OHUDHERA 26
JHIBO 123 Nimwiwelelege Yehova nnikuru naaye
Orumedhe nuwiyeviha dhithu ohunonniwe
‘Omoonelamo Akopolo dhaatedhene kahiyo masika.’ — JÓ 37:23.
DHITHU NNAAHUDHERIHU
Nnere woona makalelo oowawanana makathamiho wodhela opwasedha dhithu nnonnihu ni omuroromela Yehova, naarive nahinonne dhithu dhinafuna opadduwa osogolo.
1. Yehova anipaddusile ni ekalelo baani? Ki mwahaya bwaddi?
YEHOVA anipaddusile ni ekalelo yowubuwela, yohudhera dhithu dhixa ni wonelamo makalelo ooparihedha mabasa dhithu nnahudherihu. Mwahaya bwaddi Yehova adhe anipaddusege ni makalelo yaala? Oliye anipaddusile ni makalelo yaala wihina nandege ofwanya enonelo yaye ni omulabela ni ekalelo yehu yopendda.— Pro. 2:1-5; Rom. 12:1.
2. a) Ethu baani nnahowelihu wonelamo? (Jó 37:23, 24) (Osugwe fotu.) b) Mwahaya bwaddi sapama wahiyo ohunona dhithu dhimodha?
2 Ebaribari wi Yehova anipaddusile ni ekalelo yohudhera, mbwenye dhihikalawo dhithu dhowinjhiva nihinonnihu. (Mmwileri Jó 37:23, 24.) Kubuwela yopadduwa ya Jo. Yehova ahawerana makoho ohiyana-iyana yamukavihere oliye wonelamo wi kanonne dhithu dhowinjhiva. Othapanya wule wahimukavihera Jo okala muthu owiyeviha ni owomihedha makalelo aye owubuwela. (Jó 42:3-6) Ni makalelo mamodha, sapama okala athu amanddile ni wonelamo wi kannonne dhithu dhaatedhene. Nerana ndala, nnerege omuroromela Yehova wi anerege onaaddele ethu nnahowelihu werana wi nandege werana dhothoma dhapama. — Pro. 2:6.
Orumedha wi kannonne dhithu dhaatedhene, podi okala yapama wahiyo ndala ninga yaliwa yapama wa Jo (Osugwe ddima 2)
3. Ohudhera wula nnoone ddi?
3 Ohudhera wula, nnere woona dhithu nihinonnihu ni makathamiho enanifwanye mwaha ohinona dhithu ndha. Teto nnere woona mwahaya bwaddi sapama ohinona dhithu dhimodha. Ohudhera wodhela muselu ola, winere onikavihera omuroromela Yehova, ole ‘anna enonelo yologomana’ ananaddela ele nnahowelihu onona. — Jó 37:16.
IYO KANNONNE NLABO OMAKUTHULO ONAFUNIWA OFIYA
4. Mowiwanana ni Matewuji 24:36, dhithu baani nihinonnihu?
4 Mmwileri Matewuji 24:36. Iyo kannonne nlabo omakuthulo onafuniwa ofiya. Teto mudhidhi Yesu agaali velaboni yavati, oliye kannonne ‘mudhidhiya [newene] nsakana omakuthulo wafuniwa ofiya.’a Ohiya eyo, oliye ahawonelihamo anamahara aye wi Yehova baahi dinonne mudhidhi dhinapadduwege dhithu dhaatedhene wi “efunelo yaye” yakwanele. (Dho. 1:6, 7) Yehova ohuthoma mudhidhi anafuniye ogujhula elabo ela yabure, mbwenye iyo kannonne mudhidhi Yehova anafuniye werana eyo.
5. Woona wihina kannonne mudhidhi omakuthulo onafuniwa ofiye, iyo podi okala aavi?
5 Mowiwanana ni ele asorihile Yesu, iyo kannonne mudhidhi mugaasi nnahowelihu ojheha wihina omakuthulo wifiye. Vano mwaha ohinona mudhidhi oyo, iyo podi okwerebeya ni ohanda ojheha. Thabwathabwa akala ninna ojheha muwari mwa yaka dhowinjhivadhene nlabo na Yehova. Teto podi okala yorusa ojheha akala amudhihu obe athu amodha enna oniteya, mwaha omakuthulo winna olegela ofiya. (2 Ped. 3:3, 4) Ohiya eyo, iyo podi wubuwelaga wi yere okala yokweya ovilela ni ojheha nahanone nlabona omakuthulo onafuniwa ofiya.
