OHUDHERA 14
JHIBO 8 Yehova nikungu nothawelawo
‘Mmusakule . . . munafuninyu omulabelaga’
‘Miyo ni murala waaga, nnaamulabelege Yehova.’ — JOS. 24:15.
DHITHU NNAAHUDHERIHU
Nnere wubuwela dhithu dhinthukulele osakula omulabela Yehova.
1. Ddiniyani nnahowelihu werana neegi nikanne ohagalala webaribari, ki mwahaya bwaddi? (Isaís 48:17, 18)
BAABIHU Yehova anoothabwa onidhivela, teto anafuna wihina nikanne egumi yapama peeno no osogolo. (Ecl. 3:12, 13) Yehova anipaddusile ni dhikalelo dhotikiniha, mbwenye oliye kanivahile dhikalelo wihina nandege withonga nannya, obe neere, ekalelo yothoma ele eli yapama ni yabure. (Ecl. 8:9; Jer. 10:23) Oliye ohunona wihina neegi nikanne ohagalala webaribari, nnohowela omulabela oliye ni oparihedha mabasa ndhe ananihudhihiye. — Mmwileri Isaías 48:17, 18.a
2. Ddiniyani Saddana anafuniye wihina nrumedhege, ki Yehova ahiile ddi wihiha oonihe wi Saddana muliba woota?
2 Saddana anafuna wi nrumedhege wihina enowandeya okanna ohagalala, naarive nihikaviheriwaga ni Yehova ni wihina dhehu podi oneddelaga pama naarive nithongaga nannya. (Gén. 3:4, 5) Wihina Yehova oonihe wi Saddana muliba woota, oliye uhahiya athu wi yithongege yekiwa mudhidhi vang’ono. Teto noonaga dhithu dhabure dhinapadduwa mwilaboni, nnowanda wonelamo wihina athu kivahiwe ekalelo yowinthonga annya. Mbwenye Bibiliya onowawoga alobwana ni ahiyana yaali oohagalala mwaha osakula omulabela Yehova. Yopadduwa enoniha pama eyo sa Yesu. Ohudhera wula, nnere woona mwahaya bwaddi Yesu adhe asakulege omulabela Yehova? Ki mwahaya bwaddi Yehova agahoowela webedhiwa? Namala, nnere wubusedhiwa dhithu dhinthukulele osakula omulabela Yehova.
MWAHAYA BWADDI YESU ADHE ASAKULEGE OMULABELA YEHOVA
3. Ddiniyani Saddana anvahiliye Yesu, ki Yesu aathomile wera ddi?
3 Yesu agaali velaboni yavati ohoowela omusakula muthu afuniye omulabela. Numala obaddiziwa, Saddana onfiyedha Yesu ni onvaha omwene dhaatedhene dhamwilaboni asayelaga makalelo wihina Yesu amwebedhege oliye. Mbwenye Yesu omwaakula eegi: “Ogivenyelevo Saddana! dhihilebiwa: ‘Omwebedhege Mulugu awo Yehova, omulabelege oliyeene baahi.’” (Mat. 4:8-10) Mwahaya bwaddi Yesu adhe eeregena yothoma ela? Kabeni noone dhithu dhaamuthukulele werana yothoma ela.
4-5. Ethu baani yamuthukulele Yesu osakula omulabela Yehova?
4 Ethu enlubale yamuthukulele Yesu osakula omulabela Yehova, waali odhivela winlubale oliye aanniyena ni Ababe. (Juwa. 14:31) Ohiya eyo, Yesu athomile omulabela Yehova mwaha eyo yaali ethu yapama oliye ahoweliye werana. (Juwa. 8:28, 29; Ovuhu. 4:11) Yesu ohunona wi Yehova ntxela na egumi, teto dororomeleya ni doovaha. (Sal. 33:4; 36:9; Tiya. 1:17) Ethu emodhaya sowihina mudhidhi wamuteene Yehova oowoga ebaribari ni Yesu, ohiya eyo, dhithu dhaatedhene aanna Yesu, dhadhela wa Yehova. (Juwa. 1:14) Mbwenye Saddana mwiddani a Yehova, duliye antotele otheega ni okwa. Ohiya eyo, muliba woota teto dhithu dhaatedhene aneriyena anerana ni nrima vamodha ni ntxiga. (Juwa. 8:44) Yesu ohumunona pamadhene Yehova ni Saddana, bumwahaya oliye kanubuwelege okala ninga Saddana ni othoma omurugunuwela Yehova. — Fil. 2:5-8.
