Odhowegeve waajhaga mareeliho enadhela mwaha omoova Mulugu

1-2. Ndala ninga Lo, dhoweha baani dhinaafwanya makiristawu peeno?

PEENO noonaga makalelo owubuwela aathu ehinaligana ni mubuwelo wa Yehova, nnakala ninga Lo. Oliye ‘akalesa othuwathuwene mwaha wa mweddelo wonyakavala yanna athu a mudhidhi yole.’ Teto oliye ahinona wihina baabihu odhulu oowidda mweddelo yole. (2 Ped. 2:7, 8) Omoova ni omudhivela Mulugu wahimukavihera Lo okoodda mweddelo waathu yamwapele. Nihiyowa naapeliwe ni athu ehinna nriho ni malagano a Yehova. Naarive dhigali ndo, Iyo podi okala oweela epaddi ya mubuwelo nadidelave omudhivela Mulugu ni nahudhera omoova oliye mwamakalelo apama.— Pro. 14:2.

² Wi naande werana eyo, nihikanna nikavihero na Yehova. Oliye onolabihedha livuru na Provérbios wihina anikongomedhe. Makiristawu aatene, alobwana, ahiyana, azombwe ni anakalaba, podi ohudhera vanlubale ni livuru na Provérbios.

OMOOVA MULUGU WINONIBARELA

3. Mowiwanana ni Provérbios 17:3, ethu baani enanithukulela obarela murima wehu? (Osugwe fotu.)

³ Ethu yathima enanithukulela obarela murima wehu sowi Yehova dinapendda murima wehu. Eyo enatapulela wihina mohiyana ni athu amodha enasugwa baahi ekalelo yehu yoode, Yehova onowanda woona ele eli mmurimani mwehu. (Omwileri Provérbios 17:3.) Nadhaliha mubuwelo wehu ni malagano a Yehova, oliye aneerege onidhivela ni aneere onivaha egumi yohimala. (João 4:14) Nimakalelo yala mubuwelo ni dhowoota dha Saddana kadhinanitatamulele makathamiho, mwaha kannaavahe mburo dhithu dhendha. (1 João 5:18, 19) Naathabwagave onfiyedha Yehova, odhivela ni nriho ninnihuna nuliye nnerege othabwa wunnuwa. Iyo nnomudhivela vanlubale Baabihu oodhivela Yehova, bumwahaya nnowidda mubuwelo onanithukulela werana yothega. Natujeliwaga werana ethu yabure, iyo podi wubuwela ayi: ‘Gaande addi omuukula muthu onihile dila dhowinjhivene wi anogidhivela?’ — 1 João 4:9, 10.

4. Nimakalelo baani omoova Yehova wimukaviheriwa murogola dhaala?

⁴ Murogola dhaala anithaniwa Marta anakala oKrowasiya atujeliwe wawerana mararuwo ohuleba egi: “Wa miyo kiyaali yokweya wubuwela pamadhene ni owanana munigwa wowerana ethu yabure wihina giihagalase muwari mwa mudhidhi mung’onove. Mbwenye omoova Yehova wihigibarela.”b Nimakalelo baani omoova Yehova wimukaviheriwa Marta? Marta onihina oliye apendda makathamiho yakumelelevo mwaha werana ethu yabure. Ni iyoya nnohowela werana emodhave. Nnohowela wubuwela wi neerana ethu yabure nnere omuukula Yehova ni nnere oyelela ofuru womwebedha nimukalakala.— Gén. 6:5, 6.

5. Ethu baani nihudherihu ni yopadduwa ya Leyo?

⁵ Naamoovaga Yehova, kannisijhedhege nikalaga ninga kaninna wandana wabure obe kannerana dhithu dhabure. Siyeyo ahudhere Leyo anakala oKongo. Numala yaka nayi agabaddiziwe, oliye wandana naathu yerana dhithu dhabure. Oliye ubuwela wihina aherana ethu yabure kaakanne makathamiho naarive eeddaga naathu ale yerana dhithu dhabure ni ubuwela wi kaamuthegela Yehova. Mbwenye mudhidhi mung’onove wandana wule wabure wahimuthukulela Leyo ong’wa bure ni wawerana mararuwo. Fivenvo oliye ambeliye wubuwela wodhela dhithu ahudheriye ni makolo aye ni makalelo aliye ohagalala mudhidhi amulabelaga Yehova. Yokumelavoya siivi? Vano oliye ohogolowela wubuwela dhithu dhapama ni osukuma dhithu dhabure. Nnikavihero na anamaholela mulogo oliye omuhogolowela Yehova. Peeno oliye dohagalala ni analaba ninga namaholela mulogo teto Piyonero avayeka.

