Okanne ebaribari wi Yehova ohulevelela

1-2. Muthu athwaruwile ni murima waye waatene, anohowela akalege aavi? (Osugwe fotu yavakapani.)

MWENE Davidi ahinona yotapulela yowivaha nibili mwaha wa dhothega nerilihuna kale. (Sal. 40:12; 51:3, osugwe mwana musolo ya yolebela ela) Mwaha oliye aherana dhothega dhinlubale mwigumini mwaaye. Mbwenye oliye nuthwaruwa ni murima waye waatene, Yehova omulevelela. (2 Sam. 12:13) Yokumelelavoya, Davidi ahonelamo ohagalala winadha mwaha oleveleliwa ni Yehova. — Sal. 32:1.

² Ndala ninga Davidi, iyo podi ohagalala mwaha oleveleliwa ni Yehova. Sohagalasa onona wihina Yehova onolevelela dhothega dhehu, naarive dhigaali dhinlubale, mbwenye nathwaruwa ni murima wehu waamutene, nawoga dhothega ni niilibihedha oherana dhothega dhimodhave! (Pro. 28:13; Dho. 26:20; 1 Juwa. 1:9) Teto solibiha onona wihina Yehova alevelela yothega yehu, enakala ninga kanneregena yothegaya! — Eze. 33:16.

3-4. Murogola dhaala aali aavi numala obaddiziwa, ki ohudhera wula nnoone ddi?

³ Malabo mamodha, podi okala yorusa orumedha wi Yehova onoolevelela dhothega dhehu. Kasugwa yopadduwa ya Jennifer. Oliye aleliwe mwibaribarini, mbwenye agaali namwali ahithukula mweddelo wonyakavala ni owisinjhedha okalaga ninga kanerana ethu yabure, wula eeragana. Nuuvira yakadhene, oliye omuhogolowela Yehova ni obaddiziwa. Oliye onowoga eegi: “Kale, godhiveliwa vanlubale dhithu dhomwilini, wawerana mararuwo, ong’wa ni onyanyuwa bure-bure. Gahinona wihina gahere githwaruwa ni murima waaga waatene, Yehova eere olabihedha mukutho wa Yesu Kiristu wihina agilevelele. Mbwenye mmurimani mwaaga kaganda orumedha wihina Yehova ohugilevelela.”

⁴ Malabo mamodha enowurusa orumedha wihina Yehova ohulevelela dhothega weriliwena kale? Yehova anafuna wi nikanne ebaribari emodhave aanna Davidi yowihina nathwaruwa ni murima waatene, oliye anere onilevelela. Ohudhera wula, nnere woona mwahaya bwaddi nigahowela orumedha wi Yehova onoolevelela dhothega dhehu ni ethu enaanikavihere okanna ebaribari ela.

MWAHAYA BWADDI NIGAHOWELA OKANNA EBARIBARI WI YEHOVA OHUNILEVELELA?

5. Ddiniyani Saddana anafuniye wihina nirumedhege? Owoge yotajhiha.

⁵ Okanna ebaribari wihina Yehova ohunilevelela podi onikavihera ohumorela mmurakoni dha Saddana. Kudduwale wi Saddana anere werana dhaatedhene wihina anihihe omulabela Yehova. Wihina aakwanihedhe yoluba yaye, Saddana podi onthukulela orumedha wihina dhotheega dhehu kadhinadha dhileveleliwa. Kasugwa yopadduwa ya mulobwana dhaala ooKorintuyu aakumihiwe mmulogoni mwaha wawerana mararuwo. (1 Kor. 5:1, 5, 13) Mulobwana ole nuthwaruwa, Saddana afuna wi addibila mmulogoni emweddihege mwamakalelo abure, ofiyedha addibila ohufunaga omwaakela mulobwana ole mmulogoni. Mudhidhi mmodhave, Saddana ofunaga wihina mulobwana ole iwonege ninga kafwanelela oleveleliwa ni wihina “ukuwe vanlubale” ofiyedha oliye ofunaga ohiya omulabela Yehova. Peeno Saddana kasaddunle efunelo yaye ni makalelo owerana dhithudha. Mbwenye “nihinona murako dhaye.”—2 Kor. 2:5-11.

