Mwanddeya wa Nowe

Nuuvira mudhidhi, mwilaboni odhalamo athu. Mbwenye athu owinjhiva yerana dhithu dhabure. Teto yahikalawo angero yaali abure. Aliwa okuma odhulu odha mwilaboni yavati ni owara mwiili weemuthu. Ohunona ethu yafuniwa? Yafuna yatele ahiyana mwilaboni yavati.

Ahiyana yatenliwa waabala ahima. Ahimaya wunnuwa okala akopolo. Aliwa yodhiveliwa waruwana ni wawoniha goyi athu. Mbwenye Yehova afuna amarihe goyi ele. Bumwahaya, oliye adhe athomege watolosa athu aatene ni mutokora. Ohunona mutokora? Mutokora aali muzongwe owinjhiva aafiyedhe odhaaliha manjhe mwilaboni yaatene.

Mbwenye ahikalawo mulobwana dhaala amudhivela Yehova. Ndina naye, iithaniwa Nowe. Oliye ahitela ni ahikanna ahima araru. Mandinaya baala: Sem, Ka, ni Jafe. Teto anaaye yahitela. Yehova afuna anvuluse Nowe ni emudhaye, bumwahaya adhe amwaddelege wihina asasanye mwanddeya. Mwanddeya yaali kaxa enlubale ya tabwa yambeluwa vadhulu va manjhe. Teto wihina anenyama enaakwe, Yehova omuruma Nowe wi aavolosihe mmwanddeyani.

Nowe ni emudhaye obajha osasanya mwanddeya. Aliwa yasasanye ninga Yehova mwafuneliye. Mwanddeya ole yasasannye muwari mwa yaka 50. Mudhidhi asasanyaga mwanddeya owawaddela athu wodhela mutokora waadhe. Mbwenye kaavo arumedha.

Vano, ofiya mudhidhi wovolowa mmwanddeyani. Vasogolova yapaddunwe ddi?