Otajhihe makalelo owubuwela a Yehova ni a Yesu

1-2. Ddiniyani enavolowelavo omudhivela Yehova, ki Yesu oonihile aavi wi oomudhivela Yehova?

YESU ahiwoga nlamulo nathima nnafwanyeya mu nlamulo na Moyizeji, nuwoga eegi: “Omudhivelege Yehova Mulugu awo ni murima wawo waatene, emuthu yawo yatene, kopolo dhawo dhatedhene, mubuwelo wawo waatene.” (Luk. 10:27) Omudhivela Yehova enovolowelavo murima wehu, dhofuna dhehu, mubuwelo wehu ni dhithu nnubuwelihu. Teto enovolowelavo omwebedha Yehova ni emuthu yehu yaatene vamodha ni kopolo dhehu dhatedhene. Ohiya eyo, omudhivela Yehova enovolowelavo mubuwelo wehu ni makalelo nnalabihedhihu mubuwelo wehu. Ebaribari wi kannadha noonelamo pamadhene mubuwelo wa Yehova. Mbwenye iyo podi otajhiha makalelo owubuwela a Yehova wodhela ohudhera “mubuwelo wa Kiristu”. Mwaha wihina Yesu ootajhiha pamadhene makalelo owubuwela a Yehova. — 1 Kor. 2:16 ni osugwe nota na estudo “nós temos a mente de Cristo.”

² Yesu onomudhivela vanlubale Yehova ni mubuwelo waye waatene. Oliye ahinona ethu Yehova afuniye wihina oliye eerena, teto ahithoma werana eyo, naarive afwanyiwaga makathamiho. Yesu ahithoma werana efunelo ya Yehova, bumwahaya keenyile wihina ethu-sithu ekale yathima mwigumini mwaaye, opitha werana efunelo ya Yehova.

3. Oneti baani Peduru aanniyena, ki ddiniyani oliye aakongomedhiye makiristawu werana? (1 Peduru 4:1)

³ Peduru ni anamahara amodha yahikanna oneti wokala vamodha ni Yesu ni woona makalelo oliye ubuweliye. Murumiwi Peduru nuuleba karta naye noobajha, oliye wakongomedha makiristawu aatene eegi: Mwiwegeredhe mu yubuwelo ya Kiristu obe neere, wubuwela ninga Kiristu. (Mmwileri 1 Peduru 4:1.)a Madhu murumiwi Peduru alabihedhiye owi ‘mwiwegeredhe,’ yothabwa olabihedhiwa okoddoni. Bumwahaya, iyo podi owoga wihina okanna mubuwelo wa Kiristu, eli ninga okanna epano yakopolo nnahowelihu wihina nande owanana ethu-sithu enanithukulela werana yothega mwilaboni ela ya Saddana. — 2 Kor. 10:3-5; Efe. 6:12.

4. Ohudhera wula winanikavihere woonelamo ddi?

⁴ Ohudhera wula, onere onikavihera woonelamo (1), makalelo owubuwela ninga Yehova, eli ethu enanikavihera wiwanana epaddi yomubuweloni ni addibila enafwanyeya wapela elabo yaatene, (2) okala owiyeviha ni (3) okala athu ooxaga wodhela omuroromela Yehova ni olobela. Wihina nonelemo dhithu ndha tharu, nnere ohudhera makalelo owubuwela a Yesu, namala nnere woona makalelo oomutajhiha.

WUBUWELEGE NINGA YEHOVA

5. Mudhidhi baani Peduru ahandiliye wubuwela ninga Yehova?

⁵ Nlabo dhaala murumiwi Peduru ahikanna mubuwelo wohiyana ni mubuwelo wa Yehova. Yesu wawaddela anamahara aye wihina ohowela odhowa oJeruzale, nuwindo oliye eere omagiwa ni anamasogolela gereja ni eere wonihiwa goyi ofiyedha opiwa. (Mat. 16:21) Peduru ahinona wihina Yesu aali Mesiya aapaganyiwe wihina avuluse nlogo na Mulugu. Bumwahaya wa Peduru, yaali yorusa orumedha wihina Yehova eere wenya wi Yesu apiwe ni makalelo yaale. (Mat. 16:16) Mwaha wa yeyo, Peduru omwithana Yesu ni owoga eegi: “Nabwiyani, kiweddeleni thagaraga! Ethu ninga yeyo kidha yupadduwelani.” (Mat. 16:22) Mbwenye Yesu kaarumedhile moonelo wa Peduru, mwaha Peduru kubuwela ninga Yehova ubuweliye.

