YOPADDUWA YA MWIGUMINI
Miyo gili oobareleyene mwaha omuroromela Yehova
ATHU yagiloba wihina gawaddele thalako yaaga ginowogesa wi “gili ninga maala mmadani mwa Yehova!” Ndala ninga ginathukulimi maala gadhowaga mburo bu mburo, miyo ginohiya wihina Yehova vamodha ni nikuru naye egithukulele mburo winahoweliwa. Miyo gihirumedha mutholo dhorusa teto malabo mamodha dhowopiha. Mbwenye gihudhera wihina miyo podi okala oobareleyene gamuroromela Yehova.
MAKALELO GAMBELIMI OHUDHERA WODHELA YEHOVA NI GAMBELIMI OMUROROMELA OLIYE
Miyo gibaliwe yaka ya 1948, murudda dhaala mung’ono woNijeriya, wAfrika. Mudhidhi yole, atitiyu aaga Mustafa ni ddibilaga apogoya Wahabi yahibaddiziwa ninga Anamoona a Yehova. Nganna yaka 9, apapa okwa. Gahukuwa vanlubale. Ddibilaga Wahabi ogaddela wihina miyo geere wawona apapa yavenyihiwa muukwani osogolo. Eyo yahigitodola vanlubale ofiyedha miyo okanna efunelo yomuhudhera Bibiliya. Gibaddiziwe yaka ya 1963. Teto addibilaga amodhaya araru yahibaddiziwa.
Yaka ya 1965 miyo odhowa okalaga ni ddibilaga apogoya, Wilson, luwani yoLagos. Gahidhiveliwa vanlubale waanona apiyonero a mudhidhi wamuteene amodha a mulogo Igbobi. Woona ohagalala yanna mapiyonero ala ni makalelo yaaliwa ooviheya ni mabasa oolaleya wahigithukulela okala piyonero. Eyo yereye mweri wa Janeiro yaka ya 1968.
Ddibila dhaala alaba oBeteli, Albert Olugbebi, wegeredha mutugumano wavayekiwa ni nikuru naazombwe wihina anaddele wi yohoweleya apiyonero avayekiwa epaddi yoNorti yoNijeriya. Ginowawubuwela pamadhene madhu awogile ddibila Olugbebi: “Nyu muli azombwe, bumwahaya nyu podi olabihedha mudhidhi ni kopolo dhenyu wihina mmulabele Yehova. Ehikalawo mabasa owinjhiva wihina mwapare munikuruni na Yehova!” Miyo goofuna vanlubale otajhiha ekalelo ya namavuhulela Izayiya, giivahedhelaga wihina gidhowe mburo bu mburo Yehova afuniye ogirumawo. Bumwahaya miyo operenxeri petisawu ya piyonero avayeka. — Isa. 6:8.
Yaka ya 1968, miyo othomeliwa okala piyonero avayeka murudda woKano, epaddi yonorti yoNijeriya. Eyo yereye mudhidhi wa koddo ya Biyafra, ewaniwe elabo yoNijeriya yaka ya 1967 ofiyedha 1970. Koddo ela yahadhana makathamiho owinjhiva ni yahapa athu owinjhiva ofiyedha ofiya murudda womadhelo nduwa yelabo yoNijeriya. Ddibila dhaala anna efunelo yogikavihera ahixixa ogikongomedha wihina gahirumedhe mutholo ole. Mbwenye miyo omwakula: “Ginowutamalela mwaha ogithuwathuwela. Mbwenye akala Yehova anafuna wihina gakwanihedhe mutholo ola kaginanganyedha wi Oliye aneere okala ni miyo.”
OMUROROMELA YEHOVA MURUDDA WAWANIWA KODDO
Dhithu dhapadduwa oKano dhaali dhowukuliha. Koddo ele yahimala ononga luwani yinlubale ele. Nakala mmabasani oolaleya, nowonesa muruthu dhaathu yapiwe mwaha wa koddo ele. Koddo yahinabajhe, dhahikalawo mulogo dhowinjhiva luwani yoKano, mbwenye mwaha wa koddo addibila owinjhiva yahithawamo mu luwani mune. Mudhidhi yoole anamalaleya yaliwo kiyafiya 15, aliwa yowoova vanlubale ni yahikwerebeya. Addibila ni arogola ala yahihagalala vanlubale miyo vamodha naapiyonero amodhaya avayeka atanu nufiya luwani yele. Nahalibiha vanlubale addibila ale, vano aliwa ohogolowela okala oohagalalene. Iyo nahakavihera wegeredha mutugumano ni mabasa oolaleya ni ohogolowela wawinviyari mawora ni waloba malivuru addibila ooBeteli.
