Odidele weedda ni nroromelo

1. Murumiwi Pawulo aasugwaaga dhithu eriliyena kale, akala aavi? Ki mwaha bwaddi?

MURUMIWI Pawulo ahinona wihina wahale mudhidhi vang’no wihina apiwe. Mbwenye ubuwela makalelo eddihiliye egumi aye oliye ohagalala vanlubale. Ni owoga eegi: “gihithamaga ofiyedha omakuthulo, gihikalawo ni nroromelo.” (2 Tim. 4:6-8) Pawulo aherana dhothoma dhapama mwigumini mwaaye ninga mukiristawu, teto oliye ahinona wihina ahihagalasa murima wa Yehova. Nihiyoya nnafuna nerena dhothoma dhapama wihina nirumedhiwe vamentoni va Yehova. Ddiniyani nnafunihu werana wihina nirumedhiwe vamentoni va Yehova?

2. Weedda ni nroromelo enatapulela ddi?

² Murumiwi Pawulo ahiwoga wodhela oliye ni anamahara amodha eegi: “nnedda ni nroromelo ohiya ni dhithu nnoonihu ni mento.” (2 Kor. 5:7) Ki eyo enatapulela ddi? Mbibiliyani, madhu owi “weedda” enagiwana makalelo muthu anathomiye weddiha egumi aye. Muthu aneddiha egumi aye ni dhithu anandiye woona, aneerana dhothoma dhaye mowiwanana nindhe anonniye, aniwiye ni anubuweliye. Mbwenye, muthu aneedda ni nroromelo, anowerana dhothoma dhaye mowiwanana nindhe Yehova anubuweliye. Teto dhowera dhaye dhinowoniha wihina Mulugu anomureeliha ni ohunona wihina dholaga dha Yehova dhinafwanyeya mBibiliyani, dhinokavihera vanlubale mwigumini mwehu. — Sal. 119:66; Ebe. 11:6.

3. Mareeliho baani nnawakelihu nadidela weedda ni nroromelo? (2 Korintiyu 4:18)

³ Ebaribari wi iyo aatene nnowerana dhothoma dhiniwanana nindhe nnonihu, nniwihu ni nnubuwelihu. Mbwenye, nafunaga werana dhothoma dhathima nubuwela baahi dhithu ndha tharu eyo podi onitotela makathamiho. Mwahaya bwaddi? Mwaha wihina kiyakale yapama ororomela baahi dhithu nnonihu, nniwihu ni nnubuwelihu. Needda ni dhithu nnonihu ni mento, eyo podi onithukulela werana dhothoma dhihinamudhivela Yehova. (Ecl. 11:9; Mat. 24:37-39) Mbwenye needda ni nroromelo, nnere werana dhothoma ‘dhinamuhagalasa Nabwiya’. (Efe. 5:10) Ohiya eyo, nahara dholaga dha Mulugu dhinonivaha murenddele wavati vamurima ni ohagalala webaribari. (Sal. 16:8, 9; Isa. 48:17, 18) Teto nadidela weedda ni nroromelo, nnere okalawo ni mukalakala.— Mmwileri 2 Korintiyu 4:18.

4. Nnande aavi onona akala nnedda ni nroromelo obe ni dhithu nnoonihu ni mento?

⁴ Nnande aavi onona akala nnedda ni nroromelo obe ni dhithu nnoonihu ni mento? Nohowela wikoha neegi: Dhithu baani ginuubuwelimi gafunaga werana dhothoma dhathima? Gafunaga werana dhothoma ginubuwela baahi dhithu ginandimi woona obe ginowawubuwela malagano a Yehova? Ohudhera wula, nnere woona makalelo mararu odidela weedda munroromeloni: nafunaga wasakula mabasa, namusayelaga muthu nnafunihu omutela obe oteliwa ni naakela dhoholela dha munikuruni mwa Yehova. Teto kadda epaddi, nnere woona ethu baani nnahowelihu werana wihina nerena dhothoma dhapama.

