Rahabe ni Anameddelela

Anameddelela nuufiya oJeriko, okala vaade va muhiyana dhaala ithaniwa Rahabe. Mwene ooJeriko nunona, waruma anyakoddo aye wihina edhowe vaade va Rahabe wi yaamage anameddelela ale. Anyakoddo ale nuufiya vaade va Rahabe, oliye wawaddela anameddelela ale wihina yipite. Vano, owoga ni anyakoddo ale egi:

‘Anameddelela yaali vevala mbwenye ehidhowa. Muthamage, podi weera munere wafwanya!’ Vano anyakoddo ale nudhowa, Rahabe owoga ni anameddelela ale egi: ‘Gihinona wihina Yehova anafuna aavahe amwaana Ezarayeli elabo ela. Bumwahaya, ginere wukaviherani. Mbwenye, mugipaganye wihina munere ogivulusa miyo vamodha ni amudhaga.’ Vano anameddelela ale omwaaddela wihina awaddele amudhaaye ekale mba mwaaye, vano Yehova eere wavulusa. Ohiye eyo,aliwa owoga wihina Rahabe ohoowela omagelela mungohi woofila vajanelani.

Nuwindo, anameddelela ale okumela vajanelani wipita omwangoni muwari mwa malabo mararu. Vano malabo ale nuuvira, aliwa odhowa ogumana ni Jozuwe. Aliwa nuhogolowa, amwaana Ezarayeli wabuwa mwihinjhe Jordawu. Luwani yoobajha amwaana Ezarayeli ogonjhiha yaali Jeriko. Yehova waaruma amwaana Ezarayeli wapela luwani ele dila modha kadda labo muwari mwa malabo 6. Vano labo nanetanu nabiili oliye waruma wihina yaapele dila 7. Anamakutha wooba palaza vano amwaana Ezarayeli okuwa ni ndhu nootaama. Nuwindo, txinga dho Jeriko obwanyuwa! Mbwenye, nyumba ya Rahabe yakala vadhulu va txinga kayamothile. Rahabe oomuroromela Yehova bumwahaya adhe iiwelelege dhithu yawogile anameddelela ale. Mwaha wa yeyo, oliye ni emudhaye ovuluwa.