OHUDHERA 42
‘Ohagalala baale eneedda dila yapama’ ya Yehova
‘Ohagalala baale eneedda dila yapama, ni enawiwelela malamulo a Yehova.’—SAL. 119:1.
JHIBO 124 Nikale oororomeleya
DHITHU NNAAHUDHERIHUa
Addibila ni arogollihu ooliba murima, evolosihiwe mukambura mwaha wa nroromelo neewa ni ohikosa epaddi ya elabo (Osugwe ddima 1-2)
1-2. (a) Anamathonga enawerana ddi anamoona a Yehova, ki addibila enakala avi? (b) Enandeya addi okala oororomeleya naarive niharahariwaga? (Osugwe fotu ya vakapani.)
MUDHIDHI yoola nnakalihu mabasihu olaleya enna okoddihiwa dhilabo dhowakwana 40. Muwari mwa dhilabo dhendha addibilihu ehivokedhiwa mukambura. Aliwa etheegile ddi? Vamentoni va Yehova, aliwa kitheegile. Dhithu yeriliwana, fuwileri, omuhudhera bibiliya, walaleya athu ni odhowa omutugumanoni. Teto aliwa kinakosa epaddi ya elabo. Naarive eharahariwaga adharala oororomeleya aMulugu enoodidelave okala ororomeleyab — yonihaga wi kinapwatha ethu baani enaapadduwe enere odidela okala ororomeleya wa Yehova. Mohanganyedha eyo enowahagalasa vanlubale!
2 Podi wera onosugwaga fotu dhaaddibila ala ooliba murima, ni enaharahariwa mbwenye uhona wihina aliwaya eli ohagalalene. Aliwa enohagalala mwaha ehinona wi Yehova onohagalala mwaha wa oororomeleya wewa. (1 Cró. 29:17a) Yesu ohuwoga egi: ‘Ohagalala baale enaharahariwa mwaha wa opama . . . Muhagalale muthabe nuuhagalala, mwaha mareeliho enyu oodhulu ehinjhiva.’ — Mat. 5:10-12.
YOTAJHIHA ENANIKAVIHERE
Peduru ni Juwawu ehihiya yotajhiha yapama wihina makiristawu a peeno eharege wa ale enadhowa otiribunale wihina yabarele nroromelo newa (Osugwe ddima 3-4)
3. Mowiwana ni Atos 4:19, 20, arumiwi yerile ddi mwaha oharahariwa, ki mwahaya bwaddi edhe yerege ndo?
3 Enapadduwa naaddibilihu vamodha ni arogolihu sihemodhave yapaduwele arumiwi yaharahariwe mwaha olaleya wodhela Yesu Kiristu. Dila dhowinjhivadhene anamathonga ‘yahakoddiha arumiwi wihina yahiwoge ethu-sithu newene olaleya wodhela ndina na Yesu Kiristu.’ (At. 4:18; 5:27, 28, 40) Ki arumiwi yerile ddi? (Omwileri Atos 4:19, 20.) Aliwa yahinona wihina muthu akopolo wakwaranya anamathonga ale ‘darumile wihina yahiselele olaleya’ wodhela Yesu Kiristu. (At. 10:42) Yawogaga mandina a arumiwi aatene, Peduru ni Juwawu nuuliba murima aliwa owoga yegi ‘yere omwiwelela Mulugu ohiya wawiwelela anamathonga ale ni wawaddela wi kiyaselele owoga wodhela Yesu. Yakala ninga aliwa yere owoga ni anamathonga ale yegi, ‘nyu munoxixa owoga wihina malamulo enyu bathima okwaranya aMulugu?’
4. Mowiwanana ni Atos 5:27-29, yotajhiha baani arumiwi ehiliwa wihina niharege?
4 Arumiwi ehihiya yotajhiha yapama wihina makiristawu aatene eharege. ‘Womwiwelela Mulugu ninga namathonga ohiya athu.’ (Omwileri Atos 5:27-29.) Ebaribari wi mwaha aliwa okala oororomeleya yahonihiwa goyi. Mbwenye nuukumihiwa mukambura, ‘aliwa yahihagalala vanlubale mwaha yahithithimihiwa naarive eganyemuliwe wodhela ndina na Yesu,’ nuwindo aliwa ohogolowela olaleya! — At. 5:40-42.
5. Makoho baani nnawakulihu?
5 Makalelo arumiwi yeriliwana dhithudha podi onaganyihedhaga. Motajhiha arumiwi yandile addi omwiwelela Mulugu ninga namathonga ohiya athu, ‘wula yawiwelelaga anamathonga amwilaboni?’ (Rom. 13:1) Nnande addi ‘wawiwelela anamathonga,’ ninga murumiwi Pawulo awogiliye, ni okala oororomeleya ni onamathonga wa Yehova?— Titus 3:1.