6. Nnande aavi okanna ohagalala akala nnowivaha nibili mwaha wa dhothega dhehu dhakale?

⁶ Okanna ebaribari wi Yehova ohulevelela dhothega dhehu, podi onikavihera okala athu ohagalala ni ohivahaga nibili mwaha wa dhothega dhehu dhakale. Nerana yothega, iyo nnowivaha nibili. (Sal. 51:17) Eyo ethu yapama. Mwaha mubuwelo wehu podi onthukulela werana dhithu dhapama wihina niwomihedhe muladduya. (2 Kor. 7:10, 11) Mbwenye, naathabwaga wivaha nibili mwaha wa yothega nlobilihu wihina nleveleliwe, eyo podi onthukulela ohiya omulabela Yehova. Vano narumedha wihina Yehova ohulevelela dhothega dhehu, podi onikavihera odduwala yothegaya. Nerana ndala, nnere wanda omulabela Yehova ninga munafuneliye, ni mubuwelo wapama vamodha ni ohagalala. (Kol. 1:10, 11; 2 Tim. 1:3) Mbwenye nnande aavi orumedha mmurimani mwehu wihina Mulugu ohulevelela dhothega dhehu?

DDINIYANI ENAANIKAVIHERE OKANNA EBARIBARI WIHINA YEHOVA OHUNILEVELELA?

7-8. Yehova aawogile ddi ni Moyizeji wodhela oliye, ki eyo enanivaha ebaribari baani? (Êxodo 34:6, 7)

⁷ Wubuwelege makalelo Yehova anawogiye wodhela oliyeene. Kubuwela ethu aawogiliye va mwangoni wo Sinayi.a (Mmwileri Êxodo 34:6, 7.) Wodhela dhithu dhaatedhene Yehova ahoweliye owoga, oliye othoma owoga wodhela dhikalelo dhaye ni makalelo owerana dhithudha. Ninga motajhiha, othoma owoga wi oliye ‘Mulugu a athagaraga ni a nthebwa.’ Nerege Mulugu oolevelela ninga yola eere omukodda mudhaari aye athwaruwile ni murima waamutene? Naari! Ala kiyakale makalelo owooniha thagaraga mwaha iyo nihinona wihina Yehova kanadha eeragana ethu ninga yela.

⁸ Iyo podi okanna ebaribari wihina Yehova aawogaga wi Mulugu a thagaraga, anawoga ebaribari mwaha oliye kanoota. (Sal. 31:5) Bumwahaya iyo podi ororomela dhithu dhaatedhene anawogiye. Akala enowurusa oddiwala dhothega dhawo dha kale, wikohe: ‘Ginorumedha mwebaribarene wihina Yehova dathagaraga ni oohaguva onyanyuwa ni kanakoodda olevelela yothega yaale enathwaruwa? Akala ginorumedha kaginafwanelela orumedha wi oliye ohugilevelala?’

9. Ddiniyani enatapulela oleveleliwa dhothega dhehu? (Salmo 32:5)

⁹ Wubuwele dhithu Yehova aavetheliye anamaleba Bibiliya wihina elebe wodhela olevelela. Kubuwela makalelo namaleba Bibiliya, Davidi, alebiliye wodhela olevelela wa Yehova. (Mmwileri Salmo 32:5.) Mwene Davidi ohuleba eegi: “Nyu muhulevelela dhoviriganiha ni dhothega dhaaga.” Ni Ebarayiku madhu owi “olevelela” podi otapulela “ovenyiha,” “ovenyihavo ethu mburoni vaaliiwa,” obe “othukulavo.” Yehova numulevelela Davidi yakala ninga eere othukula dhothega dhaye odhowana mburo mmodha. Mwaha wa yeyo, Davidi ahikanna ohagalala mwaha orula mutholo munlubale wowivaha nibili mwaha wa dhothega dhaye. (Sal. 32:2-4) Nihiyoya podi ohagalala mwaha Yehova othukula dhothega dhehu. Nathwaruwa ni murima waatene, kannahowela odidela wivaha nibili mwaha wa yothega Yehova athukunliye.

10-11. Madhu owi ‘onowaguva olevelela’ enanihudhiha ddi wodhela Yehova? (Salmo 86:5)

¹⁰ Mmwileri Salmo 86:5. Va yolebela ela, Davidi anowoga wi Yehova ‘onowaguva olevelela.’ Niwogaga wodhela madhu ala, livuru dhaala na referensiya, nnowoga wodhela Yehova neegi: “[Oliye] ‘namalevelela,’ teto eyo ‘sikalelo yaye.’” Mwahaya bwaddi olevelela ekala ekalelo ya Yehova? Epaddi yoharela ya versu ela enihina: ‘Munowawooniha odhivela ohunamala athu aatene enuvedani.’ Ninga nonilihu ohudhera wivirile, odhivela wohimala wa Yehova, winomuthukulela wadhivela adhaari aye oororomeleya ni mukalakala. Mwaha wa odhivela waye ohunamala, Yehova ‘onowalevelela mohuhiyedhedha’ aatene yaale enathwaruwa ni murima waamutene. (Isa. 55:7) Akala enowurusa orumedha wi Yehova ohulevelela dhothega dhawo, wikohe: ‘Ginorumedha wihina Yehova anolevelela dhothega dhaathu enunlela weddihiwa ni thagaraga? Akala ginorumedha, kaginahowela orumedha wihina Yehova ohugilevelela mudhidhi gunlelimi weddihiwa ni thagaraga?’