6. Ahiyana abiili enawogiwa va Provérbios kapitulu 9 enagiwana aani?

⁶ Vano kabeni noone kapitulu 9 ya livuru na Provérbios enawoga wodhela ahiyana abiili. Mmodha anatonyihedha thotho, mmodhaya anatonyihedha otaduwa. (Kasugwa Romanos 5:14; Gálatas 4:24.) Nahudheraga kapitulu ela, ononege wihina elabo ya Saddana ehikanna monelo wabure wodhela mararuwo ni vidiyu dha mararuwo. (Efé. 4:19) Bumwahaya sathima odhowagave nimoovaga Mulugu ni olapelana ni dhithu dhabure. (Pro. 16:6) Bumwahaya iyo aatene podi opurelamo dhithu enahudhiha kapitulu ela. Ahiyana ala aabiilene enowawithana ale eli olodhowa — ale ‘ehinna ekalelo yapama.’ Enakala ninga oliye anawoga egi: ‘Mudhe mujhe yojha yaaga.’ (Pro. 9:1, 5, 6, 13, 16, 17) Dhokumelela dhinadhela mwaha orumedha mwithanelo wa ahiyana abiili ala sohiyana.

ORABELE DILA YA ‘MUHIYANA ALI TADUWA’

7. Mowiwanana ni yolebela ya Provérbios 9:13-18, yokumelela baani enadhela mwaha orumedha omuhara muhiyana ali taduwa? (Osugwe fotu.)

⁷ Vobajha nnafuna noone mwithanelo anerana ‘muhiyana ali taduwa.’ (Omwileri Provérbios 9:13-18.) Oliye kanakanna manyazo wowawithana ale eli oolodhowa wihina ejhe vamodha, egihina: ‘Mudhe wuno.’ Ki yokumelelaya siivi? ‘Enere ogumana ni okwa.’ Podi wera onowubuwela dholaddaniha dhimodha dhinafwanyeya livuru na Provérbios dhinaligana ni ela. Iyo nnokongomedhiwa wodhela ‘muhiyana abure’ ni ‘muhiyana ali namararuwa.’ Ni nnowaddeliwa ‘wi nyumba ya muhiyana ali namararuwa enathukulela omakwelo.’ (Pro. 2:11-19) Provérbios 5:3-10 anowoga wodhela ‘muhiyana abure’ mmodhaya egi: ‘Mweddelo waye onathukulela omahame.’

8. Yothoma baani nnahowelihu werana?

⁸ Ale enanvuruwana ‘muhiyana ali taduwa’ enohowela othoma akala eneere orumedha obe naari mwithanelo waye. Ni iyoya podi wera nnohowela werana yothoma emodhave. Motajhiha, nnere ddi akala muthu eere onixixa wihina nawerena mararuwo obe akala nenre ofwanya fotu dha mararuwo?

9-10. Dhithu baani dhinanithukulela warabela mararuwo?

⁹ Nihikanna dhithu dhowinjhiva dhinanithukulela warabela mararuwo. ‘Muhiyana ali taduwa’ anawoga egi: ‘Manjhe owiyiwa enothabwa othapila.’ ‘Manjhe owiyiwa’ enagiwana ddi? Bibiliya anoladdaniha ogonihana wa mulobwana ni muhiyana etelanne ninga mahinjhe oridha. (Pro. 5:15-18) Mulobwana ni muhiyana etelanne mowiwanana ni malamulo podi ogonihana yahoovile ethu. Mbwenye ‘Manjhe owiyiwa’ bohiyana. Podi wagiwanaga mararuwo. Athu enawerana mararuwo dila dhowinjhivadhene enowawipitiha athu amodha wihina yahinone, ndala ninga anerana mbava. Vano yubuwelaga wi kavo anaanone ndhe yeriliwana, manjhe ala owiyiwa podi okalaga ninga manjhe othabwa othapila. Wubuwela ndo, ethu yabure! Mwaha Yehova onowoona dhatedhene ni kayivo ethu yothapila. Teto oyelela wandana ninnihuna ni Yehova winothabwa owaawa. (1 Cor. 6:9, 10) Mbwenye kahi eyenove baahi.