‘ANAMATHONGA ELABO’
6. (a) Ninga anawogela Romanos 13:1 ‘anamathonga amwilaboni’ enagiwana ani, Ki ethu baani nnahowelihu wavaha? (b) Owedha baani enna anamathonga aatene amwilaboni?
6 Omwileri Romanos 13:1. Va yolebela ela madhu owi ‘anamathonga elabo’ enagiwana athu enna kopolo yowathonga athu amodha. Makiristawu enohowela wawiwelela anamathonga ala, mwaha baliwa enanivaha malamulo enahoweleya mwilaboni teto malabo mamodha enobarela nlogo na Mulugu. (Apo. 12:16) Bumwahaya iyo nnohowela oliva musoko ni waariha ninga aliwa enafuneliwa. (Rom. 13:7) Naari dhigarive ndo anamathonga amwilaboni enathongela mwaha yenyiwe ni Yehova. Yesu uhoniha eyo mudhidhi akohiwaga ni anamathonga munlubale oRoma ithaniwa Pilatu. Pilatu nuwoga wihina ahikanna owedha yomwakihedha obe wowenya wihina Yesu apiwe. Yesu owoga egi: ‘Kamwakanne ewedhelo wa miyo mwahere mwahivahiwa ewedhelo enadhela odhulu.’ (João 19:11) Ninga Pilatu owedha wanamathonga aatene amwilaboni ohukanna manddile.
7. Mudhidhi baani nahinahowelihu wawiwelela anamathonga, ki ethu baani anamathonga amwilaboni yahinahoweliwa oddiwala?
7 Makiristawu enohowela wawiwelela malamulo anamathonga mbwenye eniwanana ni malamulo a Yehova. Teto iyo kannahowela wawiwelela anamathonga mwaha oniwaddihedha werana nde Yehova aniddiye, obe werana nde Yehova ananilobiye. Motajhiha, anamathonga podi oniwaddihedhaga iyo ovolowa mukoddoni, teto podi onikoddihaga Bibiliyihu, malivuru ehu, mabasa olaleya ni woona mutugumano.c Anamathonga yahitamalelaga owedha evahiwiwa ni Mulugu wothonga, mbwenye yaharaharaga makiristawu, aliwa enere wakulela vamentoni va Mulugu. Yehova anna osugwera dhatedhene! — Ecl. 5:8.
8. Ohiyana baani oliwo ni madhu ala owi ‘owedha’ ni ‘owedha watewene’ ki mwahaya bwaddi eyo ekala yathima?
8 Madhu owi ‘namathonga’ enatapulela “muthu ananda werana pama dhithudha, athima ni akopolo”. Mwebaribarene ela yotapulela ya madhu ala “muthu aana owedha watewene okwaranya ethu-sithu”. Naarive athu amwilaboni yithaniwaga athu enna owedha. Ohukalawo muthu anna ‘owedha watewene’ wapitha aliwa. Mbibiliyani Yehova onowithaniwa dila nayi ninga muthu anna owedha watewene. — Dan. 7:18, 22, 25, 27.
OWEDHA WATEWENE
9. Namavuhulela Daniyeli onne ddi?
9 Namavuhulela Daniyeli ahikanna dhowoona dhohiyana iyana, dhanvahile ebaribari wi onamathonga wa Yehova kawinna manddile ni bohiyana ni onamathonga watewene. Vobajha, namavuhulela Daniyeli ahawona anenyama annayi owopiha, yatonyihedha potensiya Mundiyale dha kale ninga — Babiloniya, Medo-Persiya, Gresiya ni Roma, teto malabo yaala nnakalihu Potensiya Mundiyale Angulu-Amerikana. (Dan. 7:1-3, 17) Vano Daniyeli, omoona Yehova agakiratile vampaddoni vaye va Omwene otiribunale odhulu. (Dan. 7:9, 10) Nuwindo dhithu onne namavuhulela Daniyeli, Mwebaribarene muthenga anamathonga enahoweliwa onona peeno.
10. Mowiwana ni Daniel 7:13, 14, 27, Yehova aanavahe ani onamathonga wa elabo yaatene, ki eyo enoniha ddi wodhela Yehova?
