Yehova Aali ni Juze

Juze agaali mukambura, Farawo oroha dhithu athu yahandiwa wonelamo. Mbwenye mulobwana dhaala owoga wihina Juze eere wanda otapulelamo dhoroha ndhe. Farawo omwithaniha Juze. Nuwindo Juze owoga egi:

‘Muwari mwa yaka 7 Wijipitu winere othabwa okuma dhoojha, vano dhavira, winere othabwa okala dala muwari mwa yaka 7. Bumwahaya, wihina athu ehikwe dala muwari mwa yaka ndho 7, mmusakule mulobwana a thotho wihina akoyege dhoojha. Mwerana ndo athu enere ovuluwa.’ Vano Farawo wakula egi: ‘Ginuthoma weene Juze! Okuma peeno oli muthu anabiili Athima Wijipitu wuno!’ Baani aamukavihere Juze wanda otapulela dhoroha dha Farawo? Yehova damukavihenre.

Juze okoya dhoojha dhowinjhiva muwari mwa yaka ndhe 7. Nuwindo ofiya mudhidhi wa dala. Dalaya yahithabwa okokora ofiyedha athu a malogo aamatene odhowa ogulaga dhoojha Wijipitu. Nuwindo, Jako onona wihina Wijipitu wahikala dhoojha. Bumwahaya, oliye waruma anaaye wihina yagule.

Addibile nufiya Wijipitu odhowa owoga ni Juze wihina egule dhoojha. Oliye nuwawoona addibile wawubuwela, mbwenye aliwa yahimuddiwala. Aliwa okokora vamentoni vaye. Nuwawoona ekokoraga oliye wubuwela dhithu aarohiliye agaali muzombwe. Wihina oone akala addibile nivanove yaali abure, oliye owoga naliwa egi: ‘Nyu mwadhele weddelela Wijipitu wuno, kahiyo?’ Aliwa wakula yegi: ‘Naari! Iyo kanili anameddelela, iyo nnakuma oKanaa. Naali 12, mbwenye ddibilihu mmodha ohukwa teto ethogohiya ahanle naababa.’ Oliye wawakula egihina: ‘Mwamudhana ddibilinyu amung’onoya ginere ororomela wi munawoginyu ebaribari.’ Vano addibile ohogolowela oKanaa.

Nuuvira mwanamudhidhi aliwa ohogolowela Wijipitu wihina yagule dhoojha. Vano olenddoola omuthukula Benjami, ddibiliwa amung’onoya. Nuwindo Juze othoma wihina aweehe addibile. Oliye okoya kopo ya parata muthumbani mwa Benjami ni owoga wihina aliwa yere wiiya. Anamalaba a Juze oveda kopo ele ni ofwanya muthumbani mwa Benjami. Addibile Juze othuwathuwa. Aliwa omuloba Juze wihina aasinyuse aliwa ohiya Benjami.

Vano Juze ahikanna ebaribari wihina addibile yahisaddula ekalelo yewa. Vano wambela wunla ni owoga egi: ‘Miyo gili Juze, ddibilinyu! Ababa ehikalawo?’ Addibile kiyarumedha wihina Juze ohukalawo. Wihina awonihe wi ahalevelela, Juze owoga egi: ‘Kamukanne manyazo wodhela dhithu mugerelinyu. Mulugu agirumile wuno wihina givuluse egumi yenyu. Vano kadhowani, mwadhena ababa.’

Aliwa odhowa oKanaa omwaddela muthenga wapama baabiwa Jako. Voharela murala waatene odhowa okalaga Wijipitu. Naarive dhigavirile yaka dhowinjhiva, Juze ahihogolowela okala vamodha naababe.