5 Ethu emodha emuthukulele Yesu osakula omulabela Yehova sowihina oliye ahinona wi ororomeleya waye were odhana mareeliho apama. (Ebe. 12:2) Ohiya eyo, oliye ahinona wi ahadidele okala oororomeleya, eere otxeniha ndina na Ababe ni eere wanda wamariha makathamiho aamateene anitotenle Saddana.
MWAHAYA BWADDI YEHOVA AGAFWANELELA WEBEDHIWA
6-7. Mwahaya bwaddi athu owinjhiva peeno kinafuna omulabela Yehova, ki mwahaya bwaadi Yehova agafwanelela webedhiwa?
6 Athu owinjhiva kinamulabela Yehova mwaha kinonne dhikalelo dhaye ni kinonelamo makalelo Yehova anaakaviheriye. Ekalelo ela enna athu owinjhiva, enoligana ni ele yanna aathu yahamunonne Mulugu yakala elabo yo Atena murumiwi Pawulo aalaleyiye. — Dho. 17:19, 20, 30, 34.
7 Murumiwi Pawulo wawaddela akudda Atena wihina Mulugu eebaribari “onowavaha athu aatene egumi, muya wovumana ni dhithu dhatedhene.” Vasogolova oliye wawaddela wi: “Mwaha wa oliye nihikanna egumi, nnowiddiginya ni nnokalawo.” Mulugu mpaddusi eerihile wihina “wa mulobwana mmodha, ekumelele athu a malogo,” bumwahaya Yehova baahi dinafwanelela webedhiwa. — Dho. 17:25, 26, 28.
8. Ddiniyani Yehova ahinadhiye erana, ki oliye anoniha aavi wihina anonidhivela?
8 Woona wihina Yehova mpaddusi ni dinafwanelela othongaga elabo yaatene, ahafune eere wawaddihedha athu wihina emwebedhege. Mbwenye oliye kanadha erana eyo. Ohiya eyo, Yehova onowerana dhithu dhinanikavihera wonelamo wi oliye ohukalawo ni onomudhivela kadda muthu, teto anafuna wihina athu owinjhiva ekanne wandana wamukalakala nuliye. (1 Tim. 2:3, 4) Bumwahaya Yehova aganixagiha wihina naahudhihege athu wodhela efunelo yaye ni dhithu dhapama anafuniye wawerela athu. (Mat. 10:11-13; 28:19, 20) Ohiya eyo, Yehova ohegeredha mulogo dhinafwanyeya wapela elabo yaatene wihina nimwebedhegemo ni okaviheriwa ni anamaholela mulogo enna odhivela. — Dho. 20:28.
9. Odhivela wa Yehova winoneya ni makalelo baani?
9 Iyo podi woona odhivela winlubale wa Yehova wodhela makalelo anaweddihiye ale ehinarumedha wi oliye ohukalawo. Motajhiha, muwari mwa yaka dhowinjhiva athu ehisakula okalawo niile enoniwa ninga sapama obe sabure ohiya omwiwelela Yehova. Naarive dhigaali ndo, Yehova onowawoniha opama wodhela wavaha ele enahoweliwa wi ekanne ohagalala. (Mat. 5:44, 45; Dho. 14:16, 17) Teto aliwa podi okanna emudhi, akwiwa oodhivela, ahima ni wajhavo mabasa ewa. (Sal. 127:3; Ecl. 2:24) Ela enowooniha pamadhene wi Yehova onowadhivela athu aatene. (Êxo. 34:6) Vano kabeni nubusedhiwe dhithu dhinthukulele osakula omwebedha Yehova, namala noone makalelo Yehova ananirelihiye mwaha werana yothoma eyo.
