Iyo kannakalege yeekihu

1-2. a) Ddiniyani enanithukulela owoga wihina kanili yekihu? b) Ohudhera wula nnonne ddi?

NAFWANYIWAGA makathamiho manlubale, iyo podi wiwoonaga ninga nili yekihu, ninga nili mmwanddeyani mung’ono vaari va niya, teto wigaali nipevo ninlubale. Mbwenye, ebaribariya sowihina iyo kanili yekihu. Babihu odhivela Yehova anowawona makathamiho aatene enanifwanya, teto ohiya wawonave, oliye anonikavihera wihina nande wawanana. Ohiya eyo, Yehova anonipaganya nuudhivela waye waatene eegi: ‘Miyo ginere wukavihera.’ — Isa. 41:10.

² Ohudhera wula, nnere woona dhithu nayi Yehova aneriyena wihina anisamalele (1) oliye anoniholela, (2) anonivaha ele nahowelihu, (3) anonibarela, ni (4) anonitodola. Naarive nifwanyiwaga makathamiho ohiyana-iyana mwigumini wehu, Yehova ononipaganya wihina kanadha anidduwalaga ni kanadha anisukumaga. Bumwahaya iyo kannakalege yekihu.

YEHOVA ANONIHOLELA

3-4. Yehova anaholela aavi nlogo naye peeno? (Salmo 48:14)

³ Mmwileri Salmo 48:14. Yehova ohunona wihina iyo kananda wiholela yekihu, bumwahaya nnohowela dhoholela dhaye. Yehova anaholela aavi nlogo naye peeno? Vobajha oliye anomulabihedha Bibiliya wihina aniholele. (Sal. 119:105) Teto Yehova onomulabihedha Bibiliya wihina anihudhihe werana dhothoma dhapama ni okanna dhikalelo dhinanikavihera okanna egumi yohagalala ovanene ni egumi yohimala osogolo.a Motajhiha, oliye anonihudhiha ohikoya ntxiga, okala ororomeleya ni wadhivela amodha ni murima wehu wamutene. (Sal. 37:8; Ebe. 13:18; 1 Ped. 1:22) Neragana eyo, nnere okala ababi apama, anamatela obe anamateliwa apama ni nnokanna wandana wapama naathu amodha.

⁴ Ohiya eyo, Yehova ohenya wihina mBibiliyani dhilebiwemo dhopadduwa dhaathu yaafwanyiwe makathamiho enaligana ni ehu. (1 Kor. 10:13; Tiya. 5:17) Nilerigi dhopadduwa ndha ni naparihedhaga mabasa mwigumini mwehu dhithu nnahudherihu, dhinere onikavihera mwamakalelo menli. Yobajha, nnowonelamo wihina kanili yekihu, mwaha wihina athu amodha yahifwanyiwa makathamiho oligana ni ehu ni yahanda wawanana ni wavilelana nnikavihero na Yehova. (1 Ped. 5:9) Yanabili, nnohudhera makalelo owawanana makathamihu ehu ni odidela okala oohagalalene. — Rom. 15:4.

5. Yehova anamulabihedha aani wihina eniholele?

⁵ Yehova anowalabihedha addibila ni arogola wihina aniholele.b Motajhiha, anameeddela mulogo enowaredhela mulogo dila dhowinjhivadhene wihina yalibihe addibila. Teto mwaha dhewa dhinolibiha nroromelo nehu ni dhinonikavihera odidela okala owiwanana. (Dho. 15:40–16:5) Anamaholela mulogo, enowilibihedha vanlubale wihina emukavihere kadda namalaleya olibiha nroromelo naye. (1 Ped. 5:2, 3) Teto ababi enowahudhiha aniwa omudhivela Yehova, werana dhothoma dhapama ni okanna dhilemelelo dhapama. (Pro. 22:6) Ohiya eyo, arogola owithwelavo epaddi yomuzimuni, enowakavihera anamwali wodhela wawoniha yotajhiha yapama, enowavaha dholaga dhinakavihera ni dhinaalibiha. — Tito 2:3-5.

