Nlada na Yehova kanthabwile okwiiva

1. Moyizeji onihile aavi wi oomuroromela Yehova nuwakavihera amwaana Ezarayeli okuma elabo yoWijipitu?

LIVURU na Eberewu nnowawoga athu owinjhiva yamuroromela Yehova. Mmodha waaliwa anasorihiwa di Moyizeji, anna nroromelo nooliba. (Ebe. 3:2-5; 11:23-25) Oliye ahoniha wi ahikanna nroromelo nooliba wodhela wakavihera amwaana Ezarayeli okuma elabo yoWjipitu, ahimovile Farawo vamodha ni anyakoddo aye. Oliye ahimuroromela vanlubale Yehova wodhela wawabusa amwaana Ezarayeli niya yoofila ni waweddiha mwiddeddereni. (Ebe. 11:27-29) Moyizeji ahididela omuroromela Yehova naarive amwaana Ezarayeli amodha yanganyedhaga akala Yehova eere wanda wasamalela aatene. Mbwenye Moyizeji kaathukule manyazo, mwaha wihina Yehova ahavaha yoojha ni manjhe amwaana Ezarayeli mwamakalelo ootikiniha. Nimakalelo yaala, amwaana Ezarayeli yahanda okala mwiddeddereni mune mwahaali manjhe newene yoojha.a — Êxo. 15:22-25; Sal. 78:23-25.

2. Mwahaya bwaddi Yehova adhe amukohege Moyizeji eegi: ‘Onubuwela wihina nlada na Yehova nihithabwa okwiiva?’ (Números 11:21-23)

² Nuuvira yaka modha, amwaana Ezarayeli egakumile Wijipitu, Yehova wapaganya wihina eere wavaha nyama. Naarive Moyizeji amuroromelaga vanlubale Yehova, oliye wambela wikoha akala Yehova eere wanda wakwanihedha mpaganyo ole. Mwaha wihina amwaana Ezarayeli yahithabwa winjhiva, teto mwiddeddereni mune kamwali yoojha. Ki vano, ethu baani Yehova afuniye werana wihina athu aateene ale ekanne yoojha? Wihina aakule nikoho anna Moyizeji, Yehova omukoha eegi: ‘Onubuwela wihina nlada na Yehova nihithabwa okwiiva?’ (Mmwileri Números 11:21-23.)b Versu ela, madhu owi “nlada na Yehova” enagiwana muzimu wotxena, obe nere, kopolo Yehova analabihedhiye wihina erena ethu-sithu. Ni madhu mamodha Yehova afuna amwaddele Moyizeji eegi: ‘We onubuwela wi miyo kaginanda werana ele ginapaganyimi?’

3. Mwahaya bwaddi yopadduwa ya Moyizeji ni yamwaana Ezarayeli enonipatha nihiyoya?

³ Onowabihaga okala oothuwathuwene wubuwelaga akala Yehova anere wanda wusamalela we vamodha ni emudhaawo epaddi yomwilini? Naarive akala we onowabihaga wubuwela wodhela muselu ola obe naari, nikoho Yehova amwereliye Moyizeji nnowupwatha ni weya. Ohudhera wula, nnere woona mwahaya bwaddi Moyizeji ni amwaana Ezarayeli edhe yanganyedhege akala Yehova eere wanda wakwanihedha ele aapaganyiliye. Namala nnere woona malagano a mBibiliyani enaanikavihere olibiha nroromelo nehu nowihina nlada na Yehova kanthabwile okwiiva.

OHUDHERE NI ELE YAPADDUWILE NI MOYIZEJI VAMODHA NI AMWANA EZARAYELI

4. Ddiniyani yapadduwile mudhidhi amwaana Ezarayeli egaali mwiddeddereni?

⁴ Dhithu ndha dhaambele aavi? Amwaana Ezarayeli ni ‘athu owinjhiva yahaali amwaana Ezarayeli’ yanna weedda olenddo mwiddeddereni okuma Wijipitu edhowaga elabo yothomeliwa. (Êxo. 12:38, nota; Deut. 8:15) Muthithi ole waathu yahaali amwaana Ezarayeli wagomana wajha mana ni obajha orekalamari. Voharela, amwaana Ezarayeli owinjhiva obajha werana emodhave. (Núm. 11:4-6) Nlogo nne wambela wubuwela dhoojha yahiliwa Wijipitu. Moyizeji othuwathuwa vanlubale mwaha wa dhithu yawoga nlogo nne ni wubuwelaga wi duliyene ahowela osayela yoojha wihina aavahe aathu ale, mbwenye kaanonne makalelo owerana eyo.— Núm. 11:13, 14.

