OHUDHERA 15
JHIBO 30 Mulugu aaga, mukwaga ni babi
‘Sapama onfiyedha Mulugu!’
‘Mbwenye wa miyo sapama onfiyedha Mulugu.’ — SAL. 73:28.
DHITHU NNAAHUDHERIHU
Nnere woona makalelo oolibiha wandana ninnihuna ni Yehova ni mwahaya bwaddi werana eyo sapama wa iyo.
1-2. a) Ddiniyani enahoweleya wihina okanne wandana wooliba ni muthu di muthu? b) Ohudhera wula nnone ddi?
KAMUBUWELE mukwawo onathabwiwe omudhivela. Wandana weenyu wambele aavi? Podi wera wandana weenyu wambele mwaha ojha mudhidhi wowinjhiva nuliye. Mwaha wa yeyo, ohanda wonelamo makathamiho yanfwannye ni ohunona dhithu oliye anadhiveliwiye ni ahinadhiveliwiye. Ohiya eyo, ohonelamo wi mukwawo ohukanna dhikalelo onathabwiwe otikina ni onofuna okala ninga oliye. Teto odhivela onniwena ni mukwawo oyo, wambele mwaha ojha mudhidhi nuliye.
2 Wihina okanne wandana woliba ni muthu enohowela wilibihedha ni ojha mudhidhi nuliye. Iyo podi owoga wi simodhave enapadduwa naafunaga okanna wandana woliba ni Yehova Mulugu. Ohudhera wula, nnere woona makalelo oodidela olibiha wandana ninnihuna ni Yehova ni mwahaya bwaddi sapama werana eyo. Mbwenye nihinathi, nnere woona mwahaya bwaddi sapama omwaddamela mukwihu athima, Yehova.
3. Mwahaya bwaddi sapama opendda muselu ola wonfiyedha Yehova? Owogemo.
3 Mohanganyedha, onorumedha wi onfiyedha Yehova sapama. Mbwenye opendda pamadhene makalelo onfiyedha Mulugu winanikaviheriwa, winere onithukulela odidela wandana ni Yehova. (Sal. 63:6-8) Motajhiha, athu aatene ehinona wi sapama ojha dhithu dhapama, werana exersisiyu, ogona mudhidhi wowinjhiva ni wang’wa manjhe owinjhiva. Mbwenye yowukulihaya sowihina athu owinjhiva kinavaha thima dhithu ndha, teto enohiya werana dhithu dhaathukulele okanna egumi yapama. Yathimaya sowihina naathabwaga wubuwela dhithu dhinanikavihera okanna egumi yapama, nnokanna efunelo yowerana dhithu dhinanikavihera osamalela pama egumi yehu. Nimakalelo mamodhave, iyo nihinona wi okanna wandana ni Yehova winonikavihera okanna egumi yapama, mbwenye wubuwela mareeliho enadha mwaha wandana ni Yehova podi onthukulela kadda labo osayelaga makalelo oolibiha wandana ninnihuna nuliye. — Sal. 119:27-30.
4. Ddiniyani Salmista asorihiliye va Salmo 73:28?
4 Mmwileri Salmo 73:28.a Enakala ninga Salmo 73 alebiwe ni Azaafe obe mmodha wa nihimo naye, salmista ola aali muLevita athomiwe wihina alebege ninga namiiba mutempulu ya Yehova. Podi wera oliye ahivireliwa yaka dhowinjhivadhene amulabelaga Yehova nuroromeleya. Naarive dhigaali ndo, oliye ahonelamo wi sapama wubuwela ni wawubusedha athu amodha, thima ‘yonfiyedha Mulugu.’ Mbwenye mareeliho baani nnawakelihu nanfiyedha Yehova?
‘ONFIYEDHA MULUGU’ WINOHAGALASA
5. a) Mwahaya bwaddi nigawogaga wi wandana ni Yehova winodhana ohagalala? b) Owoge yopadduwa yawo enooniha wi thotho dha Yehova dhinowukavihera ni dhinowubarela. (Provérbios 2:6-16)
5 Naathabwaga olibiha wandana ninnihuna ni Yehova, nnerege othabwa ohagalala. (Sal. 65:4) Dhihikalawo dhithu dhowinjhiva dhinanthukulela owoga ndo. Motajhiha, namwilerigi Bibiliya ni naparihedhaga mabasa ndhe nnahudherihu mBibiliyani, nnokala athu athotho. Teto thotho ndho, dhinonibarela wihina nihivoloweliwe ni mubuwelo wabure ni dhinonikavihera oherana dhotheega dhinlubale. (Mmwileri Provérbios 2:6-16.) Bumwahaya Bibiliya onowoga eegi: “Oohagalala di muthu yole anafwanya thotho ni [oohagalala di] muthu yole anakanna enonelo.” — Pro. 3:13.