6. Onoonihe aavi wi onotamalela wodhela dhithu dhatedhene Yehova anuwereliye wihina uholele?

⁶ Yehova anoniholela wodhela werana epaddi yaye. Ki onoonihe aavi, wi onotamalela wodhela dhithu dhatedhene Yehova anuwereliye wihina uholele? Yolebela ya Provérbios 3:5, 6 enihina: ‘Omuroromele Yehova ni murima wawo waatene; kuroromele enonelo yawo.’ Werana eyo, ‘oliye anere wogolela dila dhawo.’ Eyo enatapulela wihina Yehova anere wukavihera warabela makathamiho owinjhiva ni okanna egumi yohagalasa. Nnotamalela vanlubale mwaha Yehova ohumunona kadda muthu wahiyo ni anonivaha dholaga nuudhivela! — Sal. 32:8.

YEHOVA ANONIVAHA ELE NNAHOWELIHU

7. Yehova ananivaha nimakalelo baani dhithu nnahowelihu? (Filipensi 4:19)

⁷ Mmwileri Filipensi 4:19. Ohiya oniholelave baahi, Yehova anonivaha ele nnahowelihu. Nimakalelo baani? Yehova onoreeliha wilibihedha wehu wihina nikanne yoojha ya kadda labo, yowara ni mburo vokalavo. (Mat. 6:33; 2 Tes. 3:12) Kahiyo yabure othuwathuwela dhithu ndha, mbwenye Yehova anonaddela wihina kanithabwege othuwathuwa. (Osugwe nota Matewuji 6:25.) Teto Yehova anopaganya wihina kanadha aasukumaga adhaari aye oororomeleya yahowelaga nikavihero. (Mat. 6:8; Ebe. 13:5) Nnohowela ororomela ni okanna ebaribari wihina Yehova anere onivaha ele nnahowelihu.

8. Yehova amukavihere aavi Davidi?

⁸ Kasugwa makalelo Yehova amukaviheriye Davidi. Dhahivira yaka dhowinjhivadhene Davidi amuthawaga mwene Sawuli. Mudhidhi yole worusa Yehova ahivaha Davidi vamodha ni alobwana aye dhithu yahoweliwa wihina ekalewo. Davidi nowubuwela makalelo Yehova amukaviheriye muwari mwa yaka ndha dhatedhene, oliye oleba eegi: ‘Gaali muzombwe vano gihuluvala, mbwenye kaginamonege muthu owogowa agasukumiwe, newene anaaye esayelaga yojha.’ (Sal. 37:25) Podi wera we uhonelamo odhivela wa Yehova wodhela woona makalelo usamaleliye ni asamalenliye addibila amodha mudhidhiworusa.

9. Yapadduwa ngovi, Yehova ananivaha ele nnahowelihu nimakalelo baani? (Osugwe fotu.)

⁹ Yapadduwa ngovi Yehova anonivaha ele nahowelihu. Motajhiha, makiristawu ansaka noobajha nufwanyiwa dala enlubale oJeruzale, makiristawu adhilabo dhohiyana-iyana wakavihera addibila ale ni dhithu yanniwana. (Dho. 11:27-30; Rom. 15:25, 26) Peeno nlogo na Yehova enowerana emodhave yapadduwa ngovi. Motajhiha, Yehova anowalabihedha addibila ohiyana-iyana wihina aakavihere addibila efwanyiwe ngovi wodhela wavaha dhoojha, manjhe, dhowara ni murombwe. Teto addibila enamaga Nyumba Dhomwene enowakavihera addibila ala wodhela owomihedha nyumba dhewa ni owomihedha Nyumba Dhomwene dhinongiwe ni ngovi. Ohiya eyo ddibila, kinalegela wakavihera epaddi yomubuweloni ni yomuzimuni ale eyelele nyumba dhewa ni muthu enamudhiveliwa muukwani.c

10-11. Ohudhere ddi ni yopadduwa ya Borys?

