Txinga dhooJeruzale

Kabeni nihogolowele vang’ono mundduli. Opersiya ahikalawo mwIzarayelita dhaala ithaniwa Neemiya, alaba vaade va mwene Artaxerxi. Labo dhaala, ddibile Neemiya akuma oJuda odhana muthenga dhowukuliha ni owoga egi: ‘Athu yahogolowele oJeruzale eli vangovini. Ofiyedha peeno kaavo avenyihedhe txinga ni musiwo dhigujhuliwe ni aBabiloniyu.’ Nuwiwa eyo, Neemiya wukuuwa vanlubale. Oliye oofuna odhowa oJeruzale wihina aakavihere, mbwenye kaanonne akala mwene eere orumedha. Vano, oliye olobela wa Yehova wihina amukavihere.

Labo dhaala, mwene woona wihina Neemiya ahukuwa nuwindo omukoha mwahaya bwaddi adhe akalege owukuwene. Neemiya owoga wodhela Jeruzale ni makalelo dhaali txinga ni musiwodha. Mwene omukoha ethu baani ahoweliye werana. Mudhidhi yoole, Neemiya olobela mmurimani ni omwaddela mwene egi: ‘Miyo gafuna gidhowe oJeruzale gavenyihedhe txinga. Mweere ogeenya?’ Mwene Artaxerxi omweenya ni werana dhaatedhene wihina Neemiya eedde olenddo ole nubareleya. Teto mwene omuthoma Neemiya ninga musadoro ooJuda ni onvaha tabwa wihina yawomihedhena musiwodha.

Neemiya nufiya oJeruzale, odhowa woona makalelo yaali txinga ni musiwodha. Nuwindo, otugumana naalobwana aatene athima ooJeruzale ni owoga egi: ‘Txinga ela ehithabwa ogujhuwa. Nnohowela osayela makalelo owomihedha.’ Aatene orumedha ni obajha ovenyihedha txinga.

Mbwenye yahikalawo amwiddani amodha aamwaana Ezarayeli yaateya ni yawoga yegi: ‘Txinga ela kahi ethu. Kwaddwe podi wanda obwanyula!’ Mbwenye amwaana Ezarayeli kayapwatha, aliwa odidela wapara mabasa ale. Nuuvira mudhidhi, txingaya ogwelaga ni othabwaga okala yooliba.

Nuwindo, amwiddani othoma omurijha Jeruzale morurumusa. Majudewu nunona eyo, obajha woova. Mbwenye Neemiya wawaddela egi: ‘Kamoove. Yehova ali ni iyo.’ Nuwindo, Neemiya wapweha anamasugwera wihina yabarelege ale yamaga txingaya. Mwaha wa yeyo, amwiddani ale kayandile wagonjhiha amwaana Ezarayeli.

Aliwa wamariha mabasa ale muwari mwa malabo 52. Wihina yaajhe mathanga, Neemiya wathukulela malevita oJeruzale ni wagawa makuru menli. Neemiya okala nnikuru nimodha, Esdara okala nnikuru nimodha. Makuru ale menli ogwela vadhulu va txinga. Aliwa obajha waapela luwani ele emwibelaga jhibo Yehova ofiyedha makuru aamenlene ogumana oTempulu. Alobwana, ahiyana ni ahima aatene ooJeruzale ovelela mukutho dhewa wa Yehova wula yajhaga mathanga. Ohagalala wewa wowiweya wolapelawene.