¹⁰ Mararuwo podi wutotela manyazo obe wuthukulela wubuwela wi kunna thima. Ohiya eyo, podi otota wari wahifunaga ni podi ononga murala. Mwebaribareene ethu yapama onahoweliwe werana fuhirumedha mwithanelo wa muhiyana ola ali taduwa. Ohiya baahi okwa epaddi yomuzimuni obe neere, oyelela wandana ninnihuna ni Yehova, athu owinjhiva yawerana mararuwo ehivalihiwa oredda ofiyedha okwa. (Pro. 7:23, 26) Provérbios 9:18 onokuthula egi: ‘Ale enarumedha odhowa vaade vaye enafwanyeya mmahame.’ Akala yokumelela ya mwithanelo ya muhiyana ola ali taduwa bowopiha ndala, mwahaya bwaddi athu owinjhiva egarumedhaga? — Pro. 9:13-18.

11. Pornografiya oopihele ddi?

¹¹ Ethu peeno ethabwile ovuwa elabo yatene ni nnahowelihu orabela, fumoona pornografiya. Athu amodha enubuwela wihina kavili muladdu omoona pornografiya. Mbwenye ebaribariya sowihina, pornografiya onowutota makathamiho owinjhiva, podi omuthukulela muthu ohiiriha ni ohaariha athu amodha ni podi omunyowela muthu ofiyedha ohandaga omuhiya omoona. Muthu amala omoona pornografiya, enorusa oddiwala mowaguva dhithu ooniliye. Ohiya eyo, pornografiya kanamariha munigwa dhabure, mbwenye ohiya ovugula munigwa ndho, onothabwiha. (Col. 3:5; Tia. 1:14, 15) Bumwahaya athu owinjhiva enna elemelelo yoomoona pornografiya podi ofiyedha wawerana mararuwo.

12. Nnande addi orabela osugwa fotu dhinatatamula munigwa wamararuwo?

¹² Mukiristawu aneere ddi yakumelela fotu ya pornografiya mutelefonini obe mukomputadorini mwaaye? Kanididele osugwa. Enere okweya werana ndo nahiddiwala wihina ethu yathima mwigumini mwehu, fuwandana ninnihuna ni Yehova. Fotu dhimodha athuya podi ohukala madave, naarive dhigaali ndo, podi otatamula munigwa wamararuwo. Mwahaya bwaddi nigahowela orabela munyafotu dhendha? Mwaha kannafuna werana ethu-sithu yanithukulele wubuwela dhithu dhonyakavala obe wawerana mararuwo. (Mat. 5:28, 29) Namaholela mulogo dhaala anakala oTayilandiya, anithaniwa Davidi, ohuwoga egihina: “Miyo ginorajhiha wimela wihina guubuwele: ‘Naarive fotu ndha athuya ehili madave, Yehova anere ohagalala gadidela osugwa fotu ndha?’ Wubuwela ndala winogikavihera werana dhothoma dhapama.”

13. Ethu baani enanikavihera werana dhothoma dhapama?

¹³ Woova werana ethu yamukuule Yehova winere onikavihera werana dhothoma dhapama. Omoova Yehova “fumambelelo,” obe thinikoma “na thotho.” (Pro. 9:10) Eyo kinasitheya nilerigi versikulu dhobajha dha Provérbios kapitulu 9, vala nnafwanyihuvo wodhela “thotho dhebaribari” dhinamuladdaniha muhiyana mmodhaya.

ORUMEDHE DILA YA “MUHIYANA A THOTHO”

14. Konviti baani mmodha anafwanyeya va Provérbios 9:1-6?

¹⁴ Omwileri Provérbios 9:1-6. Vala nnonfwanyavo konviti a Yehova, ali mpaddusi ehu ni ntxela na thotho dhatedhene. (Pro. 2:6; Rom. 16:27) Versikulu ndha dhinawoga wodhela nyumba enlubale ni matxikwa obe abodho atanu nabiili. Nyumba ela enlubale, enonikavihera woonelamo wi Yehova Mulugu oovaha ni onowawakela athu aatene enafuna ohudhera woodhela oliye ni okala athotho.