Iyo obajha ohudhera ewogelo hausa. Athu a murudda yole yiiwaga muthenga womwene ni ewogelo yewa yothabwa opwasedha ovuruwana. Mbwenye anamaholela gereja ooKano kayadhiveliwe ni mabasa ehu oolaleya. Labo dhaala, miyo ni mukwaaga nahithamagihiwa ni mulobwana dhaala anna mbeni mmadani. Yapamaya sowihina nahanda othamaga, teto mulobwana ole kandile onifwanya! Naarive dhigaliwo dhithu dhowopiha Yehova oonibarela ni numero naanamalaleya obajha wunnuwa. (Sal. 4:8) Peeno luwani yoKano ehikalawo anamalaleya ookwaranya 500 ni mulogo dhowakwana 11.
OHARAHARIWA ONIJER
Gilabaga ninga piyonero a vayeka oNiamey, oNijer
Vasogolova, mweeri wa Agosto a 1968, nigamanle olaba mwana mweridhene luwani yoKano, miyo othomeliwa oNiyamey, kapitale ya República do Níger, vamodha naapiyonero avayeka abiili. Ohinavire mudhidhi wowinjhiveene, iyo wonelamo wi Nijer, elabo enafwanyeya omayelo nduwa yo wAfrika, elabo winathabwesa oviha. Ohiya baahi ovilelana oviha, Nohowela ohudhera ewogelo ya elabo yeele eli Efranseji. Naarive nifwanyiwaga makathamiho ala, iyo omuroromela Yehova ni obajha olaleya oNijer vamodha ni nikuru ning’ono naanamalaleya yakala wewule. Nuuvira mudhidhi mung’onove, athu owinjhiva oNiyamey yahimala wakela kopiya na livuru A Verdade Que Conduz à Vida Eterna. Athu yoonimeliha murampani wihina enilobe livuru nna!
Ohunavire mudhidhi owinjhiva, iyo wonelamo wi anamathonga kiyaafuna Anamoona a Yehova. Mweri wa Julho yaka ya 1969, iyo okanna musonkano wobajha wamurudda elabo yeele yaalivo athu owakwana 20. Iyo naali ethakwithakwive wihina nivuruwane mwaha wa obaddiziwa mwaha anamalaleya abiili axa a murudda yole yere obaddiziwa. Mbwenye nlabo noobajha na musonkano ole, ofiya asupayi ni omaaliha musonkano ole. Asupayi ogithukula miyo naapiyonero vamodha ni nameeddela mulogo ni onidhowana weskwadara. Egamanle onikoha, aliwa owoga wi nihogolowe nlabo noharela. Woona wi dhithudha dhere othabwa iyo othoma werana mwaha wa obaddiziwa vaade va ddibila dhaala ni voharela, iyo wabaddiza wiiko mwamakalelo ooviteya ale yafuna obaddiziwa.
Nuuvira mwana sumana, anamathonga a elabo yeele ogigara miyo vamodha ni apiyonero ale avayeka atanu. Aliwa onivaha malabo menli baahi wihina nikumemo elabo yeele, teto nohowela omusayela transporti ehu wihina nikumemo elabo yeele. Iyo wanda werana dhatedhene ndha ni odhowa oBeteli yoNijeriya. Nufiya wengo iyo othomeliwa olaba mburo dhimodha.
Nufiya oNijeriya, miyo othomeliwa olaba murudda woOrisunbare. Gahikanna oneti wolaleya ni wahudhiha athu Bibiliya vamodha nnikuru ning’ono naanamalaleya nakala murudda yoole. Mbwenye nuuvira mweri tanu nammodha, Beteli ogithana wihina gihogolowele oNijer meeka. Omambelelowene gahithuwathuwa ni gahoova, mbwenye gaali ethakwithakwive wohogolowela wawona addibila oNijer. Bumwahaya miyo ohogolowela oNiyamey!
