Gihudhera dhithu dhowinjhiva ni gihawakela mareeliho owinjhiva mwaha omulabela Yehova

Muwari mwa koddo yanabiili yapele elabo yaatene, makolo aaga okuma wEstoniya ni otamela Walemanya, wibaliwimi. Miyo nuubaliwa, aliwa otamela oKanada. Iyo odhowa waddamela oOtawa, elabo yo Kanada. Nakalesa nyumba yafuwiwa anaku, epaddi emodha wapitariwe ni tinta yotxena. Iyo nahithabwa ohawa, mbwenye yapama mudhidhi wa matabixu mazayi kiyahalelavo.

Nlabo dhaala anamoona a Yehova wawilerela amama yolebela ya Apocalipse 21:3, 4. Yolebela ele yahadahinya murima amama ofiyedha wunla. Thanga yeebaribari yahunnuwa mmurimani mwa makolo aaga mowaguva ofiyedha obaddiziwa.

Makolo aaga kiyawoga pama engeleji, Naarive dhigali ndo, aliwa yovaha thima ebaribari. Masabadu amatene yogihisesa miyo ni murogolaga Sylvia, yadhowaga mmalaleyelo naarive agavirile emahiyu yaatene elabaga ofabirika ya mugogo oSudibury, elabo yOntariyo. Sumana dhatedhene emudhihu yomuhudhera Namasugwera. Miyo gihudhere omudhivela Yehova ni makolo aaga. Bumwahaya miyo wipeleka wa Yehova yaka ya 1956, nganna yaka 10. Odhivela woliba yanna makolo aaga ni Yehova sinagithukulela odhowagave gimulabelaga Yehova.

Ngamanle ohudhera oskola, miyo obajha othuwathuwela dhithu dhimodhadhene. Miyo gubuwela wi gakala piyonero, kagande okanna korowa yapamene wihina gande weedda olenddo gafunimi ni aviyawu wihina ginone elabo yaatene. Vano miyo wambela olaba oradiyoni girumihaga jhibo. Godhiveliwa wapara mabasa ale. Mbwenye gohowela olaba ni mahiyu, mwaha wa yeyo malabo owinjhiva goyelela mutugumano ni gahambela wandana ni athu yahamulabela Yehova. Nuuvira mudhidhi, mwaha wa ndhe gihudherimi mBibiliyani miyo wambela wawerana masadduwo mwigumini mwaga.

Vano miyo otamela oOxawa, luwani emodha enakala elabo yOntariyo. Fuwengo gimunonilimi Ray Norman, murogolaye Lesli ni apiyonero amodha. Aliwa yahigisamalela pamadhene. Wawoona aliwa ohagalalene wahigithukulela wubuwela dhithu gafunimi mwigumini mwaaga. Aliwa Ogikavihera okanna efunelo yokala piyonero, vano yaka ya 1966 mweri wa Setembro miyo okala piyonero. Miyo gaali ahagalaleene gijhagavo egumaaga. Mbwenye miyo kagubuwela wi yeere opadduwa masadduwo mwigumini mwaga.

YEHOVA UULOBA WEERANA ETHU, ORUMEDHE

Mudhidhi gihudhere oskola, gahileba petisawu wihina galabe Beteli yoKanada. Vasogolova, ngali piyonero miyo withaniwa wihina galabe muwari mwa yaka nayi oBeteli. Mbwenye miyo gomudhivelesa vanlubale Lesli ni gowoova ohanda othapanya ni oliye garumedha odhowa oBeteli. Mbwenye naarive dhigaali ndo, nuulobela dila dhowinjhivadhene miyo orumedha odhowa Beteli. Naarive ngali owukuwene, miyo ompaganya Lesli.

Obeteli miyo galaba olavandariya, nuuvira mudhidhi miyo okala sekeretariyu. Mudhidhi yole, Lesli okala Piyonera a vayeka oGatineyawu elabo ya Kebeki. Miyo gothabwesa omubuwela Lesli ni gowikohesa akala gaherana yothoma yapama. Mbwenye yahipadduwa ethu gahajhehedhimi. Ray ddibile Lesli, withaneliwa oBeteli vano iyo okalaga kwartu emodhave. Mwaha wa yeyo, gowanda othapanya ni Lesli. Vano iyo otelana labo mabasa aaga oBeteli yamanliwa, 27 a Fevereiro yaka ya 1971.

