Jideyawu Naalobwana 300

Nuuvira mwanamudhidhi, amwaana Ezarayeli ohogolowela wawebedha amulugu owoota. Bumwahaya muwari mwa yaka 7, Yehova wavahedha mmadani mwa Amidiyanita. Aliwa yowawiya anenyama aamwaana Ezarayeli ni yononga dhoojha dhewa. Wihina amwaana Ezarayeli yathawe amidiyanita, yipitesa mmakunguni ni mmwangoni. Aliwa ompigiriyela Yehova wihina aakavihere. Vano Yehova omuruma mungero wihina awoge ni muzombwe iithaniwa Jideyawu. Mungero owoga ni Jideyawu wihina Yehova ahimusakula wi aavuluse amwaana Ezarayeli mmadani mwa amidiyanita. Jideyawu omukoha egi: ‘Munagagana miyo? Ginande aavi wavulusa amwaana Ezarayeli? Miyo kagili ethu!’

Vano Jideyawu osayela makalelo owoona akala Yehova ahimusakula wi aavuluse amwaana Ezarayeli. Vano, oliye othukula thebe na mooya weeka vati ni olobela egi: ‘Yehova, mangwaana mambesi gafwanya thebe nna na mooya niganyethile, mbwenye thaya egaali yowummene, ginere onona wihina di nyu mugisakunle wihina gaavuluse amwaana Ezarayeli.’ Labo noharela, thebe nne na mooya nahidhaala manjhe mbwenye thaya yaali yowummene! Mbwenye Jideyawu oofunave okanna ebaribari. Bumwahaya, oliye omuloba Yehova wihina thaya enyethe vano thebe na mooya nikale nowummanene. Nuwindo wereya ninga mwafuneliye. Vano Jideyawu ahikanna ebaribari wihina Yehova ahimusakula. Nuwindo oliye wathukula anyakoddo aye odhowa owana ni amidiyanita.

Yehova owoga ni Jideyawu egi: ‘Ginere wakavihera amwaana Ezarayeli ogonjhiha. Mbwenye kaginafuna wihina aliwa yithukulege yegi nigonjhihile ni kopolo dhehu. Bumwahaya, ole anoova ahogolowele vaade.’ Vano anyakoddo owakwana 22 000 ohogolowela vaade, ohala 10 000. Yehova owoga ni Jideyawu egi: ‘Nivanove ehithabwa winjhiva. Wawerele wihina yang’we manjhe wiiko. Omuthukulele okoddoni ole anaang’wege manjhe wula aasugweraga amwiddani.’ Alobwana 300 baahi baang’wile yasugweraga amwiddani. Vano Yehova opaganya wihina aalabihedhe alobwana yayo wihina aagonjhihe anyakoddo aamidiyanita owakwana 135 000.

Emahiyu yele, Yehova owoga ni Jideyawu wihina wahifiya mudhidhi wowana ni amidiyanita. Vano Jideyawu wavahedha anyakoddo aye palaza, jaro dhinlubale, tigo dhahidda mootho ni owoga egi: ‘Mpwasedhe dhithu ginafunimi werana wihina mwerena emodhave.’ Jideyawu orumiha palaza, opwesa jaro ni, ovenyiha tigo dhahidda mootho ni okuwa egi: ‘Supadda na Yehova ni na Jideyawu! Alobwana ale 300 werana emodhave. Amidiyanita ofwanyiwa woova ni othamagaga bure-bure. Vano wambela owana aliweneve. Yehova ahakavihera amwaana Ezarayeli wagonjhiha amwiddani ewa.