NASAKULAGA MABASA

5. Iyo aatene nasayelaga mabasa ethu baani nnathabwihu wubuwela?

⁵ Aatene iyo nnofuna wisamalela ni osamalela emudhi yehu. (Ecl. 7:12; 1 Tim. 5:8) Mabasa mamodha enovaha korowa dhowinjhiva, mbwenye mamodha naari. Nakanna, mabasa enavaha korowa dhowinjhiva nnowanda okanna yoojha ya kadda labo ni okoya korowa wihina nisamalele osogolo. Mbwenye mabasa mamodha enavaha korowa vang’no enanikavihera osamalela emudhi yehu baahi. Bumwahaya nasayelaga mabasa, nnohowela onona korowa ngasi nnafunigihu wakela. Mbwenye naathabwaga wubuwela muselu wa korowa baahi, eyo enatapulela wihina nnedda ni dhithu nnandihu woona ni mento.

6. Nnande aavi onoona akala nnedda ni nroromelo nasayelaga mabasa? (Eberewu 13:5)

⁶ Nathoma weedda ni nroromelo, nnere wanda wonelamo makalelo mabasaya enavoloweliwa wandana wehu ni Yehova. Wihina nande werana eyo, iyo podi wikoha: ‘Mabasa ginaparegimi enere ogithukulela werana dhithu Yehova aniddiye?’ (Pro. 6:16-19) ‘Mabasaya enerege ogithukulela oyelela mutugumano obe wapara mabasa oolaleya ni weragana ohudhera waaga wa Bibiliya?’ Teto iyo podi wikoha neegi: ‘Gerege mabasaya enere ogithukulela okala wolapela ni emudhaga mudhidhi owinjhivene?’ (Fil. 1:10) Akala yowakula ya makoho ala sowi hee, yere okala yapama oharumedha mabasa ayo, naarive elabo onakaliwe egaali yorusa ofwanya mabasa. Woona wihina nnedda ni nroromelo, nnowerana dhothoma dhinoniha wihina Yehova anere onisamalela. — Mat. 6:33; Mwileri Eberewu 13:5.

7-8. Ddibila Javier andile aavi weedda ni nroromelo? (Osugwe fotu.)

⁷ Kasugwa yopadduwa ya ddibila Javier,a anakala elabo yowAmerika oosuli, ahanda wonelamo thima yowedda ni nroromelo. Bumwahaya oliye owoga eegi: “Miyo gahafwanya mabasa yaagivahege korowa dhowinjhiva ni yagithukulele okanna ethu-sithu gafunegimi.” Mbwenye ddibila Javier oofuna vanlubale okala piyonero. Oliye anowoga eegi: “Miyo gahanda wakula makoho agivahile jerenti amabasa yaale. Mbwenye gihinathi okohiwa, miyo werana nlobelo wa Yehova gimulobaga nikavihero, mwaha wihina miyo gahikanna ebaribari wi Yehova ahinona ethu yaatene eli yapama wa miyo. Miyo goofuna vanlubale okana mabasa apama ni wakela korowa dhowinjhiva, mbwenye kaginonne akala eyo yere ogithukulela ohawenjhedhedha mabasa gamparelimi Yehova.”

⁸ Ddibila Javier anowogave eegi: “Mudhidhi jerenti aagikohaga, oliye owoga wihina gerege olaba mawora owinjhivene. Nimakalelo apama miyo owoga nuliye wihina, kagande olaba mawora owinjhivene mwaha wa webedha waaga.” Vano ddibila Javier othoma ohurumedha mabasa ale, nuuvira sumana biili, oliye okala piyonero. Vasogolova, yaka yele oliye wafwanya mabasa alabegiye mudhidhi vang’no. Ddibila Javieri anowogave eegi: “Yehova ohuvuruwana malobelo aaga ni ogikavihera wafwanya mabasa enagenya okala piyonero. Miyo ginohagalala vanlubale mwaha wihina mabasa ayo enoogivaha mudhidhi womulabela Yehova ni addibilaga mmulogoni.”