5-6. Amwaana Ezarayeli yavoloweliwe aavi ni ale yahali amwaana Ezarayeli, ki eyo enanihudhiha ddi?

⁵ Enakala ninga amwaana Ezarayeli yahivoloweliwa ni ekalelo yohitamalela yanna ale yahali amwaana Ezarayeli. Eyo podi onipadduwela nihiyoya peeno. Athu amodha enaapeele yahitamalelaga, iyo podi wambela watajhiha wodhela wambela orekalamari ni ohuhagalala ni dhithu dhatedhene Yehova ananereliye peeno. Teto iyo podi wambela okanna munukwela wa dhithu nannihuna kale ni okalela nrima dhithu enna athu amodha. Mbwenye nahudhera ohagalala ni ndhe ninnihuna nnere okanna murenddele, naarive nigaali athu oohawa obe ooreela.

⁶ Amwaana Ezarayeli yohowela wubuwela mpaganyo wa Yehova wawoga wihina yere okanna dhithu dhatedhene yahoweliwa yafiya elabo yothomeliwa, ohiya yeeddaga mwiddeddereni. Nimakalelo mamodhave, ohiya wubuwelaga dhithu nihinandihu okanna peeno, nnohowela opwasedha wubuwela dhithu Yehova anafuniye onivaha mwilaboni exa. Ohiya eyo, sapama wubuwela dholebela dha mBibiliyani dhinalibiha nroromelo ninnihuna ni Yehova.

7. Ddiniyani enanivaha ebaribari wihina nlada na Yehova kanthabwile okwiiva?

⁷ Mwahaya bwaddi Yehova agawogaga wihina nlada naye ‘kanthabwile okwiiva?’ Podi wera Yehova afuna amukavihere Moyizeji wonelamo wi nlada na Yehova kahiyo nakopolove baahi, mbwenye nihikanna kopolo yowerana ethu-sithu, obe nnere, naarive amwaana Ezarayeli egaali mwiddeddereni, yahinna ethu-sithu wihina yisamalelena, Yehova eere wavaha yoojha okwaranya ele yahoweliwa. Teto Yehova ahoniha kopolo dhaye wodhela ‘nlada naye na kopolo vamodha ni moono waye wotapuwa.’ (Sal. 136:11, 12) Bumwahaya, kanaanganyedhege wi nlada na Yehova podi onfwanya kadda muthu wahiyo, naarive nifwanyiwaga makathamiho bi makathamiho. — Sal. 138:6, 7.

8. Ekalelo baani yabure yonihile amwaana Ezarayeli mwiddeddereni, ki yopadduwa ela enanihudhiha ddi? (Osugwe fotu.)

⁸ Nuuvira mudhidhi Yehova wakwanihedha ele apaganyiliye wodhela wavaha amwaana Ezarayeli balame dhowinjhiva dhinithaniwa abuudhi. Mbwenye amwaana Ezarayeli kiyatamalele wodhela ovahiwa balame ndhe mwamakalelo ootikiniha. Ohiya eyo, amodhaya okala athu owithukula ni anrima wodhela oddoddela nlabo nantero ni meya balame dhowinjhiva. Mwaha wa yeyo, Yehova otakaleliwa vanlubale ofiyedha watoriha amwaana Ezarayeli aale ‘yanna efunelo yabure.’ (Núm. 11:31-34) Yopadduwa ela enonihudhiha wi nnohowela okala pasope wihina nihimothele mmurakoni wa nrima. Naarive akala nili athu oreela obe ohaawa ethu nnahowelihu werana fuwugela “dhoreela dhehu odhulu”. Teto iyo podi werana eyo wodhela olibiha wandana ninnihuna ni Yehova vamodha ni Yesu. (Mat. 6:19, 20; Luk. 16:9) Nerana ndo, nikanne ebaribari wihina Yehova anere onivaha dhatedhene nnahowelihu.

9. Ebaribari baani nnahowelihu okanna?

⁹ Peeno Yehova onotapula nlada naye wihina aakavihere adhaari aye. Eyo kinatapulela wihina nnerege okanna korowa malabo aamateene obe kanindha nifwanyiwaga dala.c Mbwenye ebaribariya nnahowelihu okanna sowihina, Yehova kanadha anisukuma. Oliye anere onivaha kopolo nnahowelihu wihina nande wawanana makathamiho bi makathamiho enanifwanya. Bumwahaya nnohowela ororomela wi Yehova anere otapula nlada naye wi anikavihere onisamalela epaddi yomwilini. Vano kabeni noone dhipaddi biili dhinaanikavihere wooniha wihina nnomuroromela Yehova: (1) Yobajha nafwanyiwaga makathamiho oohukanna korowa ni (2) nampaddaga porogarama wihina nande wisamalela osogolo.