6. Ddiniyani yamuthukulele salimista ola oyelela ohagalala?
6 Ebaribari wi naarive ogandanne ni Yehova, malabo mamodha onerege wukuuwa. Namaleba a Salmo 73 ahiyelela ohagalala mwaha wubuwela dhithu dhihinna thima. Oliye ahitakaleliwa vanlubale ni ahambela wakalela nrima athu abure, mwaha oliye ubuwela wi athu yahanna wandana ni Yehova ni yahawiwelela malamulo aye, banna egumi yapama. Salmista ola ahifiyedha wubuwela dhithu dhohufwanelela. Oliye wambela wubuwela wi athu oowali ni owithukula yaali ooreela ni yahikanna egumi yapama, teto kiyathabwa woona goyi. (Sal. 73:3-7, 12) Oliye othuwathuwa vanlubale ofiyedha wikohaga akala mabasa ampareliye Yehova yahikanna thima. Iyo podi wonelamo wi ahukuuwa vanlubale mwaha wa madhu awogiliye eegi: ‘Mwebaribarene, gitxenihe murima waaga ebewene ni onawa mada aaga gonihaga wi kaginna muladdu.’ — Sal. 73:13.
7. Ddiniyani nnahowelihu werana nakala owukuwene? (Osugwe fotu yavakapani.)
7 Naarive salmista ola agathabwile wukuuwa, oliye ahisayela osaddula makalelo aaye owubuwela. Oliye ‘nuvolowa mburo woweela wa Mulugu,’ Yehova omukavihera osaddula makalelo aaye owubuwela. (Sal. 73:17-19) Mukwihu Yehova onowoona nakala owukuwene. Bumwahaya nakala owukuwene, nilobele wa Yehova nimulobaga dhoholela dhaye ni nrumedhege nikavihero ananivahiye wodhela Bibiliya ni mulogo. Nerana eyo, nnokanna kopolo wihina nande owanana wukuuwa. Teto nathabwa okala oothuwathuwene ofiyedha ohunona ethu nnahowelihu werana, Yehova anere onitodola ni anere onikavihera okala oopwaseya. — Sal. 94:19.b
Mulevita amulembe Salmo 73, agimenle “tempulu enlubale ya Yehova” (Osugwe ddima 7)
‘ONFIYEDHA MULUGU’ WINONIKAVIHERA OKANNA EGUMI YAPAMA NI EJHEHEDHELO
8. Wawoge mareeliho menli enadha mwaha wandana ni Yehova?
8 Ehikalawo mareeliho mamodha nawakelihu, enanikavihera wonelamo wihina sapama okanna wandana wapama ni Mulugu. Oobajha, sowihina nnokanna egumi yapama. Anabiili, nnokanna ejhehedhelo wodhela osogolo. (Jer. 29:11) Kabeni nthapanyedhe vang’ono wodhela mareeliho ala enadha wodhela muselu ndha biili.
9. Mwahaya bwaddi wandana ni Yehova winonikavihera wonelamo wihina egumi yehu ehikanna thima?
9 Athu owinjhiva peeno enubuwela wi Mulugu kaawo, mwaha wa yeyo, enubuwela wi egumi kinna thima mwaha nlabo nimodha enere okwa. Mbwenye wandana ni Yehova winonikavihera ovaha thima egumi yehu. Omuhudhera Bibiliya winonikavihera wonelamo wi Mulugu “ohukalawo ni onowareeliha ale enamusayela ni murima waatene.” (Ebe. 11:6) Ohiya eyo, Yehova anipaddusile ni efunelo yomulabela oliye, teto naamulabelaga nnokanna ohagalala weebaribari. — Deut. 10:12, 13.