6. Nimakalelo baani Yesu oonihiliye wi ootajhiha makalelo owubuwela a Yehova?

⁶ Yesu ootajhiha pamadhene makalelo owubuwela a Yehova. Bumwahaya Yesu adhe awogege ni Peduru eegi: “Kasusedha ngo Saddanawe! Mwaha oli nibwe nookwakwathusa, mubuwelo onniwena kahiyo wa Mulugu, mbwenye bwaathu.” (Mat. 16:23) Mwebaribarene yakala ninga madhu asorihile Peduru yeere omukavihera Yesu, mbwenye Yesu ahikoodda ohara yolaga ya Peduru. Mwaha Yesu ahinona wihina Yehova afuna wi Yesu ahithabwege withuwathuwela. Nlabo nenne Peduru ahihudhera thima yowubuwela ninga Yehova. Teto nihiyoya, nnohudhera ethu yathima ni yopadduwa ela.

7. Peduru oonihile aavi wi oofuna okanna mubuwelo wa Yehova? (Osugwe fotu.)

⁷ Nuuvira mudhidhi, Peduru wooniha wihina oofuna okanna mubuwelo wa Yehova. Oliye ahonelamo eyo, Yehova numuruma wihina aalaleye athu yahaali maJudewu, obe neere, athu yahakosa epaddi ya nlogo na Mulugu wihina vano ekosege epaddi ya nlogo na Mulugu. Motajhiha, naarive Korneliyu ahili muJudewu, Yehova omuthoma Peduru wi amulaleye wihina akale mukiristawu. Ohiya eyo, Korneliyu aali oobajha olaleyiwa ninga muthu ahaali muJudewu wihina akale mukiristawu. Teto mudhidhi yoole maJudewu kayitaganyiha ni aale yahaali maJudewu. Bumwahaya wihina Peduru ande omulaleya Korneliyu, ohowela osaddula mubuwelo waye. Yehova nuumukavihera Peduru woonelamo efunelo yaye, oliye osaddula mubuwelo waye wodhela athu amalogo ni odhowa omwaredhela Korneliyu “ahikooddile.” (Dho. 10:28, 29) Vano yokumelelavoya sowihina Peduru ahanda omulaleya Korneliyu ni emudhi yaye yaatene. Mwaha wa yeyo, aatene obaddiziwa. — Dho. 10:21-23, 34, 35, 44-48.

8. Nnonihe aavi wihina nnowubuwela ninga Yehova? (1 Peduru 3:8 ni nota)

⁸ Nuuvira yakadhene, murumiwi Peduru wakongomedha makiristawu wihina ‘ekanne mubuwelo mmodhave’, obe neere, yubuwelege mowiwanana. (Mmwileri 1 Peduru 3:8 ni nota.)b Iyo podi okanna mubuwelo oyo wodhela ohudhera mBibiliyani makalelo owubuwela a Yehova ni otajhiha. Ninga motajhiha, Yesu ahakongomedha anamahara aye opweha mburo wobajha Omwene wa Mulugu mwigumi mwewa. (Mat. 6:33) Mwaha wa yeyo, ddibila obe murogola ammulogoni mwehu podi othoma okala piyonero obe wapara mabasa ohiyana-iyana a mudhidhi wamutene. Vano kayakale yapama wawoga madhu ookwerebeyiha ni addibila ninga yaala enna efunelo yowapara mabasa ala ofiyedha aliwa wikubanyedhaga. Ohiya eyo, sapama iyo omulibiha wihina ande wakwanihedha yoluba yaye.

OKALE MUTHU OWIYEVIHA

9-10. Yotajhiha baani yowiyeviha Yesu oonihiliye?

⁹ Emahiyu ahinathi okwa, Yesu ahimuhudhiha Peduru ni anamahara amodha thima yokala muthu owiyeviha. Mbwenye ahinathi wahudhiha, Yesu omuruma Peduru ni Juwawu wihina yawegeredhe mathanga a paskwa. Podi wera ethu emodha aliwa yegeredhiliwa, yaali basiya ni tuwalya wihina esuwiwena manyalo a muleddo aadhe waajha mathanga ale a paskwa. Mbwenye baani aakale owiyeviha wihina aasuwege manyalo a aleddo?