MAKATHAMIHO OHIKANNA KOROWA

10. Iyo podi ofwanyiwa makathamiho baani?

¹⁰ Mwebaribarene mudhidhi nnaddameligihu omakuthulo wa elabo, makathamiho enerege othabwa. Mwaha elabo enna othabwa ogaweya mwaha wa pulitika, ohiwanana, ngovi ni mutipa dhohiyana-iyana dhinakumelela malabo yaala. Teto dhithu ndha podi onithukulela ohikanna korowa, wayelela mabasa obe wubuwelaga otamela mburo mmodhaya. Wihina odidele osamalela emudhaawo dhaapadduwaga dhithu ninga ndha dhisorihiwe, enukavihere ddi werana dhothoma dhapama enoniha wi onororomela nlada na Yehova?

11. Ddiniyani enanikavihera wawanana makathamiho ohikanna korowa? (Lukaji 12:29-31)

¹¹ Ethu yobajha nnahowelihu werana ni enakavihera, fulobela wa Yehova nimwaddelaga dhithu dhatedhene dhinanithuwathuwiha. (Pro. 16:3) Teto iyo podi olobela wa Yehova nimulobaga wi anivahe thotho wihina nande werana dhothoma dhapama ni omuloba wi anikavihere okurumusa murima wehu wihina ‘nihithabwege othuwathuwa.’ (Mmwileri Lukaji 12:29-31.) Ohiya eyo, nikanne elemelelo yoolobela wi nihagalalege ni dhithu ninnihuna. (1 Tim. 6:7, 8) Teto nisayelege mmalivuruni mwehu wihina nnone makalelo oowawanana makathamiho oohukanna korowa. Musayitini mwehu jw.org muhukala vidiyu ni artigu dhinawoga wodhela muselu ola wohikanna korowa ni makalelo wakaviheriwa athu owinjhiva.

12. Makoho baani enaanikavihere werana yothoma yapama wodhela emudhi yehu nasayelaga mabasa?

¹² Addibila amodha ehahiya amudhiwa ni ehitamela elabo emodha wi yasayele mabasa. Mbwenye owinjhiva wa aliwa ehonelamo wihina yothoma yeriliwana yohiya emudhiwa kahi yapama. Bumwahaya akala onasayela mabasa, ohunathi warumedha mabasa bi mabasa, kuwubuwelege baahi korowa onakeligiwe, wubuwelege dhithu onafuniwe oyelela epaddi yomuzimuni. (Luk. 14:28) Teto we podi wikoha ohunathi warumedha mabasaya: ‘Gakala wolapela ni emudhaga murala waaga onaakale aavi? Mabasaya enerege ogeenya odhowa omutugumanoni, wapara mabasa oolaleya obe waredha ni addibila?’ Akala oli baabi, sapama wikoha: ‘Ginande aavi walela anaaga “malagano a Yehova” gakala wolapela ni aliwa? (Efe. 6:4) Teto Sapama werana dhothoma dhiniwanana ni mubuwelo wa Yehova ohiya ohara mubuwelo wa amudhawo obe akwawo yahinamuriha Bibiliya.d Ddibila Toni anakala elabo YoAziya, ahiithaniwa ni empereza dhowinjhiva dhakala dhilabo dholapela, teto dhawoga wihina yerege omuliva korowa dhowinjhiva. Ddibila Toni nuulobela wa Yehova ni nuthapanyedha muselu ole ni mwadhiye, oliye othoma oharumedha mabasa ale. Nuwindo oliye wawerana masadduwo wihina ekalegewo ni dhithu vang’ono yanniwana. Vano oliye onowonelamo wi aherena yothoma yapama, bumwahaya oliye onowoga eegi: “Miyo gihikanna oneti wowakavihera athu owinjhiva omunona Yehova, teto anihu enodhiveliwa vanlubale ebaribari. Emudhaaga ehihudhera wihina nahara madhu enafwanyeya va Matewuji 6:33, Yehova kanadha ahiya onisamalela.”

OMPANDDA POROGRAMA WIHINA NISAMALELE OSOGOLO

13. Ethu baani nnahowelihu werana ovanene wihina nikanne ethu-sithu yowisamalelana nuluvala?

¹³ Nroromelo ninnihuna ni Yehova podi wehiwa nubuwelaga makalelo enafuna okala egumi yehu nuluvala. Bibiliya ononikongomedha olaba wihina osogolo nikanne ele nnahowelihu. (Pro. 6:6-11) Bumwahaya yandeyaga sapama okoya mwana korowa, mwaha korowa enoonibarela malabo mamodha. (Ecl. 7:12) Mbwenye kanenye wihina korowa ekale ethu yathima mwigumini mwehu.

