Anyakoddo Akopolo a Yehova

Ben-Adadi, mwene ooSiriya, ahixixa dila dhowinjhivadhene owana ni nlogo nowIzayayelii. Mbwenye namavuhulela Elizewu oomwaddela mwene owIzayayelii dhithu Ben-Adadi afuniye werana. Bumwahaya, Ben-Adadi kaanda wakwanihedha dhithu afuniye werana. Vano, oliye waruma anyakoddo ooSiriya wihina edhowe luwani yoDota wihina yammage Elizewu.

Anyakoddo ooSiriya ofiya oDota ni mahiyu. Labo noharela, mudhaari a Elizewu woona wi luwani yaatene yahirijhiwa ni anyakoddo owinjhiva. Oliye obajha woova ni okuwa egi: ‘Elizewu, ki vano? Nnere ddi?’ Elizewu waakula egi: ‘Kuthuwathuwe. Ehikalawo athu owinjhiva epaddi yehu opitha epaddi yewa.’ Mudhidhi yoole, Yehova weeriha wihina mudhaari a Elizewu oone ethu yootikiniha. Oliye woona wihina mwango dhaatedhene dhaapele luwani yele wahikala akavalo ni karo dha koddo dha mootho.

Anyakoddo ooSiriya nuuxixa ommaga Elizewu, oliye olobela egi: ‘Yehova, kamwerena, mwerihe wihina athu ala ehonege.’ Mohulegela, anyakoddo ale kuhunonaga mburo waaliwa naarive yonaga. Vano Elizewu owoga naaliwa egi: ‘Muuholowa. Kadhaani wuno wihina guveleleni wa muthu munamusayelinyu.’ Anyakoddo ale omuharaga Elizewu ofiyedha oSamariya, luwani emodhave wakala mwene owIzayayeli.

Akudda Siriya yabanjhe woona nufiya waali mwene. Vano mwene owIzayayeli omukoha Elizewu egi: ‘Gaape anyakoddo ala?’ Elizewu ahafune eere opatha mudhidhi yoole wihina aawelihedhe kunyawunya. Mbwenye ohunona ethu eeriliyena? Oliye owoga egi: ‘Naari, kamwaape. Mwavahe yoojha nuwindo mwawaddele wihina edhowege.’ Vano, mwene owIzayayeli oruma wihina yegeredhiwe yoojha wi anyakoddo ale ejhe. Numala ojha anyakoddo ale odhowaga.