Miyo ni Lesli othomeliwa okavihera mulogo wawoga ewogelo yeFranseji elabo yo Kebeki. Nuuvira yaka, miyo orurumusiwa ni mutholo wokala nameeddela mulogo nganna yaka 28 baahi. Miyo giwoona ninga mwana ni kagaxagele dhithu dhowinjhiva. Mbwenye madhu enafwanyeya va Jeremias 1:7, 8 yahigilibiha. Lesli ahimokosa asidenti ni karo, eyo yomuthukulela okanna makathamiho afunaga ogoona. Bumwahaya nuubuwela wi kanande wakwanihedha mutholo ole. Naarive dhigali ndo, Lesli owoga egi: “Akala di Yehova ananiloba nahinarumedhela ddi?” Iyo orumedha mutholo ole ni nigaali ohagalalene iyo odhowa olaba muwari mwa yaka 17.

Olaba ninga nameeddela mulogo kiyaali yokweya, malabo mamodha kagakannesa mudhidhi wihina garedhe ni Lesli. Miyo gohowela ohudhera ethu emodha. Labo nimodha, emambesi ya txiposi, muthu dhaala ovada musiwo. Nudhowa ofugula musuwoya kaginfwannye muthuya, gifwanyilewo baahi sestu ya pikiniki, towalya, furuta dhohiyana-iyana, keju, pawu, garafwa na vinyu, kopo dhomung’wana vinyu ni kartawu nahanna ndina nalebiwe negi: “Omuthukulele mwariyo opikinikini.” Nlabo nne nahithabwa owoma, mbwenye miyo omwaddela Lesli wihina kadhandeye mwaha wi gahikanna mwaha gahowelimi wegeredha. Oliye ahonelamo, mbwenye aali owukuwene. Nuwambela wegeredha mwaha ndhe, mubuwelo obajha oginyemela. Miyo wubuwelela yolebela ya Efésios 5:25, 28. Yakala ninga Yehova eere ogubusedha dholebela ndha wihina goone wi gohowela omusamalela mwaadhaga. Numala olobela miyo wera: “Lesli kabe!” Vano oliye ohagalala vanlubale. Iyo odhowa mburo dhaala wathabwile owoma waddamela muhinjhe dhaala, iyo otadela towalyana vati ni ojha mudhidhi vamodha. Nne naali nlabo naathabwile oriya nivirilihu vamodha. Voharela, miyo gahikanna mudhidhi wihina geegeredhe mwahaga.

Nahakela mutholo dhowinjhiva nigaali anameeddela mulogo, teto dhatedhene dhoonihagalasa. Iyo weedda elabo yehu yatene, okuma oKolumbiya Britanika ofiya o Newfoundland. Vano gera werana ele gafunesimi ngali mwaana, yaali weedda olenddo ni onona dhilabo dhimodha. Miyo gahubuwela oleba petisawu wihina gidhowe oJileyadi, mbwenye kagafuna okala misiyonariyu elabo emodheene. Wa miyo, amisiyonariyu yaali athu othabwa okanna thima. Miyo guubuwela wi kagafwanelele okala misiyonariyu. Ohiya eyenove, miyo gowova othomeliwa elabo yo wAfrika, epaddi wakale koddo ni maredda. Miyo gaali ohagalaleene elabo yoKanada.

KONVITI GAHAJHEHEDHIIMI WIHINA GIDHOWE WESTONIYA NI DHILABO DHOBALTIKU

Yaka ya 1992, Anamoona a Yehova ohogolowela okanna ofuru wolaleya dhilabo dhakosa epaddi ya União Soviética. Vano addibila onikoha akala nofuna otamela wEstoniya wihina nikale amisiyonariyu. Kanajhehedha, bumwahaya iyo olobela wodhela muselu yola. Mbwenye iyo ohogolowela wubuwela: ‘Akala di Yehova ananiloba nahinarumedhela ddi?’ Iyo orumedha teto miyo wubuwela: ‘Yapamaya sowihina kannadhowa wAfrika.’

Mohulegela iyo obajha ohudhera ewogelo yEstoniyanu, nuuvira mweridhene iyo othomiwa wihina nikale anameeddela mulogo. Iyo waredhela makuru ni mulogo dhowakwana 46 wEstoniya, oLetoniya ni oLituwaniya ofiyedha oKaliningradu, murudda dhaala oRusiya. Bumwahaya nohowela ohudhera vang’ono dhiwogelo dhatedhene, ninga eLetawu, eLituwanu ni eRusu. Ohudhera dhiwogelo dhatedhene ndha kiyaali ethu yokweya. Mbwenye addibila yohagalala yanoonaga iyo nilibihedhaga ni yonikavihera. Yaka ya 1999, witiwa filiyale wEstoniya. Vano miyo withaneliwa wihina galabe komisawu ya filiyale vamodha ni Toomas Edur, Lembit Reile ni Tommi Kauko.

