Mulugu Onowoga ni Moyizeji

Moyizeji okala oMidiya yaka dhowakwana 40. Oliye otela ni okanna ahima. Labo nimodha, Moyizeji aakukulaga mambila waddamela mwango Sinayi woona ethu yootikiniha. Nikupu neera ohidda mootho, mbwenye kanaja! Moyizeji nuwaddamela vanikupuni vale wihina oone ethu yapadduwa, wiiwa ndhu niwogaga negi: ‘Moyizeji! Okale venvo oliwevo. Orule sandaliya mwaha mburo oliwe boweela.’ Aali Yehova awoga ni Moyizeji wodhela mungero.

Moyizeji obajha woova ni okuneela omentoni waye. Yehova owoga egi: ‘Gihinona wi amwaana Ezarayeli enotabuwa vanlubale. Ginere wawobola muudharini Wijipitu ni gaathukulele mburo wapama. Miyo gusakunle we wihina ovenyihewo nlogo naaga Wijipitu.’ Podi wera Yehova nuwoga dhithu ndhe Moyizeji ahoova.

Moyizeji okoha egi: ‘Ki aliwa yagikoha wi baani agirumile? Ginawakule aavi?’ Mulugu omwakula egi: ‘Wawaddele wihina Yehova, Mulugu Aabarawu, a Izaki ni a Jako digirumile.’ Moyizeji wera: ‘Ki aliwa yahirumedha?’ Yehova othoma omoonelihamo wi eere omukavihera. Omuruma wi avokedhe mukogodho waye vati, vano mukogodho ole osadduwa okala nowa! Nuwindo, Moyizeji ohidda mwiila wa nowa ele, osadduwa okala mukogodho. Yehova owoga egi: ‘Amwaana Ezarayeli yoona dhithu ndho enere orumedha wi di miyo urumile.’

Moyizeji waakula egi: ‘Mbwenye wa miyo enogirusa owoga vaari vaathu.’ Yehova ompaganya egi: ‘Miyo ginere wuhudhiha madhu onafuniwe wawoga teto ddibilo Arawu anakale ni we.’ Nuwiwa eyo, Moyizeji okanna ebaribari wihina Yehova eere omukavihera. Nuwindo, oliye ohogolowela Wijipitu ni mwariye vamodha nanaye.