OHUDHERA 7
JHIBO 15 Ninvuwihe Mwana a Yehova!
Olevelela weebaribari wa Yehova winatapulela ddi mwigumini mwawo?
‘Olevelela weebaribari oli nyu.’ — SAL. 130:4.
DHITHU NNAAHUDHERIHU
Nnere woona dholaddaniha Bibiliya analabihedhiye wodhela muselu wolevelela, ni makalelo dholaddaniha ndha dhinanikaviheriwa wenjhedhedha otamalela wehu wodhela olevelela weebaribari wa Yehova.
1. Mwahaya bwaddi enorusa wonelamo muthu awoga wi ohulevelela?
“MIYO gihulevelela.” Sapama omwiwa muthu aniwogelaga madhu ninga ala, thabwa-thabwa akala niherana obe nihiwoga ethu emutakalele muthuya. Mbwenye madhu ala enatapulela ddi? Nerege muthuya anafuna awoge wi nivanove oli mukwaye a vamurimani? Obe anafuna awoge wihina kanafuna odidela owoga wodhela muselu ole, teto wandana weenyu kunahogolowele okala mmodhave ninga omambelelowene? Ebaribariya sowihina muthu awoga wihina gihulevelela, podi okala yorusa wonelamo ethu anafuniye owoga. Mwaha kadda muthu ohukanna monelo waye wodhela muselu ola wolevelela.
2. Bibiliya anawoga di wodhela makalelo Yehova analeveleliye? (Osugwe nota.)
2 Makalelo Yehova ananileveleliye, ehihiyana ni makalelo iyo nnalevelelihu athu amodha yanithegela. Kaavo ananda olevelela ninga Yehova ananileveleliye. Salmista dhaala ahiwoga wodhela makalelo oolevelela a Yehova egi: ‘Olevelela weebaribari oli nyu wihina muvuwihiwege.’a (Sal. 130:4) Ebaribariya sowihina, makalelo oolevelela a Yehova ‘beebaribari.’ Oliye baahi dinonne olevelela mowakwanela. Alobwana emulebile Bibiliya, ehalabihedha madhu owi olevelela ni ebarayiku, enahiyana ni makalelo oolevela aathu.
3. Mwahaya bwaddi makalelo oolevelela a Yehova, ehihiyana ni makalelo iyo nnalevelelihu athu amodha yanithegela? (Isaías 55:6, 7)
3 Yehova amulevelela muthu, oliye anothimiha mowakwanela yothegaya. Ni makalelo yaala, muthuya podi ohogolowela okanna wandana woliba ni Yehova. Iyo nnothabwa omutamalela Yehova mwaha onilevelela ni makalelo yaala. — Omwileri Isaías 55:6, 7.
4. Ddiniyani Yehova analabihedhiye wihina anikavihere wonelamo olevelela webaribari?
4 Akala olevelela wa Yehova ohuhiyana ni makalelo ehu oolevelela, nnande aavi wonelamo makalelo Yehova analeveleliye, woona wihina iyo nili athu ohulogomana? Yehova anolabihedha dholaddaniha dhohiyana-hiyana wihina anikavihere wonelamo makalelo ananileveleliye. Ohudhera wula, nnere woona dholaddaniha ngasi-ngasi Yehova analabihedhiye. Dholaddaniha ndha, dhinere onikavihera wonelamo makalelo Yehova anathimihiye dhothega dhehu ni makalelo wandana wehu onahogoloweliwa okala wooliba ninga omambelelowene nihinathi omuthegela. Ohudhera dholaddaniha ndha, winere wenjhedhedha otamalela wehu ni odhivela ninnihuna ni Yehova, ali Babi apama ni athagaraga.