6. Mwahaya bwaddi sapama ohunona nlabo omakuthulo onafuniwa ofiya?
6 Ebaribariya sowihina, mwaha ohunona nlabo omakuthulo onafuniwa ofiya, Yehova anna onivaha ofuru wowoniha wi nnamulabela mwaha nnomudhivela ni nnomuroromela. Mwaha iyo kannamulabela Yehova nubuwelaga nlabo anafuniye odhana omakuthulo, ekalaga ninga nroromelo nehu nihikanna omagomowa. Bumwahaya ohiya wubuwelaga nlabo Yehova anafuniye odhana omakuthulo, ethu nnahowelihu werana fuwubuwela dhithu dhapama dhinafuna opadduwa nlabo nno nafiya. Nerana ndala, nnerege omwaddamela Yehova, teto nroromelo nehu nnerege wenjhedhedheya ni nnerege werana dhithu dhaatedhene nnandihu wihina nimuhagalase Yehova. — 2 Ped. 3:11, 12.
7. Dhithu baani nnonnihu?
7 Sapama wubuwela dhithu nnonnihu. Motajhiha, iyo nihinona wi malabo okuthula yambele yaka ya 1914. Mwaha Yehova ahinvethela dhovuhulela dhowinjhiva dhinoniha wi omakuthulo waabajhe yaka ya 1914 ni dhithu dhaapadduwege okuma yaka yeyo odhowa osogolo. Bumwahaya nihikanna ebaribari wi ‘nlabo na Yehova nihaddamela.’ (Sof. 1:14) Teto nihanona mabasa Yehova anafuniye wihina naaparege, eli walaleya athu owinjhiva “muthenga dhapama wa dhOmwene.” (Mat. 24:14) Muthenga ndha dhapama dhinna olaleyiwa dhilabo dhowakwana 240 ni dhiwogelo dhokwaranya 1000. Bumwahaya kannahowela onona mudhidhiya [newene] nsakana nnafuna odha nlabo na Yehova wihina naapare nuuviheya mabasa ala athima.
IYO KANNONNE MAKALELO YEHOVA ANAFUNIYE WERANA DHITHUDHA
8. Madhu owi ‘mabasa maatene a Mulugu ebaribari’ enagiwana ddi? (Eclesiastes 11:5)
8 Iyo kananonne ‘mabasa maatene a Mulugu eebaribari.’ (Mmwileri Eclesiastes 11:5.) Madhu ala enagiwana dhithu dhaatedhene Yehova aneriyena ni anenyiye opadduwa wihina efunelo yaye yakwanele. Iyo kannonne dhithu dhinamuthukulela Yehova wenya opadduwa ethu-sithu obe makalelo oliye aneriyena dhithudha wihina anibarele. (Sal. 37:5) Mwaha Bibiliya analiganiha ohawonelamo mabasa a Mulugu eebaribari ni ohonelamo makalelo mwaana anunnuwiye akala mbani mwa amaye. Motajhiha, masiyentista kinanda wonelamo pamadhene makalelo mwaana anunnuwiye akala mbani mwa amaye. Nihiyoya kannanda wonelamo pamadhene makalelo Yehova aneriyena dhithudha.
9. Mwaha ohunona makalelo Yehova anafuniye werana dhithudha, iyo podi okala aavi?
9 Mwaha ohunona makalelo Yehova aneriyena dhithudha wihina anikavihere, podi onirusaga werana dhothoma. Motajhiha, iyo podi woovaga oleva dhithu dhowinjhiva wihina nawenjhedhedhe mabasa nnamparelihu Yehova. Obe podi woovaga okweyiha egumi yehu wihina ntamele elabo winahoweleya anamalaleya. Teto malabo mamodha iyo podi wubuwelaga wi Yehova kananireeliha mwaha kannanda omwerela ele nafunihu omwerela. Eyo podi opadduwa mwaha ohanda woona makalelo nnaakaviherihu athu naaparaga mabasa oolaleya, obe akala ninna wawanana makathamiho mudhidhi naaparaga mabasa bi mabasa munikuruni mwa Yehova.