9. Onahudhera ddi ni yopadduwa ya ddibila Tresor?

⁹ Ki noonelamo wi mabasa nnaparihu peeno enonthukulela ohanda weedda ni nroromelo? Kasugwa yopadduwa ya ddibila Tresor anakala elabo yoKongu. Oliye anowoga eegi: “Miyo gahikanna mabasa gafunesimi, teto goowakela korowa dhowinjhiva okwaranya korowa gaakelemi omabasani gaparesimi. Ohiya eyo athu owinjhiva yothabwa ogiriha.” Mbwenye ddibila Tresor oyelelesa mutugumano, mwaha wihina ohowela wapara mabasa muwari mwa mawora owinjhiva. Teto oliye owaddihedhiwa woota ni ovita dhithu dhabure dhapadduwa mwinperezani mune. Ddibila Tresor, oofuna wahiya mabasa ale, mbwenye owoova ohanda wafwanya mabasa mamodha. Ddiniyani yamukavihere ddibila Tresor, oliye onowoga eegi: “Yolebela ya Habacuque 3:17-19 ehigikavihera woonelamo wi Yehova kanadha ahiya ogisamalela, naarive yothoma yaaga egaali wahiya mabasa ale obe wakela korowa vang’ono. Bumwahaya vasogolova, ddibila Tresor oloba wihina ahiye mabasa ale. Oliye anowogave eegi: “Apatarawu owinjhiva enubuwela wihina anamalaba ewa, podi werana ethu-sithu wi edideleve wakela korowa dhowinjhiva, naarive ehowelaga okala mudhidhi wowinjhiva wolapela ni emudhi yewa obe ohutugumana wi emwebedhe Mulugu. Peeno miyo ginohagalala mwaha gihibarela wandana ginnimina ni emudhi yaaga vamodha ni Yehova. Nuuvira yaka modha, Yehova ogikavihera wafwanya mabasa apama. Teto ginowakela korowa ginahowelimi wihina gisamalelena emudhi yaaga ni ginokanna mudhidhi wihina gimparele mabasa Yehova. Ebaribari wi naarive nigampwehile Yehova mburo wobajha mwigumini mwehu, malabo mamodha, iyo podi orameyeliwaga korowa. Mbwenye Yehova kanadha ahiya onisamalela!” Ebaribariya sowihina naroromela dholaga ni mpaganyo Yehova ananivahiye, nnere odidele weedda ni nroromelo, teto Yehova anere onireeliha vanlubale.

WASAYELAGA OTELIWA OBE OTELA

10. Ddibila obe murogola oonihe aavi wi aneedda ni dhithu anandiye woona ni mento amusayelaga muthu wihina etelane?

¹⁰ Matelo nvaho wa Yehova, teto kahiyo yabure othoma oteliwa obe otela. Arogola yasayelaga oteliwa, dila dhowinjhivadhene aliwa enosayela onona ekalelo ya ddibilaya, akala dowoma obe naari, mweddelo waaye, makalelo anasamaleliye korowa ni makalelo anasamaleliye mutholo anniyena vemudhini ni akala onomuhagalasa.b Mwebaribarene sapama othuwathuwela onona dhithu dhatedhene ndha. Mbwenye murogola apwasedha wubuwela dhithu ndha baahi, podi omuthukulela oliye, odidela weedda ni dhithu anooniye ni mento.

11. Onere ddi wihina woonihe wi oneedda ni nroromelo wamusayelaga muthu wihina mutelane? (1 Korintiyu 7:39)

¹¹ Yehova anohagalala vanlubale awonaga addibila ni arogola eeparihedhaga mabasa dholaga anavahiye yamusayelaga muthu wihina etelane! Motajhiha, aliwa enohara yolaga enafwanyeya mBibiliya yojheha “wunnuwa” yahinathi wambela omwenddi. (1 Kor. 7:36) Teto aliwa enosayela onona akala muthuya, ohukanna dhikalelo Yehova anawogiye wihina mulobwana obe muhiyana anafuna oteliwa onahoweliye okanna. (Pro. 31:10-13, 26-28; Efe. 5:33; 1 Tim. 5:8) Teto aliwa kinambela omwenddi ni muthu ahili namoona a Yehova. Ohiya eyo, aliwa enohara yolaga enafwanyeya va 1 Korintiyu 7:39 “yotelana baahi mwa nabwiya.” (Mmwileri.) Aliwa enoodidela weedda ni nroromelo ni ehikanna ebaribari wi Yehova aneere wasamalela epaddi yomubuweloni, okwaranya muthu di muthu. — Sal. 55:22.

