Mwene Oobajha Owizarayeli

Yehova ahasakula anamatoriha wihina yasamalelege amwaana Ezarayeli. Mbwenye woona wi malogo mamodha yahikanna amwene, amwaana Ezarayeli yofuna okanna mwene. Aliwa odhowa omuloba Samuweli wihina ekanne mwene. Mbwenye Samuweli kaadhiveliwe bumwahaya oliye olobela wa Yehova. Vano Yehova owoga egi: ‘Nlogo kannukoodda we, mbwenye nnagikoodda miyo. Wawaddele wihina aliwa podi okanna mwene, mbwenye enere otaabuwa mmadani mwa mwene oyo.’ Samuweli nuwoga ni nlogo aliwa omwakula yegi: ‘Iyo kannapwatha akala nnere woona goyi obe naari. Nnafunihu fukanna mwene!’

Yehova omwaddela Samuweli wihina mulobwana dhaala anithaniwa Sawuli eere okala mwene. Labo dhaala, Sawuli odhowa omoona Samuweli oRama. Wihina Samuweli oonihe wi Sawuli ahisakuliwa wi akale mwene, omwithela makura vamuru.

Nuwindo, Samuweli wawithana athu aatene wihina awonihe mwene muxa oWizarayeli. Mbwenye kaavo aanda onfwanya Sawuli. Ohunona mwahaya? Mwaha oliye eere wipita. Numusayela mudhidhi wowinjhiva aliwa onfwanya Sawuli. Oliye aali oolapa wakwaranya aatene teto aali oowoma. Samuweli omuthukulela Sawuli vaari va nlogo ni owoga egi: ‘Kasugwani! Ola di mwene amuthomile Yehova.’ Vano nlogo okuwa nuuhagalala nuwoona wihina yahikanna mwene.

Omambelelowene Sawuli oomwiwelela Yehova ni owerana dhaatedhene Samuweli amurumiye. Mbwenye Sawuli osadduwa vano okala oohiwelela. Motajhiha, labo dhaala, Sawuli afuna amukuthele mukutho Yehova, mbwenye oliye kanna ofuru mwaha ale yaali mabasa a Samuweli. Samuweli ahimwaddela Sawuli wihina amujhehe, mbwenye Sawuli kaamujhehile. Oliye werana dhaatedhene yeekaye. Bumwahaya Samuweli owoga ni Sawuli egi: ‘Ethu weriliwena kikalile, mwaha kumwiwelele Yehova.’ Nerege Sawuli ahihiya ohimwiwelela Yehova? Naari.

Nuuvira mudhidhi, Sawuli odhowa owana naamalekita. Yehova owoga wihina oohowela waapa aatene, mbwenye Sawuli othoma ohumpa mwene aamalekita iithaniwa Agagi. Yehova owoga ni Samuweli egi: ‘Sawuli kanafuna ogiwelela newene kanafuna ogivuruwana.’ Samuweli wukuwa vanlubale ni owoga ni Sawuli egi: ‘Woona wi kunamwiwelela Yehova, Oliye aneere omusakula mwene mmodha.’ Mbwenye Samuweli nurugunuwa wihina adhowege, Sawuli wahidda malaya a Samuweli ofiyedha otaleya. Vano Samuweli owoga ni Sawuli egi: ‘Yehova anere wuwaka omwene wo Ezarayeli.’ Baani afuna okala mwene muxa owIzarayeli? Yehova aamusakule muthu amudhivela Oliye ni aamwiwelelege.