YEHOVA ANOTHUKULELA WOLAPELA DHOTHEGA DHEHU
5. Ddiniyani Yehova aneriyena dhothega dhehu, ki iyo nnakala aavi?
5 Malabo mamodha Bibiliya anoladdaniha dhothega ni mutholo wonyemela. Motajhiha mwene Davidi ahiwoga wodhela dhothega dhaye egi: ‘Dhothega dhaaga dhinoginyemela vamusoloni vaaga ninga mutholo wonyemela gihinandimi othukula.’ (Sal. 38:4) Mbwenye Yehova anolevelela dhothega dha athu enathwaruwa. (Sal. 25:18; 32:5) Madhu owi “olevelela” ni Ebarayiko enatapulela “ovenyiha” obe “othukula.” Iyo podi omubuwela Yehova ninga mulobwana akopolo dhinlubale, anathukula dhothega dhehu dhinaligana ni mutholo wonyemela ni orahilela wolapela.
‘Muhulevelela’ (Sal. 32:5)
6. Yoladdaniha baani enooniha wi Yehova anorahilela wolapela dhothega dhehu?
6 Bibiliya anowoga nladdaniho nimodha nnoniha wi Yehova anothukulela wolapela dhothega dhehu. Yolebela ya Salmo 103:12 enihina: ‘Ndo ninga omadhelo nduwa ni omayelo nduwa wilapeliwana, oliye anohiya woolapela dhothega dhehu.’ Omadhelo nduwa ni omayelo nduwa kawindha wigumanaga. Mwaha mudhidhi ni mburo winakuma nduwa, wihiyana vanlubale ni mudhidhi ni mburo nnamothelamo nduwa. Ni madhu mamodha, yolebela ela enafuna ewoge wihina Yehova anothukulela dhothega dhehu mburo wothabwa olapa nahinandihu ofiyawo. Yoladdaniha ela enowoniha wihina Yehova anonilevela ni murima waye waatene. Teto onona eyo, enonikurumusa vanlubale!
‘Ndo ninga omadhelo nduwa ni omayelo nduwa wilapeliwana’ (Sal. 103:12)
7. Mowiwanana ni Miqueias 7:18, 19, Yehova anavokedha wuuvi dhothega dhehu?
7 Akala Yehova anothukulela dhothega dhehu wolapela, nerege eyo enatapulela wi oliye anodidela wubuwela dhothega dhehu? Naari. Kasugwa ethu mwene Ezekiya alebiliye wodhela Yehova egihina: ‘Muhuvokedha dhothega dhaaga dhatedhene mundduli mwenyu.’ Obe ninga nnawogela nota, ‘nyu muhuvenyihavo dhothega dhaaga dhatedhene vamentoni venyu.’ (Isa. 38:9, 17; nota.) Madhu ala enowoniha wihina Yehova anovokedha wolapela dhothega dha muthu athwaruwile ni kanahogolowela wubuwela ethu eriliyena. Madhu aasorihile mwene Ezekiya, podi otapuleliwa ayi: ‘Nyu muhurimeliha dhothega dhaaga vano okalaga ninga kaginuthegelegeni.’ Bibiliya anowogave wodhela muselu ola wolevelela alabihedhaga yoladdaniha emodhaya enafwanyeya va Miqueias 7:18, 19. (Omwileri.) Yolebela ela enihina Yehova anovokedha dhothega dhehu mburo wooddiha wa niya. Kale ethu-sithu yamorela mburo wooddiha muniya, yorusa vanlubale ofwanya ethuya.
‘Muhuvokedha dhothega dhaaga dhatedhene mundduli mwenyu’ (Isa. 38:17)
‘Anere ovokedha dhotega dhehu dhatedhene mburo wooddiha muniya.’ (Miq. 7:19)
8. Dholaddaniha ndha dhinanihudhiha ddi?
8 Dholaddaniha ndha, dhinonihudhiha wihina Yehova anilevelela dhothega dhehu, anonirula mutholo onaninyemela mwaha werana yothega. Enoligana ni madhu aawogile Davidi egi: “Oohagalala baathu yaale yenrena dhithu dhabure enoleveleliwa, teto dhothega dhewa dhibibiddeliwe; oohagalala di muthu yole Yehova ahinubuweliye dhothega dhaye.” (Rom. 4:7, 8) Mohanganyedha wula olevelela webaribari!
