Mwahaya bwaddi dhigamagiwa Nyumba dhomwene ni dhinamagiwa addi?

Ninga enithaniwiwa Nyumba Yomwene, enoniha wi mwaha dha mBibliyani dhinawogiwamo sa Omwene wa Mulugu — mutoma alaleyesana Yesu. — Lucas 8:1.

Mburo wa webedha webaribari. Mabasa olaleya muthenga dhapama Dhomwene dha kadda murudda dhinegeredhiwa mu Nyumba Yomwene. (Mateus 24:14) Nyumba Dhomwene dhinohiyana munnuwelo ni makaleloya, mbwenye dhatedhene sokweyadhene, nyumba dhowinjhiva dhinotugumanamo mulogo dhohiyana-iyana. Yaka ndha dhovanene, nihimaga Nyumba Dhomwene dhowakwana mazana a matxikwi (nakontari kadda labo dhinomagiwa Nyumba Dhomwene tanu) wi nthananihe wenjhedhedheya wa mulogo. Dhinandeya addi? — Mateus 19:26.

Dhinamagiwa ni dhovelela dhamahala dha kadda murudda. Dhovelela ndho dhinadhowiwana Ofiliyale wi mulogo dhikalegena korowa dhomagana ni owomihedha Nyumba Yomwene yewa.

Dhinamagiwa ni addibila ohiyana-iyana owivelela ehinaliviwa korowa. Dhilabo dhowinjhiva ehegeredhiwa Makuru Oomaga Nyumba Dhomwene. Addibila enaapara mabasa omaga, addibila owivelela enodhowa mulogo ni mulogo elabo emodhave obe murudda dholapela, wi ekavihere omagiwa Nyumba Dhomwene. Dhilabo dhimodha addibila enonne wapara pama mabasa ayo enosakuliwa wi esogolelege mabasa oomaga ni oowomihedha Nyumba Dhomwene murudda bu murudda. Mmakuruni mwatemwene ehikalamo addibila ammulogoni enonne wapara pamadhene mabasa omaga enivelela wi ekavihere, mbwenye enathabwa okavihera mabasa ayo addibila ammulogoni. Muzimu wa Yehova ni wilibihera wa nlogo naye dhinoweriha wi mabasa yala yakwanele. — Salmos 127:1; Colossenses 3:23.

• Mwahaya bwaddi mburo dhehu dhowebedha dhigithaniwa Nyumba Dhomwene?

• Enakavihera opariwa mabasa omaga Nyumba Dhomwene elabo yatene ddi?