Namasogolela muxa ni Ahiyana Abiili Ooliba Murima

Jozuwe ahisamalela nlogo na Yehova muwari mwa yakadhene ni okwa aganna yaka 110. Jozuwe agaliwo, amwaana Ezarayeli yomwebedha Yehova. Mbwenye Jozuwe nuukwa, aliwa obajha wawebedha amulugu owoota ninga yerana akananewu. Bumwahaya, Yehova weenya wihina mwene iithaniwa Jabi aatabusege amwaana Ezarayeli Mwaha wa yeyo aliwa obajha omuloba nikavihero Yehova. Vano Yehova omusakula mulobwana iithaniwa Baraki, wi aasamalelege amwaana Ezarayeli ni aakavihere ohogolowela werana dhithu dhapama.

Baraki oohowela onona ethu ahoweliye werana. Bumwahaya, Yehova omuruma namavuhulela Debora wihina awoge ni Baraki. Debora owoga ni Baraki egi: ‘Wasakule alobwana owakwana 10 000 mugwele vamwangoni Tabor. Mwindo mukite ni muwane ni anyakoddo a mwene Jabi mwihinjhe woKizom. Bumburo yoola onamugonjhihiwe Sizera, namasogolela aanyakoddo a Jabi.’ Baraki owoga ni Debora egi: ‘Miyo ginadhowe, we wadhowa.’ Debora wakula egi: ‘Dhihikala, miyo ginodhowa.’ Yehova awogile wi anampe Sizera kahiyo we, mbwenye anampe di muhiyana dhaala.

Vano Debora, Baraki ni alobwana 10 000, ogwela vamwangoni Tabor wihina yiwegeredhe. Sizera nuunona wegeredha mbwabwadda waanyakoddo a kopolo vamodha ni karo dha koddo. Nuwindo, aliwa odhowa owana ni amwaana Ezarayeli mwihinjhe woKizom. Debora owoga ni Baraki egi: ‘Fipeno munagonjhihinyu koddo ela. Yehova ali ninyu.’ Baraki ni alobwana aye owakwana 10 000, okitavo vamwangoni ethamagaga ni odhowa owana ni anyakoddo a Sizera.

Vano Yehova weeriha wihina mwihinjhe Kizom odhale ofiyedha otekumaga. Karo dhanyakoddo a Sizera oddora mmaddeguni. Baraki naanyakoddo aye wagonjhiha anyakoddo a Sizera, mbwenye Sizera okita mukaroni mwaaye ni othawa. Oliye wipita muddammwani mwa muhiyana dhaala ithaniwa Jayeli. Woona wi Sizera aali oogomene Jayeli onvaha mukaka wihina ang’we. Vano nuugonelavo oliye omukunela. Nuwindo Jayeli wiida, omulata Sizera ni muthanko woxongowa vamuru ni ompa.

Baraki omusayelaga Sizera. Vano Jayeli okuma muddammwani mwaye ni owoga egi: ‘Baraki, mulobwana onanvediwe ali vala.’ Baraki ovolowa muddammwani mwa Jayeli ni omoona Sizera agakwile. Amwaana Ezarayeli yahagonjhiha amwiddani ewa. Nuwindo, Baraki ni Debora obajha wiiba jhibo wihina emutamalele Yehova mwaha wakavihera. Vano amwaana Ezarayeli okalagawo ni murenddele muwari mwa yaka 40.