YEHOVA ANOTHIMIHA DHOTHEGA DHEHU
9. Yoladdaniha baani Bibiliya anawogiye enanikavihera wonelamo makalelo Yehova ananileveleliye mowakwanela?
9 Yehova anolabihedha yoladdaniha emodha wihina anikavihere othabwa ovaha thima mukutho wa Yesu. Oliye anosuwa obe anothimiha dhothega dha muthu athwaruwile ni murima waye waatene. Bibiliya anawoga wihina enakala ninga Yehova anosuwa ni anofufutha dhothega. Eyo enoweriha wi muthuya erilena yothega ahogolowele okala oweela. (Sal. 51:7; Isa. 4:4; Jer. 33:8) Teto mwinnyene Yehova anowoga makalelo aneriyena eyo, egi: ‘Naari dhothega dhenyu dhikale dhofiila, dhinere otxenihiwa ninga funga. Naari dhothega dhenyu dhigaali toro ninga esala yoofila dhinere okala ninga osalu wotxena.’ (Isa. 1:18) Kahi ethu yokweya ovenyihavo musuzu woofila wa thimathi wamorela guwo yotxena. Bumwahaya Yehova adhe alabihedhege yoladdaniha ela wihina onihe wi dhothega dhehu podi othimihiwa ofiyedha iyo okala oweela, ekalaga ninga kannamuthegelege Yehova.
‘Naari dhothega dhenyu dhikale dhofiila, dhinere otxenihiwa ninga funga’ (Isa. 1:18)
10. Makalelo oolevelela a Yehova enooniha aavi odhivela waye?
10 Ninga noonilihu ohudhera ovirile, dhothega dhehu dhinoliganihiwa ni “mangawu.” (Mat. 6:12; Luk. 11:4) Bumwahaya kadda labo nnamuthegelihu Yehova enakala ninga mangawu ehu ennawenjhedhedheya. Mangawu ehu ehithabwa winjhiva, mbwenye Yehova anilevelela enakala ninga ohulevelela mangawu ninnihuna. Oliye kananikukusa oliva mangawu obe dhothega anilevelenliye. Ndala ninga muthu anahagalaliye mwaha oleveleliwa mangawu aye, nihiyoya nnohagalala vanlubale, Yehova alevelela dhothega dhehu!
“Nleveleleni dhothega dhehu” (Mat. 6:12)
11. Bibiliya awogaga wi dhotega dhenyu dhihileveleliwa, eyo enatapulela ddi? (Dhowera dharumiwi 3:19)
11 Yehova kanaalevelela mangawu ehu obe dhothega dhehu baahi, ohiya eyo, oliye anothimiha dhothega dhatedhene mohihiyedhedha. (Omwileri Dhowera Dhaarumiwi 3:19.) Muthu athoma walevelela mangawu ehu, iyo podi omubuwela oliye akweretaga ni kaneta mangawu ehu alebiliye mukadernuni, mbwenye naarive dhigaali ndo, manumero a mangawu ale nivanove enowoneya. Mbwenye othimiha ethu ehihiyana vanlubale ni okwereta. Wihina nande wonelamo ohiyana wula, nnohowela wubuwela tinta yalabihedhiwa mudhidhi wa kale. Motajhiha, tinta yalabihedhiwa kale yaali yokweya othimiha, mwaha yasasanyiwa ni karbonu, goma ni manjhe. Ni makalelo yala muthu aleba ethu-sithu ni tinta ela, yakala yokweya othimiha ethuya. Bumwahaya mangawu yalebiwe ni tinta yela ‘yathimihiwa,’ manumeroya enoorimela ofiyedha okala ninga kavinalebiwege ethu. Iyo nnomutamalela vanlubale Yehova, mwaha onona wi oliye aafunaga onlevelela kanokweretha baahi dhothega dhehu, mbwenye anoothimiha ofiyedha okalaga ninga kannamuthegelege! — Sal. 51:9.