Iyo wanona addibila yatamihedhiwe oSiberiya kale. Naarive egonihiwe goyi ni egalapelanne ni amudhiwa, aliwa kinakalege athu owali. Aliwa kinayelelege ohagalala ni oviheyana mabasa olaleya. Yotajhiha yewa ehinihudhiha wihina iyo podi okala oovilela naarive nifwanyiwaga makathamiho.

Nahimulabela Yehova muwari mwa yaka dhowinjhivadhene ni kananna mudhidhi wowinjhiva wihina niithuwe. Mudhidhi yole Lesli obajha okala oogomeene, mbwenye iyo kanubuwela wihina oliye ahikanna oredda onithaniwa fibromialgia. Bumwahaya iyo wambela wubuwela ohogolowela oKanada. Teto iyo withaneliwa okursari Escola para Membros de Comissão de Filial, oPatterson, elabo yo Nova York Wistadu Unidu. Teto gowanganyedha akala neere wanda wakwanihedha mutholo ole, mbwenye nuwawerana malobelo iyo orumedha odhowa. Yehova ahinireeliha mwaha yothoma ela. Fuwengo nanonilihu oredda anna Lesli ni ahanda ojha murombwe ahoweliye. Mwaha wa yeyo, nahanda ohogolowela wapara mabasihu ninga neresihuna kale.

ETHU EMODHA NAHAJHEHEDHIHU — EPADDI EMODHA YA ELABO

Nigaalive wEstoniya, yaka ya 2008 emahiyu dhaala, miyo wakela xamada yadhela oSede Yinlubale egikohaga akala neere orumedha mutholo wodhowa oKongo. Miyo gahithuwathuwa, thabwathabwa mwaha gohowela wakula labo noharela. Miyo kagamwaddenle Lesli mwaha wi gahinona wi gahamwaddele kaagone emahiyu yele. Mbwenye ahandile ogona dimiyo. Miyo ovira emahiyu yantero gilobelaga wodhela muselu yole.

Nlabo noharela miyo omwaddela Lesli ni iyo wonelamo wi di “Yehova anirumile wihina ndhowe wAfrika. Iyo wikoha: Nnaanone aavi wi kannande obe kannaadhiveliwe, nahixinxe?” Vano, dhigavinre yaka 16 nigaali wEstoniya, iyo odhowa oKinshasa elabo yoKongo. Beteli yoKongo yahikanna jardi owoma ni mburo wopwaseya. Ethu yobajha Lesli ahenliye okwartu wehu naali kartawu adhiliyena okanada. Nawoga neegi: “Kinapwatha mburo oliwewo, okalege ohagalaleene.” Iyo nuwanona addibila, wahudhiha athu Bibiliya ni woona ohagalala onadhela mwaha okala misiyonariyu, odhivela wehu wodhela omparela mabasa Yehova wahithabwa wenjhedhedheya. Nuuvira mudhidhi, iyo okanna ofuru yowaredhela Beteli ya dhilabo dhimodha dhowAfrika dhowakwana 13. Eyo yahinikavihera onona mweddelo dhohiyana ni athu ohiyana-iyana. Teto woova wule gannimina omala, vano nnomutamalela Yehova mwaha oniruma elabo yo wAfrika.

OKongo nahonihiwa dhoojha dhohiyana-iyana, ninga motajhiha, analobo gubuwelimi wi kagidha gajha. Mbwenye iyo nuwona wihina addibila yothabwa odhiveliwa dhoojha ndha, iyo oxixa olawiha nuwindo nihiyoya odhiveliwaga.

Iyo oviyajarela murudda womadhelo nduwa wihina naalibihe addibila ni naakaviherena ni dhithu dhahoweliwa. Mburo dhendha, yahikalawo makuru aathu yeedda ni futhi ni yawonihesa goyi ahiyana ni ahima. Addibila owinjhiva yaali ohawa. Naarive dhigaali ndho ejhehedho yoliba yanniwana wodhela ovenyihiwa anookwa, odhivela wewa ni Yehova ni ororomeleya wewa ni nikuru na Yehova wahinidahinya murima. Yotajhiha yewa yahinithukulela wubuwela wodhela ethu enanithukulela omulabela Yehova ni olibiha nroromelo ninnihuna nuliye. Addibila amodha yahifiyedha oyelela nyumbadhiwa ni munddadhiwa. Eyo yahigubusedha wi dhithu dhomwilini podi orimela mudhidhi bu mudhidhi mbwenye wandana ninnihuna ni Yehova sili ethu yathimaya. Naarive efwanyiwaga makathamiho owinjhiva, addibila kiyathabwa wikubanyedha wodhela dhithu ndhe yayeleliwa. Makalelo addibila yooniwa dhithudha yahinikavihera owanana dhoweha ni makathamiho amwigumini nuuliba murima.

