Mulili Miraru Dhoobajha

Wijipitu amwaana Ezarayeli yowaddihedhiwa olaba ninga adhaari. Vano, Yehova omuruma Moyizeji ni Arawu wi yawoge ni Farawo yegihina: ‘Ohiye nlogo naaga nikume Wijipitu ni ndhowe mwiddeddereni wi nagebedhege.’ Farawo aali muthu owithukula bumwahaya waakula egi: ‘Miyo kaginafuna onona ethu awogile Yehova teto kaginahiye amwaana Ezarayeli odhowa.’ Mwaha wotakaleliwa, Farawo wawenjhedhedha mabasa aamwaana Ezarayeli. Ohunona ethu Yehova eeriliyena? Oliye odhana mulili 10. Yehova owoga ni Moyizeji egi: ‘Omwaaddele Farawo wihina woona wi kanafuna ogiwelela manjhe aatene ooNilu enere osadduwa ekale nikame.’ Moyizeji odhowa owoga ni Farawo. Vano Arawu nuwavada manjhe ooNilu ni mukogodho waye, manjheya osadduwa okala nikame. Manjheya obajha onukwa bure teto oba dhaatedhene okwamo. Ohiya eyo, manjheya kiyang’weya. Naarive dhigaali ndo, Farawo kaahile amwaana Ezarayeli odhowa.

Nuuvira sumana modha, Yehova owoga ni Moyizeji egi: ‘Owoge ni Farawo wihina ahihiya nlogo naaga odhowa ginere wadhana anapulu.’ Arawu ovenyiha mukogodho waye nuwindo Wijipitu okala anapuluve. Vano anapulu okala mburo dhaatedhene: mba, mburo voogona ni mmapusulanonimwa. Bumwahaya Farawo owoga ni Moyizeji wi amulobe Yehova amaalihe mulili ole. Oliye opaganya wahiya amwaana Ezarayeli odhowa. Yehova omaaliha mulili ole, anapulu aatene okwa. Wijipitu obajha onukwawo bure. Mbwenye naarive dhigaali ndo, Farawo kaahile nlogo nne odhowa.

Bumwahaya Yehova owoga ni Moyizeji egi: ‘Owoge ni Arawu wihina avade vati ni mukogodho waye, vano nthubi nikale dhimbu.’ Arawu werana eyo mohulegela okumelela dhimbu dhowinjhiva. Mejipisiyu nuwoona dhimbu ndhe, owoga ni Farawo yegi: ‘Ndha dhinadhela wa Mulugu. Mbwenye, Farawo kaahile nlogo na Mulugu.’