15. Yehova anafuna wihina iyo nerege ddi?

¹⁵ Yolebela ya Provérbios enomuwoga muhiyana oovaha awegeredhe mathanga, anamwegeredha vinyu aye ompweha vameza. Muhiyana ola anatapulela thotho yeebaribari. Teto yotajhiha yaye enafwanyeya va Provérbios kapitulu 9 enowooniha wihina Yehova doovaha mwadhatedhene. (Pro. 9:2, nota.) Ohiya eyo, versu 4 ni 5: Enowawithana ale yahinna thotho yegihina: ‘Mudhe mujhe yoojha yaga.’ Mwahaya bwaddi nigahowela omurumedha konviti ola? Yehova anafuna wihina anaaye ekale athotho. Oliye anafuna anibarele ni kanafuna wihina iyo nihudhere dhithudha mwamakalelo oorusa. Mowindala egumihu yaatene kannakalegewo neddaga owukuwene, mubuwelo oninyemelaga mwaha wa ethu nerilihuna obe nubuwelaga dhithu dhabure nerilihuna. Bumwahaya ‘oliye onokoya thotho wihina aavahe athu owogowa.’ (Pro. 2:7) Namoovaga Yehova mwamakalelo apama, nnerege ofuna omuhagalasa. Teto nnere ovuruwana dholaga dhaye dha thotho ni nnere ohagalala mwaha oparihedha mabasa mwigumini mwehu. — Tia. 1:25.

16. Omoova Mulugu, wimukavihere addi Alayini werana yothoma ya thotho, ki yokumelelaya siivi?

¹⁶ Kubuwela makalelo omoova Mulugu wimukaviheriwa Alayini othoma ni thotho. Alayini ali namaholela mulogo ni ali purusori, anawoga egihina: “Akwaga owinjhiva yubuwela wihina vidiyu dha pornografiya dhohudhiha wodhela ogonihana.” Mbwenye Alayini ahinona wihina eyo kayali ebaribari. Oliye wenjhedhedha egi: “Woona wi miyo ginomudhivela ni ginomuriha Yehova, kagirumendhe woona vidiyu ndho newene dila modha. Ohiya eyo, miyo wawaddela akwaga ale mwahaya bwaddi miyo kagerena ethu ninga yeyo.” Alayini anna oparihedha mabasa dholaga dha “thotho dhebaribari,” ni anna odhowave ‘eeddaga dila yathotho.’ (Pro. 9:6) Mwaha wa yeyo, apurusori amodha enotikina vanlubale ni ehambela omuhudhera Bibiliya ni enowoona mutugumano.

17-18. Dhithu baani dhapama dhinaapadduwela ale enamurumedha konviti a “thotho yeebaribari,” ki mareeliho baani enawakeliwa osogolo? (Osugwe fotu.)

¹⁷ Yehova onolabihedha dhotajhiha dhahiyana ala abiili wihina anoonihe makalelo oofwanya ohagalala osogolo. Athu yaale enamurumedha konviti a “muhiyana ali taduwa,” enasayela dhohagalasa dhoothapila obe dhoviteya ninga mararuwo. Ethu enoniliiwa fujhavo mudhidhi enniwana yahubuwelaga makathamiho enafuna wafwanya osogolo. Yokumelelaya sowihina mweddelo oyo oneere wathukulela “mmahame.” — Pro. 9:13, 17, 18.

¹⁸ Mbwenye ale enamurumedha konviti a muhiyana athotho obe neere “thotho dhebaribari” yokumelelavoya sohiyana! Oliye onowawegeredhela mathanga athu awithanniye ni dhithu dhatedhene enahoweliwa wihina yandane ni Yehova. (Isa. 65:13) Wodhela namavuhulela Izayiya, Yehova ohuwoga egihina: ‘Mpwasedhe ogivuruwana, mujhe yoojha yapama, ndo munere olawiha dhoojha dhodhiva.’ (Isa. 55:1, 2) Iyo ninna ohudhera odhivela ele Yehova anadhiveliye ni widda ele aniddiye. (Sal. 97:10) Ni nnohagalala vanlubale wawithana athu amodha wihina edhe ehudhere ‘thotho dhebaribari.’ Enakala ninga neere ogwela mburo dhootama dhamusidadi wawithanaga athu negihina: ‘Nyu aatene oolodhowa mudhe wuno!’ Mareeliho ehu ni aale enamurumedha konviti ola, kahiyo a mudhidhi vang’ ono. Mareeliho ehu bamukalakala ni ononikavihera okalawo malabo amatene, ‘niharaga dila yathotho.’ — Pro. 9:3, 4, 6.

19. Mowiwanana ni Eclesiastes 12:13, 14, nikome wihina neere ddi? (Osugwe kwaduru “Mareeliho enakumelelavo mwaha womoova Mulugu.”)

¹⁹ Omwileri Eclesiastes 12:13, 14. Omoova Yehova winere obarela murima wehu ni winere onikavihera odhowagave nigaali oweela epaddi yomwiilini ni yomuzimuni malabo yaala ookuthula. Kabeni nawithane athu owinjhiva wihina ehudhere wodhela “thotho yeebaribari.” Nnere werana eyo wodhela omoova Yehova mwamakalelo apama ni nnomudhivela ni murimihu wamutene.