12. Onahudhera ddi ni yopadduwa ya murogola Rosa?

¹² Kasugwa yopadduwa ya piyonera dhaala anakala okolombiya anithaniwa Rosa. Mwaha wa mabasa aye, oliye oothabwa othapanya ni mulobwana dhaala oomabasani waye, mbwenye mulobwana ole kaali namoona a Yehova. Mulobwana ole oofuna murogola Rosa, teto murogola Rosa wambela omudhivela vanlubale mulobwana ole. Murogola Rosa anowoga eegi: “Oliye akala ninga mulobwana apama oliye owivelela dila dhowinjhivadhene wihina aapare mabasa ookavihera omabasani, teto olabihedha pama egumi yaye. Ohiya eyo, mulobwana ole oogeddiha pama. Oliye ahikanna dhikalelo dhatedhene gafunimi wi mulobwana afuna ogitela akanne, mbwenye oliye kaali namoona a Yehova. Teto mudhidhi yoole giwoona ninga gili meeka ni goofuna vanlubale oteliwa. Mbwenye gaali gahinanfwanye muthu aali namoona a Yehova wihina nitelane. Bumwahaya yogirusa vanlubale omukoodda mulobwana ole. Mwaha wihina ethu gafunimi mudhidhi yoole yaali oteliwa.” Naarive dhigaali ndo, murogola Rosa keenyile wihina atelane ni mulobwana ole, newene weedda ni dhithu onniye ni mento. Ethu yamukavihere sowihina oliye ahabiha wubuwela makalelo waakale wandana waaye ni Yehova ahere atelana ni mulobwana ole. Mwaha wa yeyo, murogola Rosa othoma ogwadda othapanya anniyena ni mulobwana ole ni wapwasedha wapara mabasa omuzimuni. Vasogolova murogola Rosa withaniwa wihina akurusare Eskola ya Anamalaleya Oomwene, teto peeno analaba ni piyonera a vayeka. Murogola Rosa onowogave eegi: “Miyo ginohagalala vanlubale mwaha wa mareeliho Yehova agivahiliye.” Ebaribari wi kahiyo yokweya weedda ni nroromelo, wula nifunaga dhithu nnathabwihu wubuwela. Mbwenye namwihiya Yehova oniholela yokumelelavoya sapama.

NAKELA DHOHOLELA MUNIKURUNI NA YEHOVA

13. Ddiniyani yanthukulele weedda ni dhithu nnandihu woona ni mento naakela dhoholela munikuruni na Yehova?

¹³ Sapama wakela dhoholela munikuruni na Yehova, dhinanikavihera omulabela Yehova mwamakalelo apama. Iyo podi wakela dhoholela ndho ni anamaholela mulogo, anameeddela mulogo ni addibila ooBeteli obe Nnikuru Nolamulela. Ki naakela dhoholela nahinandihu wonelamo pama? Nahikala pasope iyo podi wambela wuubuwela makathamiho enaadhe mwaha wa yoholelaya ofiyedha obajha wubuwela ohilogomana wa addibila enanivaha dhoholeladha.

14. Wihina noonihe wi nnedda ni nroromelo, ddiniyani nnahowelihu weragana naakela dhoholela dha munikuruni na Yehova? (Eberewu 13:17)

¹⁴ Needdaga ni nroromelo, nnowoniha wihina nnororomela wi Yehova anoholela nikuru naye ni ohunona dhithu dhatedhene wodhela iyo. Bumwahaya nnowiwelela dhoholela mowaguva, teto nnowerana eyo nuuhagalala. (Mmwileri Eberewu 13:17.) Iyo nihinona wi wiwelela winodhana wiwanana mmulogoni. (Efe. 4:2, 3) Teto naarive addibila enaniholela egaali athu ohilogomana, nihikanna ebaribari wi Yehova anere onireeliha nathoma wawiwelela. (1 Sam. 15:22) Wakala masadduwo bi masadduwo nnohowela okanna ebaribari wi Yehova anere onikavihera wonelamo dhithudha mudhidhi wofwanelela. — Miq. 7:7.

15-16. Ddiniyani emukavihere ddibila Kevin weedda ni nroromelo, naarive aanganyedhaga yoholela akenliye? (Osugwe fotu.)