“Wihina dhothega dhenyu dhileveleliwe” (Dho. 3:19)
12. Yoladdaniha ya murabo munlubale enatapulela ddi?
12 Yehova anolabihedha yoladdaniha emodha wihina anikavihere wonelamo makalelo anathimihiye dhothega dhehu. Oliye anawoga egi: ‘Ginere othimiha dhoviriganiha dhenyu ndala ninga murabo onakunela odhulu ni ginere okunela dhothega dhenyu ndala ninga ni murabo wooriba onakunela odhulu.’ (Isa. 44:22) Bumwahaya Yehova anilevelela, enakala ninga anakunela dhothega dhehu ni murabo munlubale wihina muthu di muthu ahoone.
‘Ginere othimiha dhoviriganiha dhenyu ndala ninga murabo onakunela odhulu’ (Isa. 44:22)
13. Ddiniyani nihinahowelihu odidela werana Yehova alevelela dhothega dhehu?
13 Dholaddaniha ndha dhinanihudhiha ddi? Yehova alevelela dhothega dhehu, kannahowela odidela wivaha nibili egumi yehu yaatene. Mwaha mukutho wa Yesu ohuthimiha dhothega dhehu dhatedhene nerilihuna kale. Teto enakala ninga kanneregena dhothegadha. Yehova baahi dinanilevelela mowakwanela nathwaruwa ni murima wehu waatene.
YEHOVA ANONIRUMEDHA DILA BIILI NINGA AKWAYE NAARIVE NIGAMUTHEGELE
Makalelo Yehova ananileveleliye enonithukulela okanna wandana wapama nuliye (Osugwe ddima 14)
14. Ddiniyani enanithukulela ororomela wi Yehova anonilevelela ni murima waye waatene? (Osugwe fotu.)
14 Yehova anilevelela dhothega dhehu mowakwanela, iyo podi okanna ebaribari wi enowandeya ohogolowela okanna wandana nannihuna nuliye. Onona eyo enonikavihera ohithabwaga wivaha nibili. Teto kannahowela woova, nubuwelaga wi Yehova ohunikoyela ntxiga ni anajheha mudhidhi wofwanelela wi anisinyuse. Mwaha kawo ethu enanthukulela wubuwela wi Yehova podi werana ethu ninga yela. Ddiniyani enanithukulela ororomela wi Yehova anonilevelela ni murima waye waatene? Ethu enaniroromeliha si ele amwaddenliye namavuhulela Jeremiya egi: ‘Ginere olevelela dhoviriganiha dhewa ni kaginadha gihogolowelaga wubuwela dhothega dhewa.’ (Jer. 31:34) Teto murumiwi Pawulo ohalabihedha madhu ooligana nuwoga egi: ‘Kaginadha gihogolowelaga wubuwela dhothega dhewa.’ (Ebe. 8:12) Madhu ala enatapulela ddi?
‘Kaginadha gihogolowelaga wubuwela dhotega dhewa’ (Jer. 31:34)
15. Ni makalelo baani Yehova kanadidela wubuwela dhothega dhehu?
15 MBibiliyani madhu owi ‘wubuwela’ kinatapulela baahi wubuwela ethu epadduwile kale. Ohiya eyo, podi otapulela werana ethu-sithu obe ohidduwala. Mpanga aakomeliwe vamodha ni Yesu ahiloba egi: “Yesu, onagidduwale wavolowa mumweneni mwawo.” (Luk. 23:42, 43) Mulobwana ole kamuloba Yesu wi amubuwelege baahi, mwaha yowakula Yesu anvahiliye enowoniha wi oliye eere werana ethu-sithu wi amukavihere mulobwana ole, obe nere, eere onvenyiha muukwani. Bumwahaya Yehova awoga wi kanubuwela dhothega dhehu, eyo enatapulela wi oliye kananisinyuse mwaha dhothega amanliye olevelela.