¹⁰ Ahubuwele dila biili, Yesu wahudhiha yotajhiha yokala muthu owiyeviha. Yesu wapara mabasa yapariwesa ni mudhaari. Teto ele Yesu eriliyena yahatikiniha vanlubale anamahara aye. Bibiliya anawoga wihina Yesu waarula malayaaye oode, vano othukula tuwalya omagelela muyinuni mwaaye. Nuumala, waweka manjhe mbasiyani ni wambela wasuwana manyalo anamahara aye. (Juwa. 13:4, 5) Yesu ahasuwa manyalo a anamahara aye 12 vamodha ni a Judasi afuna omuguliha vasogolova. Podi wera wahivira mudhidhi wowinjhiva Yesu aasuwaga manyalo a anamahara aye, mbwenye Yesu aali owiyeviha ni ahamariha mabasa ale. Numala wasuwa, oliye owoga ni anamahara aaye nupwaseya eegi: “Muhonelamo ethu guwerelimini? Nyu munagithana ‘Namahudhiha’ ni ‘Nabwiya’ eyo ebaribari, dimiyene. Akala miyo Nabwiya ni Namahudhiha gihasuwa manyalo enyu, ni nyunwa musuwanege manyalo mmodha ni mukwaye.” — Juwa. 13:12-14.

11. Peduru onihile aavi wihina ali muthu owiyeviha? (1 Peduru 5:5) (Osugwe fotu.)

¹¹ Peduru ahihudhera ni Yesu okala muthu owiyeviha. Yesu nuuhogolowela odhulu, Peduru ahawerana matikiniho wodhela onvulumusa mulobwana dhaala abaliwe ooragalene. (Dho. 1:8, 9; 3:2, 6-8) Nuwindo muthithi ole waathu omurijha Peduru mwaha wa matikiniho ale aweriliyena. (Dho. 3:11) Nerege Peduru eere opatha mudhidhi yole wihina akale muthu owithukula, woona wihina athu amudhidhi yole yodhiveliwa withukula? Naari. Peduru ahididela okala muthu owiyeviha, teto kasayenle ootamaliwa, mbwenye ahinvaha nthithimiho naatenene Yehova vamodha ni Yesu, nuwoga eegi: “Wodhela nroromelo ninnihuna ni ndina [na Yesu], fivala mulobwana ola mmunonninyu teto munamooninyu eeddaga.” (Dho. 3:12-16) Bumwahaya murumiwi Peduru aalebelaga makarta makiristawu, ahakongomedha owara ekalelo yowiyeviha. Madhu wi owara ekalelo yowiyeviha enonubusedha mudhidhi Yesu aamagiliye tuwalya muyinuni mwaaye wihina aasuwe manyalo aanamahara aye. — Mmwileri 1 Peduru 5:5.c

12. Nnande aavi odidela okala athu owiyeviha, ndala ninga Peduru?

¹² Iyo podi ohara yotajhiha ya murumiwi Peduru wodhela odidela okala athu owiyeviha. Mbwenye kudduwale, kahi wisinjhedha owoga ninga oli muthu owiyeviha. Peduru ohalabihedha madhu owi ‘wiyeviha wa mubuwelo,’ madhu ala enowoniha wihina wiyeviha webaribari onadhela vati vamurima. Iyo nnowakavihera athu, mwaha nnomudhivela Yehova vamodha ni athuya, teto kanakavihera athu wihina nitamaliwe. Ohiya eyo, nnowoniha wi nili athu owiyeviha naamulabelaga Yehova ni naakaviheraga addibilihu nuuhagalala, naarive athu amodha ehoonaga dhithu nnerihuna. — Mat. 6:1-4.

