Hulda ahanda okanna ele afuniye
WAHERE waredhaga eliga eng’ono yoSangir Besar, wIndonesia, podi wera were wawona arogola araru egaali oparaya. Aliwa ehinoniwa pamadhene mwaha wakavihera athu omuhudhera Bibiliya. Mbwenye vano yeerana ethu emodha.
Eliga yaSangir Besar, oNorti wIndoneziya
Aliwa yahikanna elemelelo yobwina mmanjheni wihina yafwanye mabwe oonyemela ni yakumihedhe oparaya. Mabwe mamodha yothabwesa wunnuwa ninga bola a futeboli. Yamala, aliwa yokarati vampaddoni emulabihedhaga martelu wihina yaapwesna mabweya ofiyedha okala mang’ono okwaranya mazayi a mwanaku. Yamala, yowapweha mabwe ale mbaldini, yindo yohowela ogwelela sikadda wihina yande ofiyana mburo yakaliiwawo. Yafiya, aliwa yowapweha mabwe ale musakuni wihina ethukuliwe ni kamiyawu wi asasanyiwena rampa.
Hulda awugelaga mabwe oparaya
Mmodha wa aliwa aali murogola Hulda. Oliye ookannesa mudhidhi wowinjhiva wihina aapare mabasa ala. Oliye alabihesa korowa dhagumeliye mwaha wapara mabasa yala wihina ajhihe emudhaye. Mbwenye, vano oliye ahikanna ethu emodha afuniye werana. Oliye afuna amugule tablet aamukavihere omulabihedha JW Library®. Hulda ahinona wihina vidiyu ni dhithu dhimodha dhinafwanyeya mwapilikativuni muna, dhere omukavihera mmabasani oolaleya ni ohudhera waye wavayeka.
Hulda owalabihedha mawora menddi mambesi muwari mwa mweri mmodha ni meya, wihina ande wapwesa mabwe ale ni odhaliha kamiyawu eng’ono. Omagomihedho, oliye wanda okanna korowa dhahoweliye wihina amugulena tablet.
Hulda ni tablet aye
Hulda anowoga egi: “Ebaribari wihina miyo gakalesa ogomeene ni ookothoweene mwaha wapwesa mabwe. Mbwenye nuwambela omulabihedha tablet ole, miyo odduwala goyi yaatene gonilimi mudhidhi gaapwesaga mabwe. Teto tablet ahigikavihera mmabasani oolaleya ni wanda wegeredha pamadhene mutugumano.” Oliye onowoga wi tablet ole ahimukavihera mudhidhi mutipa wa koronaviru obajhagawene, mudhidhi nahowelihu olabihedha interneti wihina naaparena mabasa aatene ammulogoni. Teto iyo nihihagalala vanlubale mwaha Hulda wakwanihedha ele afuniye.