10 Omwileri Daniel 7:13, 14, 27. Yehova anere wawaka anamathonga owedha watewene enniwana ni anere wavaha ale enafwanelela ni enna kopolo. Anagiwana ani? Owedha wula anavahiwa ‘duule analigana ni mwana muthu’ Yesu Kiristu, ni ‘ale eli oweela,’ a 144 000 enathonge ‘ni mukalakala.’ (Dan. 7:18) Eyo enowoniha wihina Yehova ‘dinna owedha watewene,’mwaha oliye baahi dinna owedha wowerana dhithu ni makalelo yala.
11. Daniyeli alebile ddi enoniha wihina Yehova dinna owedha watewene?
11 Dhithu ndha onne Daniyeli dhinowoniha ele awogiliye. Oliye owoga egi: ‘Yehova Mulugu odhulu onowagweliha mamwene ni onowakitiha mamwene.’ Oliye wenjhedhedhave egi: ‘Mulugu odhulu-dhulu dili namathonga aathu aatene, teto oliye ononvaha ole anafuniyena.’ (Dan. 2:19-21; 4:17) Mbwenye Yehova onomukitihaga mwene vano omuthikithela mwene mmodha? Hee!
Yehova omwaaka Omwene Beltesazar, wavaha akudda Medu ni Persiya (Osugwe ddima 12)
12. Owoge yotajhiha ya makalelo Yehova akitihiliye mamwene kale?
12 Yehova uhoniha wihina dinna ‘owedha watewene’ wapitha anamathonga amodha. Kabeni none dhotajhiha tharu. Farawo ahitabusa vanlubale nlogo na Yehova Wijipitu, dila dhowinjhivadhene ahikoddiha wihina edhowege. Mbwenye Yehova ahivulusa nlogo naaye ni ahimutolosa Farawo mu niya yoofila. (Êxo. 14:26-28; Sal. 136:15) Mwene oBabiloniya Belsazar, ahawerana mathanga ni ‘withithimiha mwinya ni ampokihaga nabwiya odhulu.’ Ni ‘wathithimiha amulugu a Parata ni a oru’ ohiya omuthithimiha Yehova. (Dan. 5:22, 23) Mbwenye Yehova ahimutotela manyazo mwene ola owithukula, emahiyu yele Belsazar opiwa ni omwene waye ovahiwa akudda Medo ni Persiya. (Dan. 5:28, 30, 31) Mwene Herodi Agripa obajha akala Opalastina ahimpa murumiwi Tiyago ni omvokedha mukambura murumiwi Peduru. Teto oliye ofuna ompa murumiwi peduru mbwenye Yehova kenyile wihina eyo epadduwe. ‘Mungero a Yehova omporesa mwene Herodi ofiyedha okwa.’ — At. 12:1-5, 21-23.
13. Owoge yotajhiha enoniha makalelo Yehova agonjhihiliye mamwene ni mamwene.
13 Yehova uhoniha wihina dinna owedha watewene ni dhowera dhanamathonga. Oliye ohuwaniha koddo akaviheraga aamwaana Ezarayeli ofiyedha wagonjhiha mamwene 31 akananewu wihina yande othukula epaddi yapama ya elabo yothomeliwa. (Jos. 11:4-6, 20; 12:1, 7, 24) Teto Yehova ahimutotela manyazo mwene Behadadi wodhela omugonjhiha ni mamwene 32 akudda Siriyu yawana naamwaana Ezarayeli. — 1 Reis 20:1, 26-29.
14-15. (a) Ethu baani mwene Nabukodonozori ni Dariyu ewogiliwa wodhela owedha watewene anna Yehova? (b) Salmista awogile ddi wodhela Yehova ni nlogo naaye?
14 Yehova uhoniha dila dhowinjhivadhene wihina dinna owedha watewene! Mudhidhi mwene oBabiloniya abajhiliye withukula Ofiyedha wiwoonaga ninga dakopolo ni dafwanelela othithimihiwa ohiya wonelamo wihina Yehova dafwanelela webedhiwa. Yehova omweriha wihina oliye akale taduwa, vano nuuvulumuwa oliye omuthithimiha Yehova ni wonelamo wihina ‘Omwene wa Yehova bwamukalakala.’ Ofiyedha oliye owoga egi: ‘Kaavo muthu di muthu anaande omugonjhiha.’ (Dan. 4:30, 33-35) Vano oororomeleya wa Daniyeli nuwehiwa, Yehova nuumobula munikolani mwa poddogoma mwene Dariyu owoga egi: ‘Athu aatene emove Mulugu a Daniyeli. Mwaha oliye Mulugu amukalakala. Omwene waye kunna omagomo ni othonga waye bwamukalakala.’ — Dan. 6:7-10, 19-22, 26, 27.
