Pawulo ni Timotiyu

Timotiyu aali muzombwe a mulogo waali luwani yoListra. Ababe yaali agerego, amaye yaali mujudiya. Amaye yithaniwa Ewunisi, avwaye Loyidi. Aliwa yahimuhudhiha Timotiyu wodhela Yehova obajha ehimene.

Pawulo eeddaga olenddo waye wanabiili ofiya oListra. Oliye woona wi Timotiyu ahikanna odhivela ni oodhiveliwa wakavihera addibila. Mwaha wa yeyo, Pawulo omuloba Timotiyu wihina eeddege nuliye. Nnikavihero na Pawulo, Timotiyu ohudhera olaleya ni ohudhiha pama.

Mulugu oolabihedha muzimu waye wotxena wihina amutonyihedhe Pawulo ni Timotiyu mburo yahoweliwa odhowawo wihina yalaleye. Emahiyu dhaala Pawulo agonaga omuroha mulobwana dhaala amwaddelaga Pawulo wihina ohowela odhowa oMasedoniya wihina aakaviherewo. Nuwindo Pawulo, Timotiyu, Silaji ni Lukaji odhowa murudda woMasedoniya wihina yalaleye ni wiita mulogo.

Athu owinjhiva ooTesalonika ni luwani dhaala yoMasedoniya okala makiristawu. Mbwenye majudewu amodha kiyadhiveliwa yamonaga Pawulo vamodha ni akwaye. Mwaha wa yeyo aliwa witaganyihedha ni muthithi wa athu omuhidda Pawulo ni akwaye omudhowana waanamathonga a luwani yeele ni yokuwa yegihina: alobwana ala enorugunuwela onamathonga wooRoma. Yere okala yowopiha Pawulo ni Timotiyu okala wewule, bumwahaya vati nuuriba aliwa othawela oBereya.

Athu oBereya yofuna vanlubale ohudhera muthenga dhapama, mwaha wa yeyo, agerego ni maJudewu owinjhiva okala makiristawu. Majudewu amodha ooTesalonika nuudhowa oBereya wihina yatatamule muladdu, Pawulo ohowela odhowa wAtena. Mbwenye Timotiyu ni Silaji okalave oBereya wihina elibihe nroromelo naaddibila. Nuuvira mudhidhi Pawulo omuloba Timotiyu wihina ahogolowele oTesalonika wihina akavihere addibila wanda ovilelana oharahariwa. Teto vasogolova, Pawulo omuloba Timotiyu wihina awaredhele ni aalibihe addibila amulogo dhimodha.

Pawulo omwaaddela Timotiyu egi: ‘Ole anafuna omweebedha Yehova aneere oharahariwa ni wonihiwa goyi.’ Timotiyu ahiharahariwa mwaha wookala mukiristawu. Mbwenye naarive dhigaali ndo, oliye oohagalala ni owooniha wihina aali ororomeleya wa Yehova.

Pawulo owoga ni addibila ooFilipu egi: ‘ginomuruma Timotiyu mowaguva wihina adhe wengo. Oliye afiya aneere wuhudhihani makalelo oweedda mwibaribarini ni wuxagihani mmabasani oolaleya.’ Pawulo oomuroromela Timotiyu. Teto aliwa yahilaba yaka dhowinjhivadhene vamodha ni yahandana vanlubale.