Yehova Ahiwoga ni Samuweli

Namakutha munlubale Eli ahikanna ahima abiili yithaniwa Ofini ni Fineya. Aliwa kiyamwiwelela Yehova ni yothabwa wawerela athu amodha dhithu dhabure. Amwaana Ezarayeli yadhowaga omukuthela mukutho Yehova, Ofini ni Fineya yasakulamo piddula dhapamadha. Eli ahinona mbwenye keerile ethu. Ki Yehova? Nuliyene kerilena ethu?

Mudhidhi yole Samuweli aali mwaana, teto ahima yatajhihesa apogo. Mbwenye Samuweli kaamutajhihile Ofini ni Fineya. Yehova ahoona ekalelo ele ya Samuweli ni ohagalala vanlubale. Labo dhaala, Samuweli eera ogona, nuwindo wiiwa iithaniwaga. Oliye ovenya othamagela waali Eli. Eli owoga wihina kaamwithanne ni owoga wihina Samuweli ahogolowele ogona. Eyo yahipadduwa dila tharu. Vano dila yanatharu, Eli wanganyedhaga wihina di Yehova afuna owoga ni Samuweli. Bumwahaya, omwadddela wi Samuweli iiwa ndhu nne dila emodha aakule egihina: ‘Yehova, podi owoga miyo ginowiwa.’

Samuweli nuhogolowela ogona, oliye ohogolowela wiiwa iithaniwaga. Oliye waakula mwamakalelo aaddeliwiye ni Eli. Vano, Yehova owoga egi: ‘Omwaaddele Eli vamodha ni emudhaye wihina ginere wasinyusa. Mwaha Eli ohunona wi Ofini ni Fineya athu abure mbwenye oliye anowasugwa baahi.’ Mambesene, Samuweli ovenya, ofugula musiwo dhootabernakulu ninga eeresiye malabwene. Mbwenye eera woova omwaddela Eli dhithu awogile Yehova. Vano Eli omuloba wihina amwaddele. Nuwindo Samuweli omwaddelamo Eli dhithu dhaatedhene Yehova awogiliye.

Samuweli wunnuwagave teto Yehova odidela wandana nuuliye. Athu aatene owIzarayeli yahinona wihina Yehova ahimusakula Samuweli wi akale namavuhulela ni namatoriha.