Esdara Ahahudhiha Malamulo a Mulugu

Dhahivira yaka 70 amwaana Ezarayeli amodhaya egahogolowenle oJeruzale. Mbwenye amwaana Ezarayeli amodha yakala mburo dhoohiyana-iyana, luwani yoPersiya. Wa amwaana Ezarayeli yaala, ahikalavo namakutha mmodha iithaniwa Esdara. Oliye owahudhihesa athu malamulo a Yehova. Vano nunona wihina amwaana Ezarayeli amodha yakala oJeruzale kiyawiwelela malamulo a Yehova, oliye othoma odhowa okavihera nlogo nne. Mwene ooPersiya, Artaxerxi, omwaddela Esdara egi: ‘Mulugu ohuvaha enonelo wihina waahudhihe athu malamulo aye. Kadhowa oJeruzale. Akala muthu onofuna odhowa ni we, kavili muladdu.’ Nuwindo Esdara otugumana naathu aatene yafuna odhowa oJeruzale. Aliwa olobela wa Yehova wihina aakavihere weedda olenddo ole, nuwindo aliwa omaruwa.

Nuuvira mweri minnayi, aliwa ofiya oJeruzale. Apogo a wewule, omwaddela Esdara wihina amwaana Ezarayeli amodha yahatela ahiyana yahamwebedha Yehova. Nunona eyo, Esdara okokora vamentoni va nlogo ni olobela egi: ‘Yehova, nyu muhunerela dhithu dhapama, mbwenye iyo werana dhithu dhabure.’ Amwaana Ezarayeli othwaruwa, mbwenye nuuvira mudhidhi aliwa ohogolowela werana dhithu dhabure. Bumwahaya, Esdara wathoma anamaholela a nlogo ni anamalaga wihina esamalelege nlogo. Mweri miraru dhoharela, aliwa wawigara athu aatene yahamwebedha Yehova.

Nuwindo, ovira yaka 12. Muwari mwa yaka ndha 12 txinga dhooJeruzale ovenyihedhiwa. Numala werana eyo, Esdara otugumana ni nlogo naatene wihina awileri malamulo a Mulugu. Oliye nufugula livuru, nlogo naatene okala owimelene. Esdara vamodha ni nlogo onvuwiha Yehova. Mudhidhi awilerigi ni aatapulelaga malamulo ale, nlogo naanna onvuruwana nupwaseya. Amwaana Ezarayeli owoga wihina yahimuthegela Yehova ni wikubanyedha vanlubale. Labo noharela, Esdara wawilerive malamulo a Mulugu vamentoni va nlogo. Amwaana Ezarayeli wonelamo wihina wahanle mudhidhi vang’ono wihina yawerena mathanga a Muthupo wa Ddammwa. Nuwindo aliwa obajha wawegeredha mathanga ala manlubale.

Sumana ele yaatene ya mathanga, amwaana Ezarayeli ohagalala vanlubale ni omutamalela Yehova mwaha oreeliha mundda dhewa. Dila yogomihedha amwaana Ezarayeli yaajhiliwa mathanga a Muthupo wa Ddammwa yaali malabo a Jozuwe. Mathanga ale numala, nlogo otugumana ni olobela yegi: ‘Yehova, nyu dinikumihile Wijipitu, onivaha yoojha mwiddeddereni teto muhunivaha mburo ola woowoma. Mbwenye dila dhowinjhivadhene nowuthegelani. Nyu Nabwiya mowaruma anamavuhulela wihina enaaddele, mbwenye iyo kanawiwelela. Naarive dhigaali ndo, nyu muhunivilelana teto muhakwanihedha ethu mwampaganyilinyu Abarawu. Vano, ninna olibela wihina nnerege wuwiwelelani.’ Numala, aliwa oleba dhaatedhene yapaganyiliwa. Wihina ekanne ebaribari wi nlogo nne nere wakwanihedha mpaganyo wewa, anamasogolela a nlogo, malevita ni anamakutha wasinari.