Nuuvira nlabo nimodha miyo ngafiyile oNijer, mulobwana dhaala aali nameeddiha malondda aali munijeriyano woona wi miyo gaali Namoona a Yehova ni wambela wawerana makoho wodhela Bibiliya. Iyo wambela omuhudhera Bibiliya, vasogolova nuuhiya ofumari ni ong’wa oliye obaddiziwa. ONijer gahikanna gari yolaleya naaddibila a dhipaddi dhohiyanahiyana dha elabo yeele ni woona makalelo athu erumendhiwa ebaribari muwari mwa yakadhene. Gifiyagawene, yaliwo Anamoona a Yehova owakwana 31 baahi, mbwenye givenyagawo gahiyile owakwana 69.
“KANINONNE PAMA MAKALELO ENEDDA MABASA OOLALEYA ELABO YOGINE”
Dezembro a yaka ya 1977, miyo ohogolowela oNijeriya wihina gaxagihiwe. Nuumala oxagihiwa muwari mwa sumana tharu, namasogolela a Komisawu ya Filiyale, ddibila Malcolm Vigo, ogivahedhela karta nooBeteli nooSera Leyowa. Addibila yamusayela piyonero anna egumi yapama, aali muddiye ni aawogege pamadhene Efranseji ni Engeleji wihina akale nameeddela mulogo ooGine. Ddibila Vigo ogaddela wihina gaxagihiwa wihina gande wakwanihedha mutholo ole. Oliye owoga ni miyo egi: “Wubuwele pama wahinathi orumedha.” Mudhidhi yoole oliye awogaga, miyo omwakula gegi: “Woona wihina di Yehova anagiruma miyo ginere odhowa.”
Miyo odhowa oSera Leyowa ni ogumana ni addibila oFiliyale. Mmodha wa aliwa owoga ni miyo egi: “Iyo kannonne pama makalelo enedda mabasa oolaleya elabo yoGine.” Naarive Filiyale ele eganna mutholo wowasamalela mabasa oolaleya oGine, addibila ooFiliyale kiyanda othapanya ni addibila a elabo yeele. Mwaha mapolitiku a elabo yeele kayiwanana. Addibila ooFiliyale yahixixa dila dhowinjhivadhene waruma addibila ooBeteli, mbwenye kadhandeya. Mwaha wa yeyo aliwa ogiruma wihina gidhowe oKonakiri kapitale yoGine wi gathapanye ni anamathonga wihina egeenye okala elabo yele.
“Woona wihina di Yehova anagiruma ginere oyawo”
Nuufiya oKonakiri, miyo odhowa wembaxada yoNijeriya wihina gawoge ni mwimeleli ooNijeriya. Miyo owoga ni oliye wihina gafuna gaapare mabasa oolaleya elabo yeele yoGine. Vano oliye owoga ni miyo wihina gahidhowe mwaha wahithabwa wopihawo. Miyo gere ovokedhiwa mukambura obe yere ogipadduwela ethu-sithu yowopiha. Oliye owoga egi: “Ohogolowele oNijeriya ni walaleyege wengo.” Mbwenye miyo omwakula gegi: “Miyo gihithoma okala wewuno.” Vano mwimeleli ole oleba karta amulebelaga Ministro do Interior ooGine wihina agikavihere. Vasogolova ministuru wakela kartana ni ahigeddiha nuupama.
Nuuvira mudhidhi vang’ono, miyo ohogolowela oBeteli yoSera Leyowa ni miyo wawaddela addibila wi anamathonga ehigenya wihina gikale oGine. Addibila yahihagalala vanlubale nuwona makalelo Yehova agireelihiye!
Gilabaga ninga nameeddela mulogo oSera Leyowa
Okuma yaka ya 1978 ofiyedha yaka ya 1989, miyo gihilaba ninga nameeddela mulogo oGine ni oSera Leyowa. Teto gihilaba ninga nameeddela mulogo ookavihera oLiberiya. Omambelelowene kagarusa okala muredda. Malabo owinjhiva eyo yapadduwesa murudda worusa ofiyawo. Mbwenye addibila yowerana ele yandiwa wihina egithukulele ospitale.