¹¹ Iyo podi ohuthabwaga wivahaga nibili, nanona wihina Yehova onowonelamo ekalelo yehu yohilogomana. (Sal. 139:1, 2) Eyo enowoneleyamo namwilerigi Salmo aatene amulenbe Davidi. Dholebela ndha dhinonikavihera okanna ebaribari wi Yehova ohunilevelela.

ETHU BAANI YEHOVA AHINADDUWALE WODHELA IYO

12-13. Mowiwanana ni yolebela ya Salmo 103:14, ddiniyani Yehova anubuweliye wodhela iyo, ki eyo enamuthukulela Yehova onerela ddi?

¹² Mmwileri Salmo 103:14. Davidi onowoga wi Yehova ‘onowubuwela wi nili nthubi.’ Ni madhu ala, Davidi onowoga ethu enamuthukulela Yehova omulevelela muthu ni murima waye waamutene. Oliye kanadduwala wi nili athu ohulogomana. Wihina nande wonelamo muselu ola, kabeni naapwasedhe madhu aasorihile mwene Davidi.

¹³ Davidi owoga wi Yehova ‘ohunona pamadhene makalelo nipaddusiwihu.’ Yehova ampadduse Adawu ‘alabihedhaga nthubi,’ teto oliye ohunona dhithu athu aatene enahoweliwa wihina ekalewo. Ninga motajhiha, iyo nnohowela dhoojha, ogona ni ovuma. (Gén. 2:7) Mbwenye Adawu ni Eva nuuthoma omurugunuwela Yehova wodhela werana yothega, okala nthubi yovolowelavo ethu emodhaya. Woona wi nili ahima a Adawu ni Eva, nihivala yothega enanthukulela werana dhithu dhabure. Teto Yehova ohunona wi nili athu ohulogomana. Bumwahaya, mwene Davidi adhe awogege wi Yehova ‘kanadduwala’ wi nili athu oothega. Ni Ebarayiku madhu elabihedhiwe vala, enodhana mubuwelo wa ethu yapama. Iyo podi watapulela madhu aasorihile Davidi nimakalelo ala: Yehova anowonelamo wi malabo mamodha nnaviriganiha nahifunaga. Mwaha wa yeyo, Yehova onothoma oneeddiha ni thagaraga anoona wi nihithwaruwa ni murima wehu waatene. — Sal. 78:38, 39.

14. a) Davidi awogile ddi wodhela makalelo Yehova analeveleliye? (Salmo 103:12) b) Nnahudhera ddi ni makalelo Yehova amuleveleliye Davidi? (Osugwe kwaduru “Nimakalelo baani Yehova analeveleliye ni anadduwaliye dhothega dhehu?”)

¹⁴ Olevelela wa Yehova wunnuwile nimakalelo baani? (Mmwileri Salmo 103:12.) Davidi ohuwoga wi Yehova alevelela dhothega dhehu, anohiya wolapela ndala ‘ninga wilapeliwa omadhelo nduwa ni omayelo nduwa.’ Ni madhu mamodha, omadhelo nduwa ni omayelo nduwa wihithabwa olapelana mwamakalelo nahinandihu wubuwela; teto kawinadha wigumanaga. Eyo enanihudhiha ddi wodhela dhothega Yehova analeveleliye? Livuru dhaala na referensiya nnowoga wihina Yehova athukula yothega yehu, ekalaga ninga anathukulela wolapela ofiyedha iyo ohoonaga onukwa wa yothegaya, obe ethu-siithu yanthukulele wubuwela yothegaya. Kubuwela makalelo onona eyo eliwa yohagalasa. Onukwela wa perfume podi onthukulela wubuwela ethu-siithu. Mbwenye Yehova anilevelela enakala ninga kinahalavo ethu-sithu yanthukulele wubuwela yothega yehu ni wivaha nibili. — Eze. 18:21, 22; Dho. 3:19.