‘OKALE MUTHU OOXAGA’

13. Okala muthu ‘ooxaga’ enatapulela ddi?

¹³ Okala ‘muthu ooxaga’ enatapulela ddi? (1 Ped. 4:7) Mukiristawu ali ooxaga onowerana dhatedhene anandiye wihina eerena dhothoma dhiniwanana ni mubuwelo wa Yehova. Oliye anowonelamo wihina kawo ethu yathima mwigumini mwaaye okwaranya wandana anniyena ni Yehova. Ohiya eyo, oliye onowipimelela teto anowonelamo wihina kannone dhithu dhatedhene. Muthu ooxaga anowooniha wihina anomuroromela Yehova wodhela olobela alobaga dhoholela, aafunaga werana ethu-sithu.d

14. Mudhidhi baani Peduru ahiliye omuroromela Yehova?

¹⁴ Emahiyu Yesu ahinathi okwa, oliye ahaxagiha anamahara aye eegi: “Emahiyu yela nyu aatene munere okwakwathuwa wodhela miyo.” Mbwenye woona wihina Peduru oothabwa wiroromela, oliye owoga eegi: “Naarive aatene ekwakwatuwe wodhela ele enafuna wupadduwelani miyo kaginadha gikwakwathuwa!” Emahiyu yele, Yesu ahavaha yolaga anamahara aye eegi: “Mukale mento ni mudidele olobela.” (Mat. 26:31, 33, 41) Mwebaribarene ahere Peduru ahara yolaga ele, oliye eere owoga nuuliba murima wihina aali namahara a Yesu. Mbwenye oliye ahimukoodda nabwiya aye dila tharu, mwaha wa yeyo oliye wukuuwa vanlubale. — Mat. 26:69-75.

15. Ddiniyani yamukavihere Yesu odidela okala ooxaga emahiyu ahinathi okwa?

¹⁵ Yesu oomuroromela Yehova ni murima waye waatene. Naarive agaali oologomana, oliye ahilobela dila dhowinjhivadhene emahiyu ele ahinathi okwa. Mwaha wa nlobelo nne oliye ahanda oliba murima wihina eerena efunelo ya Yehova. (Mat. 26:39, 42, 44; Juwa. 18:4, 5) Peduru ahimoona Yesu alobelaga vanlubale mwaha wa makathamiho yanfwanya emahiyu ahinathi okwa, teto egumi yaye yaatene Peduru kadduwale ndhe Yesu eriliyena.

16. Nnone aavi wihina Peduru aali muthu ooxaga? (1 Peduru 4:7)

¹⁶ Nuuvira mudhidhi, murumiwi Peduru ohudhera omuroromela vanlubale Yehova ni olobela alobaga dhoholela dhaye. Yesu nuvenyihiwa muukwani, oliye ompaganya Peduru naarumiwi amodha wi yere wakela muzimu wotxena wihina yandege olaleya muthenga dhapama. Mbwenye Yesu waloba wihina ekale oJeruzale ejheehaga ele aapaganyiliye. (Luk. 24:49; Dho. 1:4, 5) Ddiniyani Peduru eriyena, wula ajhehaga wakela muzimu wotxena? Oliye ni addibila amodha “yodidela olobela”. (Dho. 1:13, 14) Vasogolova, murumiwi Peduru walebela karta noobajha makiristawu, aakongomedhaga wihina ekale ooxaga ni edidele olobela wa Yehova elobaga dhoholela. (Mmwileri 1 Peduru 4:7.)e Ohiya eyo, murumiwi Peduru ohudhera omuroromela Yehova, teto yathimaya oliye ahikavihera vanlubale mulogo. — Gal. 2:9.

17. Ddiniyani nnahowelihu odidela werana, naarive niganonne dhithu dhowinjhiva? (Osugwe fotu.)

¹⁷ Wihina nikale athu ooxaga, nnohowela odidela olobela wa Yehova, naarive niganonne dhithu dhowinjhiva. Nafunaga werana dhothoma dhathima, nnohowela olobela wa Yehova nimulobaga dhoholela dhaye. Teto nnohowela ororomela wihina oliye ohunona ele eli yapama wahiyo.

18. Nnande aavi omutajhiha pamadhene Yehova?

¹⁸ Sapama vanlubale onona wi Yehova anipaddusile ni ekalelo yoomutajhiha! (Gén. 1:26) Ebaribari wi kannanda omutajhiha Yehova mowakwanela. (Isa. 55:9) Ndala ninga Peduru, nnafuna nididele otajhiha makalelo owubuwela a Yehova, okala owiyeviha ni okala athu ooxaga.