Omwene Onakalewo ni Mukalakala

Emahiyu dhaala, mwene Nabukodonozori oroha ethu yowopiha. Ethu aarohiliye yahimuthuwathuwiha vanlubale ofiyedha oliye ohandaga ogona. Vano oliye wawithana akumbasa aye aatene ni owoga egi: ‘Mugaaddele ethu girohilimi.’ Aliwa wakula yegi: ‘Hee nabwiya! Mbwenye murajhihe onaddela ethu murohilinyu.’ Vano mwene okoodda egi: ‘Naari! Nyuwene mugaddele girohilimi mwahera ndo, ginere wupani aatene!’ Aliwa owoga ni mwene yegi: ‘Mwene Nabukodonozori, kamwerena! Naddeleni yoroha yenyu, vano iyo nnere otapulela.’ Mwene wawakula egi: ‘Nyu munafuna mugilekethe! Mugaddele ovanene ethu girohilimi.’ Vano aliwa omwakula mwene yeegi: ‘Eyo kinandeya mwene, kaawo muthu ananda werana eyo.’

Nabukodonozori otakaleliwa vanlubale ni oruma wihina alobwana aatene athotho ooBabiloniya epiwe. Yothoma ya mwene yahipweha vangovini egumi ya Daniyeli, Sadaraki, Mezaki ni Abedenegu. Mwaha wa yeyo, Daniyeli odhowa owoga ni mwene Nabukodonozori ni omuloba mwana mudhidhi vang’ono. Nuwindo Daniyeli ni akwaye olobela wa Yehova emulobaga nikavihero. Ki Yehova erile ddi?

Yehova omwaaddela Daniyeli ethu mwene Nabukodonozori aarohiliye ni yotapulelaya. Vano labo noharela Daniyeli omwaddela mudhaari a mwene egi: ‘Kamwaape alobwana athotho, miyo ginere otapulela yoroha ya mwene.’ Vano mudhaari ole omuthukula Daniyeli ni omudhowana waali mwene Nabukodonozori. Nuwindo Daniyeli owoga ni mwene egi: ‘Mulugu anuwaddelani dhithu dhinafuna wupadduwelani osogolo. Teto yoroha yenyu siila: Nyu nabwiya muhoona ekwamuthu enlubale yanna musolo wa woru, thimarima ni moono dhaali dha parata, erugulu ni takwi dhaali dha kobere, moddodha dhaali dha mujhila teto manyaloya yaali a mujhila egataganyihedhiwe ni ologo. Vano nibwe okuma vamwangoni ni wapwesa manyalo a ekwamuthu ofiyedha onyenyeya. Nuwindo okumelela nipevo oguddavo nthubi naatenene. Vano nibwe nne naakumme vamwangoni okala mwango munlubale ni okuneela elabo yaatene.’

Voharela Daniyeli omwaddela mwene Nabukodonozori yotapulela ya ethu aarohiliye egi: ‘Musolo wa woru wa ekwamuthu, bumweninyu. Mbwenye epaddi ya parata enatapulela omwene onaadhe osogolo, omwene weenyu wamala. Windo onere odha omwene mmodhaya wa kobere onathongege elabo yaatene. Voharela onere odha omwene mmodhaya onaakale wovaadda ninga mujhila. Wogomihedha, omweneya onere ogawanyeya. Dhipaddi dhimodha dha omwene oyo onaakale ninga mujhila, mbwenye dhimodha dhinaakale wohuvadda ninga ologo. Nibwe nikumile vamwangoni, buMwene wa Mulugu. Omwene oyo onere ogujhula omwene waatene wa elabo yavati ni onere otikiteriwa wi othongege ni mukalakala.’

Nuwiwa ndhe awogile Daniyeli, mwene Nabukodonozori okokora ni owoga egi: ‘Mulugu awo ohukavihera otapulela yoroha yaaga. Bumwahaya kawo Mulugu mmodhaya analigana nuliye!’ Ohiya ompa Daniyeli, mwene Nabukodonozori omuthoma wihina akale namasogolela aalobwana aatene athotho, teto Daniyeli okala musadoro ooBabiloniya. Uhoona makalelo Yehova aakunliye nlobelo na Daniyeli ni naakwaye?