Muzombwe Aamwiwelele Mulugu

Juze aali mwaana a neekumi nammodha a Jako. Oliye aali mwaana ababe yathabwiwa omudhivela. Bumwahaya addibile apogoya yomukalela nrima ni yoomwidda. Labo nimodha, Juze oroha dhithu ahoonenliyemo. Nuwindo, wawaddela addibile dhithu aarohiliye. Mbwenye aliwa kiyadhiveliwe. Ohunona mwahaya? Aliwa yubuwela wihina Juze afuna aathongege. Bumwahaya edhe etakaleliwege ni Juze.

Labo nimodha, addibile Juze yanna wasamalela mambila mburo dhaala woolapela. Jako omuloba Juze wihina awoone akala eli apamene. Vano addibile numoona Juze adhaaga aliwa owoga yegi: ‘Mmoone namaroha ole anadha vale.’ Kabeni nimpe. Juze nuufiya, addibile omuhidda ommaga onvokedha mutxelani. Mbwenye mudhidhi yole yanna ovira alobwana dhaala yadhowa Wijipitu. Vano ddibile Juze owoga egi: ‘Nampa ddibilihu kannapuravo ethu, munoonamo aavi nimugulihe wihina akale mudhaari?’ Bumwahaya aliwa omuguliha Juze ni korowa dhowakwana 20.

Nuwindo, aliwa opa mbuzi othukula malaya a Juze wasigiha munikameni, nuwindo odhowa onvahedha baabiwa okalaga ninga Juze aatakuniwe ni mwanenyama. Aliwa omukoha yegi: ‘Enakala ninga malaya ala ba Juze, kahiyo?’ Jako ubuwela wihina mwanaye ohukwa, oliye wukuuwa vanlubale. Kavo aanda ommaaliha.

Nunfiyana Wijipitu, oliye oguliwa ni mulobwana dhaala athima iithaniwa Potifare wihina akale mudharaaye. Mbwenye Yehova oomukavihera. Nuuvira mudhidhi Potifare woona wi Juze owapara pama mabasa ni oofwanelela omuroromela. Mudhidhi mung’onove, Potifare ohiya dhaatedhene mmadani mwa Juze.

Mwaadha Potifare obajha woona wi Juze aali a kopolo ni oowoma. Mudhidhi waamutene oliye ooloba wihina Juze amugonihe. Ddiniyani Juze eeriyena? Mudhidhi waatene ookoodda egihina: ‘Naari! Kaginafuna. Eyo sonyakavala. Nyu muhuteliwa ni Potifare, oliye onogiroromela. Teto miyo gagona ni nyu Yehova anere otakaleliwa! Miyo kaginafuna wihina eyo epadduwe.’

Labo nimodha, mwaadha Potifare omuwaddihedha Juze wihina amugonihe. Oliye omuhidda guwo, mbwenye Juze othawa. Potifare nufiya vaade, mwadhiye omwinkedha Juze egi: ‘Juze afuna agigonihe.’ Potifare otakaleliwa vanlubale, bumwahaya oliye onvokedha Juze mukambura. Nerege Yehova ahimuddiwala Juze? Kabeni noone.