Tempulu ya Yehova

Salomawu nuukala mwene owIzarayeli, Yehova omukoha egi: ‘Salomawu, onafuna guuvahe ddi?’ Oliye waakula egi: ‘Nabwiya Yehova, miyo gili muzombwe, kaginonne pama dhithu ginahowelimi werana. Ginaloba wihina mugivahe thotho wihina gande osamalela nlogo nenyu.’ Yehova nuwiwa eyo owoga egi: ‘Woona wi olobile thotho, miyo ginere wuvaha thotho wapitha athu aatene. Teto ginere wuvaha dhoreela. Ohiya eyo, wagiiwelela onere okalawo yaka dhowinjhiva.’

Salomawu obajha omaga tempulu. Alobwana ni ahiyana owinjhiva yokavihera omaga tempulu elabihedhaga dhipano dhapama. Nuuvira yaka 7, tempulu omala. Vano, Salomawu ofunaga opeleka tempulu ele wa Yehova. Othukula nvaho opweha vadhulu va altare, okokora ni olobela egi: ‘Yehova, nyu munofwanelela mburo wothabwesa owoma okwaranya tempulu ela. Mbwenye kamwerena murumedhe ni mwavuruwanege malobelo nnaweregihuna vala.’ Ohunona ethu Yehova eeriliyena wihina oonihe wi ahirumedha tempulu ele? Salomawu numala olobela, Yehova okitiha mootho odhulu, opaha dhithu dhaatedhene dhaali vadhulu va altare. Amwaana Ezarayeli nuwoona, ohagalala vanlubale!

Salomawu ovuwa mwaha wa thotho dhaye. Athu a murudda dhaatedhene yodhowa wa Salomawu wihina oliye aakavihere ni muladdu dhewa. Musano dhaala akala murudda woolapela withaniwa Saba, odhowa owoga ni Salomawu. Oliye afuna anone akala mwebaribarene Salomawu ahikanna thotho obe naari. Nuuthapanya ni Salomawu, musano ole owoga egi: ‘Nuwiwa wihina ohukanna thotho, miyo kagarumedha, mbwenye vano gihinona wihina ebaribari. Yehova, Mulugu awo anna wukavihera.’ Mudhidhi yoole dhithudha wIzarayeli dhowedda pama teto athuya yohagalala. Mbwenye vasogolova dhithudha dhere osadduwa.