OMULAWIHA AZIYA

Nahakela ethu emodha nahajhehedhihu. Iyo othomeliwa Beteli yoHong Kong. Iyo kannubuwelege wihina nlabo nimodha neere okala elabo yo Aziya! Iyo nuwona makalelo Yehova aanikaviheriye nuudhivela muwari mwa mutholo dhatedhene nakenlihu, iyo orumedha mutholo ole. Yaka ya 2013, naarive ni mitori mwintoni, iyo wahiya addibilihu ni akwihu athima ni dhithu dhoriya dho Afrika naarive nahinonne dhithu dhaanipadduwele.

Okala oHong Kong, sidadi enlubale widhale athu ohiyana-iyana a elabo yaatene, yaali masadduwo manlubale mwigumini mwehu. Ohudhera eXina kiyaali yokweya. Mbwenye addibilaya yaali odhivela teto dhoojha dhewa dhothabwa odhiva. Mabasa oOmwene yera othabwa wenjhedhedheya, mbwenye nyumbadha dhothabwa okwima. Vano Nikuru Nolamulela ni thotho othoma oguliha dhithu dhowinjhiva dha Filiyale. Teto yaka ya 2015, iyo otamela o Coreia do Sul, nnakaviherihuwo ofiyedha peeno. Ni wunowa nihifwanya ewogelo enarusa ohudhera. Naarive nihiwogaga pama eKoreyano addibila enowoga wi ninna ohudhera vang’ono vang’ono.

DHITHU NIHUDHERIHU

Wandana naathu nihanonnihu kahi ethu yokweya, mbwenye iyo wonelamo wi nakala owambela wawithanela amodha vaadevihu enere okala yokweya wandana naaliwa. Teto, nihonelamo wi addibilihu wapela elabo yaatene enooligana ni Yehova ohunivaha ekalelo yowatonyihedha odhivela athu owinjhiva mudhidhi mmodhave. — 2 Cor. 6:11.

Iyo nnowoona thima enna wadhivela athu amodha ndala ninga Yehova ni nnowilibihedha woona makalelo Yehova ananidhiveliye ni ananiholeliye. Malabo mamodha nakala owukuwene obe nanganyedhaga akala addibila yonidhivela, nowaaja mudhidhi wihina nawileri makartawu ni makarta yanivahile akwihu. Eyo yonilibiha vanlubale, teto malabo owinjhiva nowoona makalelo Yehova awaakuliye malobelo ehu. Eyo yoolibiha nroromelo nehu ni nokanna ebaribari wihina Yehova ononidhivela vanlubale.

Nuuvira yaka dhowinjhivadhene, miyo ni Lesli ohudhera wi okumiha mudhidhi wihina nikale vamodha ethu yathima, naarive nigaali oopinyaminyeyene. Teto iyo wonelamo wihina kannahowela okala owuukuweene nahanda werana ethu-sithu, thabwathabwa naahudheraga ewogelo exa. Malabo amatene ni mahiyu nnowubuwela ethu nerilihuna mutana enidhivele, nindo nnomutamalela Yehova.

Owoga ebaribari, kaginubuwelege wihina nlabo nimodha geere okala misiyonariyu obe okala dhilabo dhohiyana-iyana. Mbwenye miyo ginohagalala woona wi nnikavihero na Yehova dhatedhene dhinowandeya. Miyo kaginadduwala madhu a namavuhulela Jeremiya, awogiliye egi: ‘Nyu Yehova, muhugileketha.’ (Jer. 20:7) Yehova ohugivaha dhithu gahajhehedhiimi ni ohugireeliha okunamo. Yehova ohufiyedha wakwanihedha efunelo yaaga yowedda olenddo ni aviyawu. Teto nihedda mburo dhohiyana-iyana gahubuweliimi ngaali mwaana. Iyo niharedhela Beteli dha epaddi tanu dha elabo. Teto ginothabwa omutamalela Lesli mwaha ogikavihera wakwanihedha mutholo dhatedhene gaakelimi.

Nnowilibihedha wubuwela wi dhatedhene dhinerihuna nnerana mwaha nnomudhivela Yehova. Mareeliho nnawakelihu peeno yowoniha ya mareeliho nnawakelihu nakanna egumi yamukalakala Yehova ‘aatapula mada aye ni akwanihedha efunelo ya dhithu dhatedhene dhinakalawo.’ — Sal. 145:16.