MWAHAYA BWADDI NDHE NSAKULEGE OMWEBEDHA YEHOVA
10. a) Ddiniyani enanithukulela omwebedha Yehova? (Matewuji 22:37) b) Ovilela wa Yehova winukavihera ni makalelo baani? (Salmos 103:13, 14)
10 Ndala ninga Yesu, iyo nnamwebedha Yehova mwaha odhivela ninnihuna nuliye. (Mmwileri Matewuji 22:37.) Teto kadda labo nnahudherihu wodhela dhikalelo dhaye nnofuna vanlubale wandana nuliye. Motajhiha, kubuwela wodhela odhivela ni thagaraga dha Yehova. Amwaana Ezarayeli nuuthoma ohimwiwelela, oliye waloba eegi: ‘Kamwerena, ginaloba wihina muhiye dila dhenyu dhabure.’ (Jer. 18:11) Eyo enowooniha wihina Yehova ohunona wi nili athu oohulogomana ni nili nthubi. (Mmwileri Salmo 103:13, 14.)b Wapendda vang’ono wodhela ovilela, thagaraga ni dhikalelo dhimodha dhotikiniha dha Yehova, eyo kinuthukulela okanna efunelo yomulabela oliye nimukalakala?
11. Ethu emodha enanithukulela omwebedha Yehova ddi?
11 Ethu emodha enanithukulela omwebedha Yehova, sowihina ela yothoma yapama nnahowelihu werana. (Mat. 4:10) Teto iyo nihinona wihina mwaha omuroromela Yehova, enere okumelela mareeliho owinjhiva. Ninga motajhiha, nnere okavihera otxeniha ndina na Yehova, wakavihera athu wonelamo wi Saddana muliba woota ni omuhagalasa Yehova. Ohiya eyo, nasakula peeno omulabela Yehova, nnere okana ofuru womulabela! — Juwa. 17:3.
12-13. Ohudhenre ddi ni yopadduwa ya Jane ni Pam?
12 Naarive akala oli mwaana obe muzombwe, we podi okanna odhivela winlubale ni Yehova, teto odhivela oyo onerege wenjhedhedheya mudhidhi waviraga. Kasugwa yopadduwa ya Jane ni Pam,c yaambele omuhudhera Bibiliya egaali ahimene. Pam ambele omuhudhera Bibiliya aganna yaka 10, mbwenye Jane aganna yaka 11. Makolo ewa kiyafuna omuhudhera Bibiliya, mbwenye aliwa orumedha wi aniiwa Pam ni Jane emuhudherege Bibiliya. Ethu yafuniwa sowihina omagomihedho wa sumana Pam ni Jane edhowege wigereja wa makolo ewa. Jane anowoga egi: “Ethu gihudherimi mBibiliyani ni Anamoona a Yehova ehigikavihera oheragana dhithu yerana akwaaga ooskola ninga ojha murombwe dhinaviriganiha ogoogo ni oherana dhithu dhonyakavala.”
13 Nuuvira yaka dhowinjhiva, aliwa okala anamalaleya, nuwindo aliwa okala apiyonero. Naarive egaali apiyonero aliwa yowasamalela makolo ewa woona wihina yahuluvala. Vano yubuwelaga makalelo Yehova aakaviheriye, Jane onowoga eegi: “Miyo gihoona ni mento aaga wi Yehova onowasamalela akwaye ni wihina ‘uhaanona athu aye ninga enawogela yolebela ya 2 Timotiyu 2:19.’” Iyo nihikanna ebaribari wi Yehova onowasamalela ale enasakula omudhivela oliye ni omulabela!
14. Nimakalelo baani madhu ni dhowera dhehu, dhinakaviheriwa otxeniha ndina ni emuthu ya Yehova? (Osugwe fotu.)
14 Nihiyoya nnofuna otxeniha ndina na Yehova mwaha wa dhowoota dhaatedhene aninkedhiwiye. Kubuwela oganna mukwawo othabwiliwe wandana nuliye, teto ali apama, oovaha ni oolevelela. Mbwenye nlabo nimodha onomwiwa muthu amuwogelaga dhithu dhabure. Ethu baani wafuniwe weera? Mohanganyedha weere ombarela mukwawo oyo. Nimakalelo mamodhave, Saddana ni ale enamukavihera enovuwiha dhowoota wihina etakalihe emuthu ya Yehova. Mbwenye iyo nnowerana dhithu dhaatedhene nnandihu wihina nibarele ndina na Yehova, teto nnowoga ebaribari wodhela oliye. (Sal. 34:1; Isa. 43:10) Mwaha wa dhithu nnawogihu ni nnerihuna, nnowoniha wihina nnafuna nimulabele Yehova ni murima wehu waamutene.