10. Mwaha ohunona makalelo Yehova anafuniye werana dhithudha, iyo podi okanna dhikalelo baani?
10 Ohinona makalelo Yehova aneriyena dhithudha, podi onikavihera okala muthu owiyeviha ni okala muthu amanddile. Teto nnowanda woonelamo wi Yehova ohunona ele eli yapama wa iyo. (Isa. 55:8, 9) Ohiya eyo nnowenjhedhedha nroromelo ninnihuna ni Yehova ni nnohudhera osayela dhoholela dhaye wi dhehu dhineddelege pama. Teto dhehu dhaaneddelaga pama mmabasani oolaleya obe mabasa bi mabasa nnaparihu munikuruni mwa Yehova, nnonvaha nthithimiho naatenene Yehova anafwaneleliye. (Sal. 127:1; 1 Kor. 3:7) Teto dhithudha dhaheddaga ninga nafunelihu, kanidduwale wi Yehova dili omukomboniwa. (Isa. 26:12) Iyo nnowerana epaddi yehu naaroromelega wi Yehova anere werana epaddi yaye. Ohiya eyo, nihikanna ebaribari wi Yehova anere oniholela, naarive ahawerilena matikiniho ninga aweresiyena kale. — Dho. 16:6-10.
11. Dhikalelo baani nnonnihu wodhela Yehova?
11 Iyo nihinona wi Yehova Mulugu owogowa, oodhivela ni athotho. Ethu emodha nnonnihu sowihina Yehova anovaha athima dhithu nnamwerelihu ni nnawerelihu addibilihu. Teto nihikanna ebaribari wi Yehova onowareeliha ale eli oororomeleya wa oliye. — Ebe. 11:6.
KANNONNE DHITHU DHINAFUNA OPADDUWA MANGWAANA
12. Mowiwanana ni Tiyagu 4:13, 14, ddiniyani nihinonnihu?
12 Mmwileri Tiyagu 4:13, 14. Ethu nnonnihu sowihina kannonne dhithu dhinafuna opadduwa mangwaana. Mwilaboni muna nnakalihu, dhinopadduwa dhithu dhowinjhiva nahajhehedhihu mwaha ‘mudhidhi rurumusa ni kunampaganya muthu.’ (Ecl. 9:11) Mwaha wa yeyo, malabo mamodha nnowanganyedha akala dhehu dhinere oneeddela pama, obe akala mangwaana nnere okalawo wihina nakwanihedhe dhothoma dhehu.
13. Ohunona dhithu dhinafuna opadduwa mangwaana podi onithukulela iyo okala aavi?
13 Podi okala yorusa ovilela mwaha ohunona dhithu dhinafuna opadduwa osogolo. Ni makalelo baani? Nahikala pasope iyo podi othuwathuwelaga dhithu dhinafuna opadduwa mangwaana ofiyedha oyelela ohagalala wehu. Teto egumi yehu podi osadduwa mowaguva, ofiyedha onitotela makathamiho obe okala othuwathuwene. Ohiya eyo, dhithudha dhaheddaga ninga nafunelihu, iyo podi wukuuwa ofiyedha okwerebeya.— Pro. 13:12.
