onona ethu enatapulela wandana ni Mulugu. Wileri wodhela Abaraawu va Génesis 12:1-4. Mwamala muthapanyedhe makoho enaharela:

• Yehova aamulombe ddi Abaraawu?

• Yehova ampaganye ddi Abaraawu?

• Abaraawu erilena ddi?

5. Dhithu Yehova anajhehiye wa akwaye

Ebaribari wihina iyo nnojheha wihina akwihu yeregena dhithu dhinandhivela.

• Dhithu baani onafuniye wihina akwawo yeregena?

Omwileri 1 João 5:3, mwamala muthapanyedhe nikoho nnaharela:

• Yehova anajheha ddi wa akwaye?

Negi nimwiwelelege Yehova, malabo mamodha enohowela osaddula dhowera dhehu ni dhikalelo dhehu. Omwileri Isaías 48:17, 18, mwamala muthapanyedhe nikoho nnaharela:

• Mwahaya bwaddi Yehova anajheha wi akwaye esaddule egumi yewa?

6. Dhithu Yehova anawereliye akwaye

VIDIYU: Yehova ohugerela dhithu dhowinjhiva (3:20)

• Muhiyana onihiwe nvidiyuni ahikanna yubuwelo dhabure. Yehova amukavihere avi?

Omwileri Isaías 41:10, 13, mwamala muthapanyedhe nikoho nnaharela:

• Yehova anaapaganya ddi akwaye?

• Ononamo wi wandana ni Yehova podi okala ethu yapama?

7. Wihina nandane ni Yehova, nnohowela owoga nuliye ni ovuruwana ele anawogiye

Athu abili yathapanyaga, wandana wewa onooliba. Omwileri Salmos 86:6, 11, mwamala muthapanyedhe makoho enaharela:

• Nnande avi othapanya ni Yehova?

• Yehova anathapanya avi ni iyo?

OVIRISEDHA

Yehova anoofuna wandana ni we, teto anere wukavihera wandana ni oliye.

Ogwaddela

• Yehova anakavihera avi akwaye?

• Mwahaya bwaddi Yehova agaloba akwaye wihina esaddule egumi yewa?

• Ononamo wi enoorusa wandana ni Yehova? Mwaha waddi?

WEGI ONONE DHITHU DHIMODHA

Wandana ni Yehova winasaddule avi egumi yawo?

“Yehova, Mulugu onafwaneleliwe omunona” (A sentinela, 15 a Fevereiro a 2003)

Wone makalelo onandiwe wandana ni Mulugu.

“Ginandane aavi ni Mulugu?” (Os Jovens Perguntam — Respostas Práticas, Volume 2, Musolo 35)

Osugwe makalelo wandana muhiyana dhala anniyena ni Yehova ovulusiwa egumi yaye.

“Miyo kagafuna okwa!” (A Sentinela, n.º 1 a 2017)

Va yokoha ela, azombwe enowoga makalelo enamoniwa Yehova.

Wandana ni Mulugu enatapulela ddi? (1:46)