16. Nladdaniho baani nnanikavihera wonelamo makalelo nnakalihu, Yehova anilevelela mowakwanela?
16 Bibiliya anolabihedha yoladdaniha emodha enanikavihera wonelamo makalelo nnakalihu Yehova anilevelela mowakwanela. Iyo naali ninga “adhaari a yothega.” Mbwenye mwaha Yehova onilevelela, iyo nili ninga adhaari “yoboliwe muuthegani.” (Rom. 6:17, 18; Ovuhu. 1:5) Olevelela wa Yehova ononobola muuthegani, teto woboliwa wula, winonihagalasa vanlubale.
“Muhooboliwa muuthegani” (Rom. 6:18)
17. Nimakalelo baani oleveleliwa onaliganiwa ni ovulumusiwa? (Isaías 53:5)
17 Omwileri Isaías 53:5. Yoladdaniha yogomihedha nnafunihu woona, enoniliganiha ni muthu anna oredda ohunna murombwe. Mbwenye mwaha wa mukutho wa Yesu, enakala ninga iyo nihivulumusiwa mwaha oredda nannihuna. (1 Ped. 2:24) Ndala ninga muthu anahagalaliye vanlubale mwaha ovulumusiwa, nihiyoya nnohagalala vanlubale mwaha oleveleliwa dhothega dhehu ni ohogolowela okanna wandana wapama ni Babihu Yehova. Dhatedhene ndha dhinandeya mwaha wa yowobola.
‘Mwaha wa makwadda aye nihivulumusiwa’ (Isa. 53:5)
OLEVELELA WA YEHOVA ONAPATHA AAVI EGUMI YEHU?
18. Ddiniyani nihudherihu ni dholaddaniha dhinafwanyeya mBibiliyani dhinooniha makalelo Yehova analeveleliye? (Osugwe kwaduru enna musolo “Makalelo Yehova ananileveleliye.”)
18 Ddiniyani nihudherihu ni dholaddaniha dhinafwanyeya mBibiliyani dhinooniha makalelo Yehova analeveleliye? Nihudhera wi Yehova alevelela dhothega dhehu, oliye anoothimiha ofiyedha okala ninga kannamuthegelege, teto oliye kanadha anisinyusa mwaha wa dhothega anileveleliye. Mwaha wa yeyo enowandeya okanna wandana wapama ni Babihu oodhulu, Yehova. Ohiya eyo oleveleliwa webaribari mukono munlubale Yehova ananivahiye. Ni yowoniha wa odhivela winlubale ni opama wohinifwanelela anniyena ni athu aatene ohulogomana. Teto iyo nihinona wi kannafwanelela dhithu dhatedhene ndha Yehova ananereliye. — Rom. 3:24.
19. a) Ddiniyani nnahowelihu otamalela? (Romanu 4:8) b) Ohudhera onaharela nnakule nikoho baani?
19 Omwileri Romanu 4:8. Iyo nnotamalela vanlubale mwaha Yehova ‘onilevelela nibaribari,’ obe mowakwanela. (Sal. 130:4) Mbwenye nafunaga wi Yehova anilevelele, nnohowela werana ethu yathima. Yesu ohuwoga ethuya egi: “Mwahalevelelaga athu amodha dhothega dhewa, Babinyu kanuleveleleni dhothega dhenyu.” (Mat. 6:14, 15) Ela enowoniha pamadhene wi sathima omutajhiha Babihu Yehova wodhela walevela athu amodha. Mbwenye nnande aavi walevelela athu amodha? Ohudhera onaharela nnere woona yowakula ya nikoho nna.
JHIBO 46 Yehova iyo nnotamalela
a Yolebela ela ni Ebarayiko enowalabihedha madhu owi ‘olevelela.’ Ela enowoniha wihina wula olevelela webaribari wiliwo naarive egaliwo makalelo mamodha oolevelela. Anamatapulela owinjhiva a Bibiliya enowalupa madhu ala athima, mbwenye Tradução do Novo Mundo da Bíblia Sagrada kanalupa madhu ala athima mudhidhdi yatapulelaga yolebela ya Salmo 130:4.