15 Salmista ohufiyedha owoga egi: ‘Yehova onovudha dhothoma dhamalogo; ni onononga dhe enubuweliwa.’ Ni wejhedhedhave egi: ‘Oohagalala baathu Mulugu ewa ali Yehova, athu esakuliwe nuliye wihina ekale nlogo naaye.’ (Sal. 33:10, 12) Mwebaribarene, ela si ethu emodha enanthukulele akala oororomeleya wa Yehova!
KODDO YOGOMIHEDHA
Nikuru nnavolowele nlogo na Mulugu wihina egujhule, newene Kinakale ethu naliganiha na Yehova! (Osugwe ddima 16-17)
16. Niroromele wihina Yehova anere ddi ‘ohoseya winlubale’ wafiya, ki mwahaya bwaddi?
16 Iyo nihoona dhithu Yehova eriliyena kale. Vano, ki osogolo ethu baani nnajhehihu wihina Yehova erena? Kannanganyedha wihina yehova anere ovulusa nlogo naaye mudhidhi wa ‘ohoseya winlubale’ onaddamela. (Mat. 24:21; Dan. 12:1) Oliye anere werana eyo nnikuru mBibiliyani nnoniwe ninga Gog a Magog, avolowela nlogo na Yehova eli elabo yaatene wihina aagujhule. Naarive nikuru nna egali owinjhiva owakwana 193 amakuru amatene a Nações Unidu, aliwa kinakale ethu, naliganiha ni ole anna owedha watewene nnikuru naaye noweela! Yehova ohupaganya egi: ‘Mwebaribarene ginere wiwunnuwiha ni ginere witxeniha, malogo amatene eli elabo yavati enere oginona; teto enere onona wi miyo gili Yehova.’ — Eze. 38:14-16, 23; Sal. 46:10.
17. Ninga anawogela Bibiliya ethu baani enapadduwele mamwene a velaboni yavati ni ale eli oororomeleya wa Yehova?
17 Koddo anatote Gog enere wathukulela Warmajedon, Yehova anaagujhuliye ‘amwene aatene elabo yavati.’ (Apo. 16:14, 16; 19:19- 21) Mbwenye, ‘athu apama ni oororomeleya enerege okala mwilaboni yavati.’ —Pro. 2:21.
NNOHOWELA OKALA OROROMELEYA
18. Ethu baani makiristawu ebaribari yathomiliwa wera? (Daniel 3:28)
18 Muwari mwa yakadhene, makiristawu ebaribari yaheka egumiwa vangovini mwaha odhivela wewa winlubale yanniwana ni Yehova ali namathonga anna owedha watewene. Aliwa yaali oororomeleya ninga eeberewu araru yavokedhiwe mfornuni ya mootho, mbwenye yavulusiwe mwaha okala oororomeleya wa Yehova. — Omwileri Daniel 3:28.
19. Nimakalelo baani Yehova anaatorihiye nlogo naaye, ki iyo nere ddi ovanene?
19 Davidi ohuleba thima enna oororomeleya yehu ni Mulugu naarive epadduwaga ethu-sithu, nakala oororomeleya nnere owoga ninga salmista asorihile egi: ‘Mwinyene Yehova anere watoriha malogo. Ó Yehova gitoriheni wodhela dhithu dhapama ginerimina ni wodhela okala oororomeleya.’ (Sal. 7:8) Vasogolova Davidi ahileba egi: ‘Dhowera dhaaga ni ororomeleya waaga wigikoye, mwaha ejhehedho yaaga eli mmadani mwenyu.’ (Sal. 25:21) Makalelo apama okalawo fumororomelela Yehova, naarive epadduwaga ethu-sithu! Nerana ndo nnere woona ele salmista oniliwe, oliye oleba egi: ‘Ohagalala baale eneedda dila yapama, ni enawiwelela malamulo a Yehova.’— Sal. 119:1.
JHIBO 122 Nikale owikomeene!
a Bibiliya onowoga egi makiristawu enohowela wawiwelela anamathonga — obe anamathonga a elabo ela. Mbwenye anamathonga amodha enompokiha Yehova ni aadharaye. Ni makalelo baani nnandihu wawiwelela anamathonga wula nikalagave ororomeleya wa Yehova?
b OSUGWE WONELAMO PAMA: Okala oororomeleya wa Yehova enatapulela, wihina kannadha ohiya omuroromela Yehova ni wiwelela onamathonga waye naarive nnororomelo nehu nehiwaga.
c Osugwe muwari mwa revista nna epaddi “Amwaana Ezarayeli yowanihesa koddo — Ki iyo mwahaya bwaddi nahiwanaga?”