14. Ohagalala wehu anadhela mwaha wa ddi? (Osugwe fotu.)
14 Nafwanyiwaga makathamiho nnokanna ofuru woomoniha Yehova wi kannamulabela mwaha wa dhithu ananivahiye, mbwenye nnamulabela mwaha omudhivela. Kawo epaddi ya mBibiliyani enawoga wihina Yehova onowabarela wa makathamiho maatene enafwanya adhaari aye. Newene kawo epaddi enoniha wi Yehova onothoma ethu enafuna onipadduwela. Mwaha Yehova ohunona wi ohagalala wehu kunadha mwaha onona dhithu dhinafuna onipadduwela osogolo. Ebaribari sowihina ohagalala wehu onadha mwaha oholeliwa ni Yehova ni wiwelela dhoholela dhaye. (Jer. 10:23) Nasayelaga dhoholela dha Yehova wihina nerena dhothoma dhapama, kannathabwa othuwathuwa nubuwelaga dhithu dhinafuna onipadduwela. Teto neragana eyo, enakala ninga nnawoga neegi: ‘Yehova afuna, nnere okalawo wihina nerena ela obe ele’ anafuniye. — Tiya. 4:15.
Nasayelaga dhoholela dha Yehova ni namwiwelelaga, nnokala obareleyene (Osugwe ddima 14-15)b
15. Ddiniyani nnonnihu wodhela osogolo?
15 Ebaribari wi kannonne dhithu dhaatedhene dhinafuna opadduwa osogolo, mbwenye nihinona wi Yehova ohupaganya onivaha egumi yamukalakala. Athu amodha enere othukuleliwa odhulu wihina yakele egumi yohimala, mbwenye amodhaya enere wakela egumi yamukalakala mwilaboni yeela yavati. Teto nihinona wi Yehova kanoota ni kavo ethu enamuhihe wakwanihedha mpaganyo dhaye. (Titu 1:2) Mwaha Yehova dambele owoga ‘obajha omambelelowene asorihaga dhosogolo, obajha masaka akale, ohusoriha dhego dhihinambele opadduwa.’ Teto dhithu dhaatedhene Yehova asorihiliye kale, dhihakwanela. Eyo enoniha wihina dhithu dhaatedhene Yehova apaganyiliye wihina dhinere wereya osogolo, dhinere wakwanela. (Isa. 46:10) Teto nihikanna ebaribari wi kawo ethu enamuhihe Yehova onooniha odhivela waye. (Rom. 8:35-39) Naarive dhinipadduwelaga dhithu dhohiyana-iyana, Yehova anere onivaha thotho, anere onitodola ni anere onivaha kopolo nnahowelihu wihina nivilele. Bumwahaya kananganyedha wihina Yehova anere onikavihera ni anere onireeliha. — Jer. 17:7, 8.
IYO KANNANDA WONELAMO PAMADHENE MAKALELO YEHOVA ANINONILIYE
16. Mowiwanana ni Salmo 139:1-6, ddiniyani Yehova anonniye wodhela iyo nihinonnihu pamadhene?
16 Mmwileri Salmo 139:1-6. Mpaddusi ehu ohunnona pamadhene ni ohunona mwahaya bwaddi ndhe nikannege dhikalelo dhohiyana-iyana. Ohiya eyo, Yehova anonipwasedha onisugwa mudhidhi waamutene. Teto nalobelaga ohiya onivuruwanave, oliye onowanda wonelamo yotapulela ya ethu nnafunihu owoga. Yehova onowoona dhithu dhaatedhene nnerihuna ni ohunona ethu enanthukulela werana dhithudha mwamakalelo yaala. Mwene Davidi uhoniha wihina Yehova onoopwasedha onisugwa wihina anikavihere nahowelaga ethu-sithu. Onakala aavi mwaha onona wi namathonga a elabo yaatene ni mpaddusi oodhulu ni elabo yavati, onoopwasedha omusugwa kadda muthu wa iyo. Kunatikina? Davidi ohuwoga egi: ‘Enonelo yenyu ehithabwa olapela ni enonelo yaaga. Ehithabwa olapela ni kaginanda ofwanya.’ — Sal. 139:6, nota.
17. Mwahaya bwaddi podi okala yorusa orumedha wi Yehova ohunnona pamadhene?
17 Mwaha wa elemelelo, makalelo nleliwihu obe mwaha wa dhithu narumedhihu nihinathi onona ebaribari, podi onithukulela ohanda omoona Yehova ninga Baabi odhivela ni ananithuwathuwela. Obe iyo podi wubuwelaga wihina mwaha wa dhothega dhinlubale nerilihuna kale, Yehova kanadha arumedha wandana nihiyo ni kanadha onaddamelaga. Teto mwene Davidi iwoona ndala. (Sal. 38:18, 21) Obe ddibila anilibihedha wihina awomihedhe egumi yaye wi amuhagalase Yehova, podi wikohaga eegi: “Akala Mulugu ohuginona, mwahaya bwaddi agafuna wi gihiye dhikalelo dhinakala ninga sapama wa miyo?”