15. Ddiniyani nnahowelihu werana naathabwaga wivaha nibili mwaha wa yothega yehu yakale?

¹⁵ Nimakalelo baani madhu a Davidi enafwanyeya va Salmo 103 enanikaviheriwa okanna ebaribari wi Yehova ohunilevelela? Naathabwaga wivaha nibili mwaha wa yothega yehu yakale, iyo podi wikoha: ‘Gerege ginna oddiwala ele Yehova anubuweliye, wi nili ohilogomana ni wihina Yehova onowalevelela ale enathwaruwa ni murima wewa waatene ninga miyo? Ginowubuwela ele Yehova athomiliye oddiwala, eli yothega aleveleliye ni ahinadhiye alabihedha wihina agitorihena osogolo?’ Yehova kanapwasedha osugwa dhothega dhehu dhakale amanliye olevelela. Nihiyoya nnohowela werana eyo. (Sal. 130:3) Nakanna ebaribari wi Yehova ohunilevelela, iyo podi ohiya wivaha nibili, mwaha wa dhothega nerilihuna kale ni dhinaakumelele osogolo.

16. Owoge yoladdaniha enoniha wihina sowopiha wivaha nibili mwaha dhothega dhakale. (Osugwe fotu.)

¹⁶ Kasugwa yoladdaniha ela. Odidela wivaha nibili mwaha wa yothega nerilihuna kale, enaligana ni weddiha karo wula nisugwaga espelyu enooniha dhithu dhili mundduli. Malabo mamodha sapama osugwa espelyu nna nnooniha dhithu dhili mundduli. Mwaha nnonikavihera orabela dhithu dhinadha mundduli mwehu. Mbwenye wihina needdihe nubareleya, sapama opwasedha osugwa osogolo nnayihu. Nimakalelo mamodhave, malabo mamodha sapama wubuwela dhothega dhehu dhakale, mwaha iyo podi ohudhera dhithu dhowinjhiva ni ohuhogolowela werana ethu emodhave. Mbwenye nadidela wivaha nibili mwaha dhothega nerilihuna kale, podi ohanda wawenjhedhedha mabasa nnamparelihu Yehova. Ohiya eyo, nnohowela osugwa osogolo mwaha nnedda dila enanthukulela waakela egumi yohimala, Mulugu anipaganyiliye mwilaboni exa. Wengo ‘dhego dhamundduli dhahinadhiwa dhubuweliwaga dila biili.’ — Isa. 65:17; Pro. 4:25.

ODIDELE ORUMEDHA MMWURIMANI MWAWO WI YEHOVA OHULEVELELA

17. Mwahaya bwaddi nigahowela orumedha mmurimani mwehu wi Yehova ononidhivela ni ohunilevelela?

¹⁷ Nnohowela odidela orumedha mmurimani mwehu wi Yehova ononidhivela ni ohunilevelela. (1 Juwa. 3:19) Mwahaya bwaddi? Mwaha Saddana kanadha aseelela onthukulela wubuwela wi Yehova kananidhivela ni kaninna thima. Naarive ilibihedhaga werana ethu-sithu, yoluba yaye funthukulela ohiya omulabela Yehova. Iyo podi okanna ebaribari wi Saddana anna wilibihedha wihina anikwerebeyihe mwaha ohunona wi ahanlena mudhidhi mung’ono. (Ovuhu. 12:12) Mbwenye kanihiye wi oliye anigonjhihe!

18. Ddiniyani onahoweliwe werana wihina olibihe nroromelo onniwena wi Yehova onowudhivela ni ohulevelela?

¹⁸ Wihina olibihe nroromelo onniwena wi Yehova onowudhivela ni ohulevelela, oparihedhege mabasa dhithu woniliwe ohudhera wivirile. Wihina okanne ebaribari wi Yehova ohulevelela dhothega dhawo dha kale, wubuwele makalelo Yehova anawogiye wodhela oliye. Ohiya eyo, openddege dhithu aavetheliye anamaleba Bibiliya, oleba wodhela makalelo aaye oolevelela. Teto kuddiwale wi Yehova ohunona wi oli muthu ohulogomana ni anowuweddiha ni thagaraga. Teto kuddiwale wi Yehova amulevelela muthu oliye anoddiwala dhaatedhene. Ndala ninga Davidi aroromeliye thagaraga dha Yehova ni weya onere owoga wegi: ‘Ginowutamalelani nyu Yehova mwaha olevelela dhotheega dhaaga!’ — Sal. 32:5.