Nlabo dhaala miyo okala muredda mwaha wa malariya ni mutipa. Nubajha ovulumuwa miyo wiwa wihina addibila yanna othapanyedha wodhela mburo yafuniwa ogikoya gaakwa. Naarive ngafwanyiwe makathamiho ohiyanahiyana, miyo kaginuubuwelege ohiya mutholo waga. Teto ofiyedha peeno gihikanna ebaribari wihina Yehova baahi dinande ogibarela mwamakalelo apamaya. Mwaha naarive niyelele egumihu, Oliye anere onivenyiha muukwani.
GIMUROROMELAGA YEHOVA VAMODHA NI MWADHAGA
Nlabo na matelo ehu yaka ya 1988
Yaka ya 1988 miyo omunona Dorcas, piyonera dhaala oowiyeviha ni ooviheya ni mabasa oomuzimuni. Iyo otelana ni obajha olaba ninga anameeddela mulogo. Dorcas ahilaba nuuviheya mmabasani ale nannihuna ni ahithoma werana dhatedhene andiye wihina amulabele Yehova. Olenddo dhatedhene nerihuna needdelaga mulogo iyo noweddesa makilometuru 25 nigapwathenle dhobodhihu wihina naredhele mulogo. Teto naapadaga mulogo dhakala woolapela, iyo namulabihedhesa transpoti di transporti nanfwanyiihu. Eyo yovolowelavo weedda vang’ono vang’ono dila yootibeya ni mmaddoguni.
Dorcas muhiyana ooliba murima. Motajhiha, malabo mamodha noweedda olenddo murudda mwakalesa goonya. Mudhidhi needdaga olenddo wamanle malabo matanu, iyo woona wihina ponti dhatabwa dhahikothowa. Mwaha wa yeyo nohowela wabuwa ni mwanddeya. Vano Dorcas afunaga okita mmwanddeyanimwa, oliye omothela mwiiko mburo wooddiha. Mbwenye iyo abiileene kananda oraba ni mwiikomwa mwahikala goonya. Mbwenye mohujhehedha Azombwe dhaala olupela mwiikomune ni omutavulela ode. Mwaha wa yeyo, malabo mamodha noothabwesa woova mwaha wa ele yaanipadduwenle. Naarive dhigaali ndo, iyo kanaselele mutholo wehu.
Anihu Jahgift ni Eric eli mukono Yehova anivahiliye
Omambelelo wa yaka ya 1992, iyo nahitikina vanlubale nuunona wihina Dorcas ahikanna wari. Iyo nowikohesa akala nohowela wahiya mabasa ala oopiyonero avayeka. Nuwindo iyo wubuwela, ‘Yehova ohunivaha mukono ola.’ Mwaha wa yeyo iyo othoma omwithana mwanihu ni ndina na Jahgift (Mukono wa Yehova). Nuuvira yaka naayi Jahgift agabaliwe, iyo ombala mwaana mmodha Eric. Anihu abiileene mwebaribarene mukono wa Yehova. Nuuvira mudhidhi, Jahgift olaba okambilinya yanamatapulela oKonakiri ni Eric ninga mudhaari ookavihera.
Omagomihedho, Dorcas oohowela ohiya okala piyonera avayeka. Mbwenye oliye othoma okala piyonera a mudhidhi wamutene naarive aasamalelega anihu. Nnikavihero na Yehova, miyo olabagave ninga piyonero avayeka. Anihu nuwunnuwa, Dorcas ohogolowela wapara mabasa a piyonero avayeka. Vano iyo abiileene nnalaba ninga amisiyonariyu oKonakiri.
NTXELA NA OBARELEYA WEEBARIBARI
Mburo dhatedhene Yehova agirumiyewo, miyo goyawo. Dila dhowinjhivadhene miyo ni mwaadhaga nowoona wihina Yehova oonibarela ni onireeliha. Omuroromela Yehova ohunikavira ohuthabwa othuwathuwa ninga ale enaroromela dhoreela dhomwilini. Miyo ni Dorcas nihihudhera ni dhopadduwa dhehu wihina Yehova ‘Mulugu ovulusa’ ni ntxela na obareleya webaribari. (1 Cró. 16:35) Miyo gihikanna ebaribari wihina aatene ale enamuroromela Yehova ‘enere okoyiwa mmadani mwa Yehova Mulugu eenyu.’ — 1 Sam. 25:29.