18. Mwahaya bwaddi sapama orumedha wi Yehova ohunnona pamadhene onikwaranya iyo nannya? (Osugwe fotu.)
18 Sapama onona wihina Yehova ohunnona pama onikwaranya iyo nannya, ni wihina onowoona dhikalelo dhapama ninnihuna, nahinandihu woona iyo nannya. Naarive oonaga dhoviriganiha dhehu, Yehova ohunona munyamuthu baahi nnilibihedhihu wihina nikale, teto oliye ononidhivela vanlubale. (Rom. 7:15) Woonelamo wihina Yehova onowoona dhikalelo dhehu, enonikavihera okanna kopolo wihina nididele omulabela nuroromeleya vamodha nuuhagalala.
Nafwanyiwaga makathamiho morurumusa, Yehova ononikavihera ovilela wodhela olibiha nroromelo nehu ni mpaganyo dhosogolo (Osugwe ddima 18-19)c
19. Ddiniyani nnonnihu wodhela Yehova?
19 Ethu nnonnihu ni nahinanganyedhihu sowihina Yehova odhivela. (1 Juwa. 4:8) Iyo nihinona wihina dhithu dhaatedhene oliye ananilobiye, ananiloba mwaha ononidhivela ni ananifunana opama. Ohiya eyo, nihinona wihina Yehova anafuna wi naakele egumi yohimala. Teto wihina eyo epadduwe, oliye ohumuliva mwanaye ninga yowobola. Mukono ola anivahiliye, onoonivaha ebaribari wihina naarive nigaali athu ohulogomana, iyo podi omuhagalasa Yehova. (Rom. 7:24, 25) Teto nihinona wihina “Mulugu dili munlubale opitha murima dhehu ni ohunona dhithu dhaatedhene.” (1 Juwa. 3:19, 20) Yehova ohunnona pamadhene ni ohukanna ebaribari wihina nnere wanda werana ele ananilobiye.
20. Mwahaya bwaddi kannahowela othuwathuwela dhithu nahinonnihu?
20 Yehova ononaaddela dhithu dhaatedhene nnahowelihu onona. Nakala athu amanddile ni narumedha wihina dhihikalawo dhithu nihinonnihu, kannathabwege othuwathuwa nisayelaga onona dhithu nihinonnihu. Ohiya eyo, nnathuwathuwelege baahi dhithu dhinanipatha. Nerena ndo, nnere wooniha wihina nili athu owiyeviha ni wihina nnamuroromela Yehova baahi ‘ali oologomana muyubuweloni.’ (Jó 36:4) Ebaribari wihina dhihikalawo dhithu nahinandihu wonelamo ovanene, mbwenye nihinona wi Yehova anere odidela onihudhiha ni mukalakala. Teto sapama onona eyo, mwaha kannadha niselela ohudhera dhithu dhixa wodhela Mulugu ehu. — Ecl. 3:11.
JHIBO 104 Muzimu wa Mulugu nvaho
a Yesu anere oholela koddo enafuna owaniwa ni elabo ela ya Saddana. Bumwahaya iyo podi owoga wihina vano Yesu ohunona nlabo enambela koddo ya Armajedo ni ‘wakwanela wa ogonjhiha waye.’ — Ovuhu. 6:2, 19:11-16.
b OTAPULELIWA WA FOTU ENAFWANYEYA: Baabi dhaala ni mwanaye yegeredhaga pasta wihina emudhiwa yaatene ekale owiwegeredhene yakumelela ethu-sithu.
c OTAPULELIWA WA FOTU: Ddibila dhaala anafwanyiwa makathamiho onopendda ohagalala anafuniye okanna mwilaboni exa.