¹⁵ Kasugwa yopadduwa enoniha mareeliho enadha mwaha weedda ni nroromelo ni wiwelela dhoholela dha munikuruni. Elabo yoPeru, athu owinjhiva enawoga ewogelo yEspanyoli, mbwenye athu amodhaya enawoga dhiwogelo dhohiyana-iyana ya elabo yeele. Ewogelo emodha enathabwa owogiwa elabo yeele enithaniwa Kexuwa. Muwari mwa yaka dhowinjhiva, addibila enowasayela athu enawoga ewogelo yeela. Mbwenye mwaha wa malamulo aanamathonga a elabo yeele addibila wawerana masadduwo wodhela makalelo owasayela athu enawoga ewogelo yeKexuwa. (Rom. 13:1) Mbwenye addibila amodha wambela wubuwela wi masadduwo ale yeere wadhana makathamiho. Vano addibila nuuthoma wiwelela dhoholela ndhe, Yehova oreeliha wilibihedha wewa, teto yahanda wafwanya athu owinjhiva yawoga ewogelo yeKexuwa.

¹⁶ Ddibila dhaala anithaniwa Kevin, ali namaholela mulogo anakavihera mulogo onawoga ewogelo weKexuwa, aali mmodha wa ale yanganyedha masadduwo. Oliye anowoga eegi: “Miyo gowubuwela gegi: ‘Nnafwanye wuuvi athu enawoga ewogelo yeKexuwa?’” Ddiniyani ddibila eriliyena? Oliye onowogave eegi: “Miyo opendda yolebela ya Provérbios 3:5 ni yopadduwa ya Moyizeji. Yehova ahinvaha dhoholela Moyizeji dhakala ninga kadhinna mabasa. Teto amwaana Ezarayeli nukuma Wijipitu, Yehova omwaddela Moyizeji wihina athukulele nlogo nne dila yadhowa waali niya yoofila. Mwaha wa yeyo, yakala ninga yoholela ele, yeere wathukulela mejipisiyu wahidda mwamakalelo ookweya. Naarive dhigaali ndo, Moyizeji othoma ohara yoholela ele. Mwaha wa yeyo, Yehova oreeliha yoholela ele wodhela wawerana matikiniho wihina avuluse nlogo naaye.” (Êxo. 14:1, 2, 9-11, 21, 22) Siyeyo erilena ddibila Kevin, naarive aanganyedhaga dhoholeladha, oliye othoma ohara yoholela yakenliwa. Ki yokumelelavoya yaali eevi? Ddibila Kevin onowogave eegi: “Nahitikina vanlubale nuwoona makalelo Yehova anireelihiye, kale murudda nalaleyesihu nanfwanyesamo muthu mmodha obe abiili. Mbwenye vano napwasedha oolaleya murudda winafwanyeya athu owinjhiva enawoga ewogelo yeKexuwa. Mwaha wa yeyo, iyo nnowanda walaleya athu owinjhiva, teto nnokanna waredhela ni estudu. Ohiya eyo, vano athu owinjhiva enowoona mutugumano.” Mohanganyedha needdaga ni nroromelo, Yehova anonireeliha vanlubale.

17. Ddiniyani ohudheriwe muwari mwa ohudhera wula?

¹⁷ Muwari mwa ohudhera wula nihoona makalelo oodidela weedda ni nroromelo, nafunaga werana dhothoma wodhela muselu dhathima dha mwigumini mwehu. Mbwenye nnohowela odidela weedda ni nroromelo mwadhatedhene mwigumini mwehu. Motajhiha, nafunaga osakula yaredhelo, makalelo oolabihedha mudhidhi wehu, nafunaga werana yothoma wodhela ohudhera wavadhulu ni muselu wowalela ahima. Nafunaga werana yothoma-si-yothoma mwigumini mwehu, nnohowela ohara ohiya baahi ndhe nnandihu woona ni mento ehu, mbwenye nnohowela ohara ndhe dhinanikavihera olibiha wandana wehu ni Yehova, dhoholela dhaye ni mpaganyo ananivahiye yonisamalela ni mukalakala. Nerana ndo, ‘iyo neddege ni mukalakala mu ndina na Yehova, Mulugu ehu.’ — Miq. 4:5.