Athu Atanu Natharu ni Elabo Exa

Nowe, emudhaye ni anenyama ovolowa mmwanddeyani. Vano Yehova ofuga musiwoya. Nuwindo muzongwe wambela orubwa. Muzongweya orubwa ofiyedha elabo yaatene odhaala manjhe. Vano mwanddeya obajha ombeluwa. Athu aatene abure yaali ode wa mwanddeya okwa. Mbwenye Nowe ni emudhaye yaali oobareleyene mmwanddeyani. Ononamo aavi? Aliwa yaali aavi?

Muzongweya ahirubwa muwari mwa malabo 40, mutana ni mahiyu. Vang’ono vang’ono manjhe obajha oweleela. Vano mwanddeya ole oseya vamwangoni. Manjheya yaali ehinumme. Bumwahaya Nowe ni emudhaye okalave mmwanddeyani muwari mwa mudhidhene.

Vang’ono vang’ono, manjhe obajha oweleela. Yahikwaranya yaka yantero Nowe ni emudhaye egaali mmwanddeyani. Vano Yehova owoga nNowe wi ekume mmwanddeyani mune. Yakala ninga yanna ovolowa mwilaboni exa! Obure waatene wahimala oxeliwamo. Mwebaribarene Nowe ni emudhaye yahithabwa ohagalala mwaha Yehova wavulusa. Bumwahaya edhe emukuthelege mukutho Yehova.

Mukutho ole wahithabwa omuhagalasa Yehova. Bumwahaya adhe alibelege wihina kaadhe alabihedha mutokora wihina atolose dhithu dhaatedhene mwilaboni yavati. Wihina Nowe ni emudhaye ekanne ebaribari, Yehova okumeleliha muzirilimbo waakale yintelelo ya olibela waye. Onowonaga muzirilimbo? Woonaga muzirilimbo wubuwele ethu Yehova ampaganyiliye Nowe ni emudhaye.

Numala werana mpaganyo ole, Yehova owoga nNowe vamodha ni emudhaye egi: ‘Mbalanege ni mudhale elabo yavati.’