We onere okavihera wakihedha ndina na Yehova? (Osugwe ddima 14)d
15. Mareeliho baani murumiwi Pawulo akeliye mwaha osaddula egumaye wihina amulabele Yehova? (Filipensi 3:7, 8)
15 Ohiya eyo, iyo nnohagalala vanlubale mwaha wawerana masadduwo wihina nimuhagalase Yehova, obe wihina nawenjhedhedhe mabasa nnamparelihu. Motajhiha, murumiwi Pawulo aali muthu athima vaari va maJudewu mbwenye oliye othoma ohiya mutholo ole wamuthukulela ovahiwa thima wihina akale namahara a Yesu ni amulabelege Yehova. (Gal. 1:14) Mwaha wa yeyo, oliye aherana dhithu dhotikiniha amulabelaga Yehova, teto uhakela mutholo wothonga ni Yesu Kiristu odhulu. Murumiwi Pawulo kanasinyuwege mwaha yothoma eeriliyena yomulabela Yehova, teto nihiyoya kannadha nisinyuwaga. — Mmwileri Filipensi 3:7, 8.
16. Onahudhera ddi ni yopadduwa ya murogola Juliya? (Osugwe fotu.)
16 Napweha mburo woobajha mabasa a Yehova mwigumini mwehu, oliye anere onireeliha malabo yala nnakalihu ni osogolo. Kasugwa yopadduwa ya murogola dhaala anithaniwa Juliya. Agaali mwaana owibesa jhibo nnikuru dhaala na gereja, thotho dhaaye dhowiba pama ononiwa ni athu amodha ofiyidha oxagihiwa wihina akale namiiba oovuwa. Mwaha wa yeyo, oliye ononiwa ninga namiiba apama naarive agaali namwali, teto oliye owiiba jhibo mburo dhathima. Vano mudhidhi ahudheraga eskola ya jhibo yathambwe ovuwa mudhidhi yoole, mukwaye dhaala ahudheriyena vamodha, omwaddela wihina Mulugu ohukanna ndina, teto ndina nayena di Yehova. Teto nuuvira mudhidhi Juliya obajha omuhudhera Bibiliya dila biili vasumanani. Vasogolova oliye othoma olabihedha mudhidhi ni kopolo dhaaye wihina amulabele Yehova ohiya okala namiiba oovuwa. Mbwenye wihina murogola Juliya erana yothoma ela, kiyaali yookweya. Oliye onowoga egi: “Athu owinjhiva yawoga wi miyo ganna waredhana thotho gannimina yowiba pama, mbwenye ethu gafunimi yaali olabihedha egumaaga wi gimulabele Yehova.” Peeno dhihivira yaka 30 murogola Juliya agerilena yothoma ele. Ki vano oliye ali aavi? Oliye onowoga eegi: “Miyo gili oohagalalene teto gihikanna murenddele mwaha othoma omulabela Yehova. Gihikanna ebaribari wi osogolo Yehova anere wakwanihedha dhofuna dhaatedhene dha mmurimani mwaaga.” — Sal. 145:16.
Omulabela Yehova yakala ethu yathima mwigumini mwehu, nnere okanna egumi yohagalasa (Osugwe ddima 16)e
ODIDELE OMULABELA YEHOVA!
17. Ale ehinamulabela Yehova enahowela wera ddi, ki ale enamulabela Yehova enajheha ddi?
17 Iyo nili omakuthulo wa elabo ela yabure. Murumiwi Pawulo ohuleba eegi: ‘Mwaha ohanle mwanamudhidhi vang’ono,’ teto ‘ole anadha, anere ofiya ni kanaalegele.’ (Ebe. 10:37) Eyo enatapulela ddi? Enatapulela wi ohanle mudhidhi vang’ono wihina athu esakule akala enerege omulabela Yehova obe naari, teto enohowela werana eyo mowaguva. (1 Kor. 7:29) Akala ohusakula omulabela Yehova, okanne ebaribari wi makathamiho enuufwanya ovanene enaakale “a mwana mudhidhi vang’ono.”