10. Mowiwanana ni yolebela ya Salmo 37:29, Yehova anaapaganya ddi ale enamuroromela?
10 Peeno athu owinjhiva kinna ejhehedhelo yosogolo. Aliwa enubuwela wi ojhavo egumi fulaba, otela, okanna ahima ni okoya mwanakorowa wihina yisamalelena yuluvala. Aliwa kinapwatha akala Mulugu ohukalawo. Mbwenye wa iyo, ejhehedhelo yehu eli ni Yehova. (Sal. 25:3-5; 1 Tim. 6:17) Iyo nnomuroromela Mulugu ali mukwihu, teto nihikanna ebaribari wi oliye anere wakwanihedha dhaatedhene anipaganyiliye. Iyo nnojhehedha dhithu dhapama osogolo thabwathabwa oneti nnafunihu okanna womulabela Yehova nimukalakala mParayizu. — Mmwileri Salmo 37:29.c
11. Mareeliho mamodha nnawakelihu mwaha wandana ni Yehova baavi?
11 Wandana ni Yehova winodhana mareeliho mamodha. Motajhiha, namuthegela Yehova, nuwindo nathwaruwa, Yehova onopaganya onilevelela. (Isa. 1:18) Nimakalelo yala nnokanna egumi yapama nihubuwelaga yothega nerilihuna kale. (Sal. 32:1-5) Ohiya eyo nnokanna ofuru womuhagalasa Yehova. (Pro. 23:15) Mohanganyedha onowawubuwela mareeliho mamodha enadha mwaha okanna wandana ni Yehova. Mbwenye nnande aavi odidela okanna wandana ni Yehova?
ODIDELE ‘ONFIYEDHA MULUGU’
12. Ethu baani weriliwena wihina wandane ni Yehova?
12 Akala oli mukiristawu oobaddiziwa, mohanganyedha oherana dhithu dhowinjhiva wihina wandane ni Yehova. Ohiya eyo, uhudhera dhithu dhowinjhiva wodhela Yehova ni Yesu Kiristu, ohuthwaruwa mwaha wa dhothega dhawo ni ohoniha wi onomuroromela Mulugu. Teto ohilibihedha vanlubale wi werena efunelo ya Mulugu. Mbwenye wihina okanne wandana woliba ni Yehova onohowela odidela werana dhithu ndha. — Kol. 2:6.
13. Owoge dhithu tharu dhinanikavihera odidela ofiyedha Yehova?
13 Ddiniyani enaanikavihere odidela onfiyedha Yehova? Ethu (1) nnohowela odidela omwileri ni omuhudhera Bibiliya. Mbwenye efunelo yehu kikale ohudhera dhithu dhokweya wodhela Mulugu. Nnohowela osayela wonelamo makalelo Yehova anubuweliye, dhithu anafuniye wi neregena, nuwindo nilibihedhe oparihedha mabasa mwigumini mwehu. (Efe. 5:15-17) (2) Nnohowela olibiha nroromelo nehu wodhela opendda makalelo Yehova anonihiye wi anonidhivela. (3) Nnohowela odidela widda dhithu dhinamutakalela Yehova ni ohandana naathu enerana dhithu aniidda Yehova. — Sal. 1:1; 101:3.
14. Ddiniyani nnahowelihu werana kadda labo wihina nimuhagalase Yehova? (1 Korintiyu 10:31) (Osugwe fotu.)
14 Mmwileri 1 Korintiyu 10:31. Sapama wilibihedha werana dhithu dhinamuhagalasa Yehova. Eyo kinatapulela woona mutugumano ni wapara mabasa oolaleya baahi, mbwenye enovolowelavo dhithu nnerihuna kadda labo. Motajhiha, nakala oororomeleya mwa dhaatedhene, nnogaana dhithu ninnihuna naathu amodha, teto eyo enomuhagalasa vanlubale Yehova. (2 Kor. 8:21; 9:7) Yehova anafuna niriihege egumi oli nvaho anivahiliye. Iyo nnowoniha wi nnoriha egumi wodhela ojha ni ong’wa mwamakalelo oopimeleleya ni osamalela egumihu mwamakalelo mamodha. Nilibihedhaga wi nimuhagalase Yehova naarive neragana dhithu dhinakala ninga dhing’ono, odhivela Yehova anniyena ni iyo, onerege wenjhedhedheya vamlubale. — Luk. 16 :10.
Makalelo oomuhagalasa Yehova baala, weedda nubareleya, werana exersisiyu, ojha ni manddile ni okala muthu oovaha (Osugwe ddima 14)
15. Naweddihege athu amodha ni makalelo baani?
15 Yehova onowawoniha opama waye athu owogowa ni oohogowa. (Mat. 5:45) Teto Yehova anajheha wihina nimutajhihege. Motajhiha, iyo ‘kannawoga obure athu amodha, . . . kannawalamuwa ni nnowawoniha opama athu aatene.’ (Titu. 3:2) Naarive muthuya ahimuroromelaga Yehova, iyo kannubuwela wihina nili athimaya ompitha oliye. (2 Tim. 2:23-25) Nawonihaga opama ni naaweddihaga athu aatene ni nriho, nnothabwa omwaddamela Mulugu ehu Yehova.