14. Yolebela ya Eberewu 13:5 enanikavihera ni makalelo baani ohuthuwathuwa ni osogolo?

¹⁴ Nlabo dhaala Yesu owoga yoladdaniha enoniha wihina muthu anathabwa osayela korowa, wula ahithuwathuwelaga okanna wandana wapama ni Yehova taduwa, teto “vamentoni va Mulugu kahi muthu ooreela.” (Luk. 12:16-21) Mwaha kaavo anonne makalelo enafuna okala egumi yaye mangwaana. (Pro. 23:4, 5; Tiya. 4:13-15) Teto woona wihina nili anamahara a Yesu, nihikanna yoweha emodha, mwinnyene Yesu ohuwoga wihina ole anafuna okala namahara aaga anohowela “ohiya dhoreela dhaaye.” (Luk. 14:33) Siyeyo yapadduwe nsaka noobajha ni makiristawu oJudeya. Aliwa yahididela ohagalala naarive egayelele dhoreela dhewa. (Ebe. 10:34) Peeno addibila owinjhiva ehaayelela mabasa ewa ni dhoreela dhewa mwaha ohivolosiha mpulitikani. (Ovuhu. 13:16, 17) Ddiniyani yakavihera addibila ala werana yothoma eyo? Ethu yakavihere sowihina aliwa yororomela mpaganyo wa Yehova onihina: “Kagidha guhiya ni kagidha gunyanyala.” (Mmwileri Eberewu 13:5.) Bumwahaya kahiyo yabure okoya korowa wihina nisamalele osogolo, mbwenye sapama omuroromela Yehova wihina anere onisamalela yapadduwa ethu nahajhehedhihu.

15. Monelo baani abaabi eli makiristawu enahoweliwa okanna wodhela aniwa? (Osugwe fotu.)

¹⁵ Dhilabo dhimodha anamatelana, enothoma okanna ahima wihina aliwa yuluvala, aniwaya yasamaalele. Enakala ninga anamatelana ayo, ‘enawoona aniwa ninga reforma yewa’ wihina aniwa yaasamalele aliwa yuluvala. Mbwenye Bibiliya anawoga wihina abaabi binahoowela wasamalela aniwa. (2 Kor. 12:14) Ebaribari wi abaabi ayo yuluvala enere ohowela nikavihero na aniwa, teto ahima owinjhiva enohagalala wakavihera makolo ewa. (1 Tim. 5:4) Mbwenye abaabi enamuroromela Yehova ehinona wi ohagalala webaribari, kunadha mwaha walela aniwa wihina mangwaana aliwa yuluvala aniwa yakaviherege ni korowa, mbwenye ohagalala wewa winadha mwaha wakavihera aniwa omulabela Yehova. — 3 Juwa. 4.

16. Ddiniyani abaabi enahoweliwa wahudhiha aniwa wihina ekale owiwegeredhene yunnuwa? (Efeziyu 4:28)

¹⁶ Abaabi mwahudhihaga aninyu makalelo owisamalela, mukale yotajhiha yewa wodhela wawoniha wi munomuroromela Yehova. Mwambele wahudhiha egaali ahimeene wi sapama oviheyana mabasa. (Pro. 29:21; mmwileri Efeziyu 4:28.) Ohiya eyo, mwakavihere wihina yilibihedhege oskola. Teto sapama wasayela malagano a mBibiliyani wihina yakavihere aninyu werana dhothoma dhathotho wodhela muselu dha oskola. Mutholo weenyu okale wakavihere aninyu wihina yandege wisamalela ni wapara mabasa oolaleya. Yandeya aliwa podi okala apiyonero.

17. Ebaribari baani nnahowelihu okanna?

¹⁷ Adhaari oororomeleya a Yehova ehikanna ebaribari wihina Yehova ohukanna kopolo ni efunelo yowasamalela epaddi yomwiilini. Mudhidhi nnathabwigihu waddamela omakuthulo wa elabo ela yabure nnerege ohowela omuroromela Yehova. Naarive epadduwaga ethu-sithu, nikanne ebaribari wihina Yehova anere olabihedha kopolo dhaaye wihina anisamalele. Teto iyo kannanganyedha wihina nlada na Yehova na kopolo, nnere onifwanya ni nnere onikavihera naarive nikalaga mburo bu mburo.