18. Ddiniyani Yesu ni Yehova enanikongomedhiwa werana?
18 Yesu ahakongomedha anamahara aye wihina edidele omuhara egumi yewa yaatene. (Mat. 16:24) Akala we onna omulabela Yehova muwari mwa yakadhene, odidele werana eyo ni kuselele omulabela Yehova. Aatene iyo nnohowela olibiha yothoma nerilihuna yodidela omulabela Yehova. Eyo podi ohikala yokweya, mbwenye yothoma ela enohagalasa ni enowadhana mareeliho owinjhiva. Teto nihambela wawakela mareeliho ayo! — Sal. 35:27.
19. Ohudhere ddi ni yopadduwa ya ddibila Gene?
19 Amodha enubuwela wi yasakula omulabela Yehova kinajhevo egumi yewa. Akala we oli muzombwe, onubuwela wi omulabela Yehova winere wuthukulela oyelela dhithu dhowinjhiva? Muzombwe dhaala anithaniwa Gene anowoga eegi: “Miyo gubuwela wi egumi yaaga kinna thima mwaha osakula omulabela Yehova. Yakala ninga akwaaga yera ojhavo egumi yewa mwaha aliwa yodhowa ofestani, yonamorari ni yojogari jogo dhabure. Mbwenye miyo, mabasaaga waali odhowa omutugumanoni ni mmalaleyelo.” Mubuwelo ola wamutotele makathamiho baani Gene? Oliye anawoga egi: “Miyo obajha werana dhithu dhabure moviteya, malabo mamodha yakala ninga dhithu ndhe gerimina dhogihagalasa mbwenye eyo kiyalegele mwaha miyo kagakanna ohagalala weebaribari. Miyo obajha wawubuwela malagano a mBibiliyani gaapwazilimi, vano miyo othoma omuhogolowa omulabela Yehova ni murima waaga waamutene. Okuma mudhidhi yole ofiyedha peeno, ginowoona makalelo Yehova anavuruwaniye kadda nlobelo ginamwerelimi.”
20. Ddiniyani nnahowelihu othoma werana?
20 Salmista dhaala ahimwibela jhibo Yehova eegi: ‘Oohagalala duule munamusakulinyu wihina akale vamodha ni nyu ni wi akalege vaade veenyu.’ (Sal. 65:4) Bumwahaya nnafuna nididele werana yothoma emodhave eerilena Jozuwe, aawogile eegi: ‘Miyo ni murala waaga, nnaamulabelege Yehova.’ — Jos. 24:15.
JHIBO 28 Baani anandane ni Yehova?
a Isaías 48:17 Anawoga di Yehova, namoobola awo, oweela owizarayeli: Miyo Yehova, gili Mulugu awo, ole anuusakulela wuhudhiha ele eri yapama, ole anuweddiha mudila munahoweliwe weddagamo. 18 Kayere oriya wahere wavuruwana malamulo aaga! Mowindo, murenddele wawo wakalege ninga mwihinjhe, vano wogowa wawo ninga wumba wa niya.
b Salmo 103:13 Ndala ninga baabi anaweddeliye thagaraga anaaye, Yehova onowaweddela thagaraga ale enamoova. 14 Mwaha oliye ohunona pamadhene makalelo nipaddusiwihu. Anowubuwela wi nili nthubi.
c Mandina mamodha ehisadduliwa.
d OTAPULELIWA WA FOTU: Muhiyana dhaala aviraga mburo winakosiwa musonkano wigaali amwiddani a Anamoona a Yehova, muhiyana mmodhave aviraga mburo vili Anamoona a Yehova enalaleya ni karinyu wihina anone ebaribari wodhela Anamoona a Yehova.
e OTAPULELIWA WA FOTU: Fotu enooniha dhithu Juliya ahiliye wihina amulabelege Yehova.