ODIDELE ‘ONFIYEDHA MULUGU’ NAARIVE OVIRIGANIHAGA
16. Namaleba Salmo 73 iiwoona aavi mwaha wa dhoviriganiha dhaye?
16 Malabo mamodha mwaha wa dhoviriganiha nnerihuna, iyo podi wubuwelaga wihina Yehova ohuninyanyala. Teto siyeyo yapadduwe ni namaleba a Salmo 73. Oliye owoga eegi: “Manyalwaga yaali neena nukwakwathuwa, teto gaahanle neena nuumotha.” (Sal. 73:2) Vasogolova oliye orumedha wihina murima waye waali ninga wa ‘wataduwa,’ ‘kanna enonelo’ ni ‘aali ninga mwanenyama oonyakavala’ vamentoni va Yehova. (Sal. 73:21, 22) Podi wera mwaha wa dhoviriganiha dhaye, oliye ubuwela wi kanna thima vamentoni va Yehova, newene kafwanelela wonihiwa odhivela ni Yehova.
17. a) Mudhidhi athabwiliye wukuuwa, ddiniyani salimista ole eriliyena? b) Ki eyo enanihudhiha ddi? (Osugwe fotu.)
17 Akala salmista ole ubuwela wihina ahiyelela wandana aanniyena ni Yehova, mohanganyedha oliye ahanda ogonjhiha mubuwelo ole. Enakala ninga mudhidhi aathabwiliye wukuuwa waali mudhidhi yole ooneliyemo wihina sathima omwaddamela Yehova. Bumwahaya oliye adhe amwaddelege Yehova eegi: ‘Vano, gili ni nyu [Yehova] mudhidhi waatene; muhuparela moono waaga woojha. Munogiholela ni dhoolaga dhenyu, teto munere ogeddiha ni nthithimiho.” (Sal. 73:23, 24) Nihiyoya nnohowela omoona Yehova ninga nibwe, nnanikavihera okala txithi nakwerebeya obe nayelela kopolo. (Sal. 73:26; 94:18) Naarive akala nimusukume Yehova muwari mwa mudhidhene iyo podi ohogolowela okanna wandana nuliye, mwaha nihinona wi “dowaguva olevelela.” (Sal. 86:5) Nasegedheya obe nayelela kopolo, nnohowela onfiyedha Mulugu ehu.— Sal. 103:13, 14.
Nakwerebeya epaddi yomuzimuni, nnohowela onfiyedha Yehova wodhela werana dhithu dhowinjhiva dhomuzimuni (Osugwe ddima 17)
KUSELELE ‘ONFIYEDHA MULUGU’
18. Mwahaya bwaddi nigahowela odidela olibiha wandana ninnihuna ni Yehova ni mukalakala?
18 Iyo podi odidela olibiha wandana wehu nimukalakala. Nnawoga ndo, mwaha Bibiliya anawoga wihina thotho, enonelo vamodha ni dila dha Yehova dhihithabwa ‘ooddiha.’ — Rom. 11:33.
19. Salmista ola ananivaha ebaribari baani?
19 Salmo 79:13 anihina: ‘Iyo nlogo nenyu, mambila a munikolani mweenyu, nnowutamalelani ni mukalakala, teto nnerege ovuwiha nthithimiho nenyu ni malogo aatene enadhegewu.’ Wathoma onfiyedha Mulugu, niweya onere oreelihiwa nimukalakala. Teto ndala ninga salmista ole, we onere owoga weegi: ‘Mulugu thi nibwe na murima waaga ni epaddi yaaga yapama yamukalakala.’ — Sal. 73:26.
JHIBO 32 Osakule epaddi ya Yehova!
a Salmo 73:28 Mbwenye wa miyo sapama onfiyedha Mulugu. Giheriha wihina Namathonga munlubale nabwiya Yehova okala nikungu naaga noothawelawo wihina gaavuwihe mabasa aye.
b Ale eli owukuwene, oothuwathuwene ni ookwerebeyene muwari mwa mudhidhi wowinjhiva podi wera enohowela nikavihero naamediku. Wihina onone muselu dhimodha, omusugwe Namasugwera, N.° 1 2023.
c Salmo 37:29 Athu owoma murima enere ovahiwa elabo yavati wihina ekalegemo malabo amatene.