¹⁰ Yehova, Mulugu oovaha. Mwaha wa yeyo, oliye anowasamalela naaleya ehinamulabela. Iyo podi, omutajhiha Yehova wodhela wawoniha opama naaleya ehili Anamoona a Yehova. (Gal. 6:10) Dila dhowinjhivadhene naaweddihaga athu nuupama, eyo enovaha onamoona. Kasugwa yopadduwa ya Borys ali diretori a eskola yoUkaraniya. Naarive Borys ahili Namoona a Yehova, oliye onowaweeddiha nuupama anaskola eli Anamoona a Yehova ni onoriha dhithu enarumedhiwa. Vano murudda wakala Borys nufiyawo koddo, oliye othawela murudda mmodhaya wobareleya wahaali koddo. Nuufiya mburo yole, addibila omukavihera, nuwindo oliye woona muthupo wowubuwela okwa wa Yesu. Vano ubuwelaga dhithu dhatedhene addibila emwereliwa, oliye anowoga eegi: “Anamoona a Yehova yogipwatha ni yahigisamalela vanlubale. Mwaha wa yeyo, miyo ginohowela watamalela vanlubale.”

¹¹ Iyo podi otajhiha thagaraga dha Yehova wodhela wawoniha odhivela athu aatene enahowela nikavihero ni aleya ehinamulabela Yehova. (Luk. 6:31, 36) Iyo nnafuna wi dhikalelo dhehu dhapama, dhaathukulela athu onfiyedha Yehova. (1 Ped. 2:12) Mbwenye naarive athuya yahivahaga thima dhithu nnawerelihu, iyo nnohagalala mwaha “ovaha winothabwa ohagalasa opitha ovahiwa.” — Dho. 20:35.

YEHOVA ONONIBARELA

12. Yehova aapaganyile ddi adhaari aye? (Salmo 91:1, 2, 14)

¹² Mmwileri Salmo 91:1, 2, 14. Malabo yala a peeno, Yehova onopaganya obarela nlogo naye epaddi yomuzimuni, obe nere, onowakavihera adhaari aye okanna wandana woliba nuliye. Yehova kanadha ahiya wi Saddana amarihe webedha webaribari. (Juwa. 17:15) Bumwahaya nnohowela okanna ebaribari wi mudhidhi wa mahoso manlubale, Yehova anere wakwanihedha mpaganyo eriliyena woobarela nlogo naye epaddi yomuzimuni ni yomwilini. — Ovuhu. 7:9, 14.

13. Yehova anambarela aavi kadda mudhaari aye?

¹³ Yehova anambarela aavi kadda mudhaari aye? Oliye onombarela kadda mudhaari wodhela omulabihedha Bibiliya wihina anikavihere ohiyaniha ele eli yapama ni yabure. (Ebe. 5:14) Naaparihedha mabasa malagano a mBibiliyani, nnobareliwa epaddi yomuzimuni ni yomwilini. (Sal. 91:4) Teto Yehova onoonibarela alabihedhaga mulogo. (Isa. 32:1, 2) Addibilihu enomudhivela vanlubale Yehova, mwaha wayeyo, enowaparihedha mabasa malagano a Yehova mwigumini mwewa. Nakala naliwa, enoonilibiha ni enonivaha kopolo wihina nande owanana dhikalelo dhabure dha elabo ela. — Pro. 13:20.

14. a) Mwahaya bwaddi Yehova kananibarela mwamakathamiho aatene enanifwanya? b) Yolebela ya Salmo 9:10, enanipaganya ddi? (Osugwe nota.)

¹⁴ Ebaribari wi kale Yehova ahaabarela adhaari amodha epaddi yomwilini. Mbwenye, owinjhiva yahonihiwa goyi ofiyedha okwa mwaha wa dhithu dhohiyana-iyana. Teto peeno iyo podi ofwanyiwa makathamiho mwaha wi ‘mudhidhi rurumusa.’ (Ecl. 9:11) Ohiya eyo, adhaari amodha a Yehova yahiharahariwa ofiyedha opiwa, teto eyo podi onipadduwela nihiyoya peeno. Yehova anowenya dhithu ndha onipadduwela wihina onihe wi Saddana muliba woota. (Jó 2:4-6; Mat. 23:34) Malabo mamodha Yehova podi ohinibarela mwamakathamiho enanifwanya. Mbwenye Yehova onopaganya wihina Yehova kanadha aasukuma ale enamudhivela.d — Sal. 9:10.

YEHOVA ANONITODOLA

15. Namwilerigi Bibiliya, nalobelaga ni noonaga mutugumano, Yehova ananitodola aavi? (2 Korintiyu 1:3, 4)

¹⁵ Mmwileri 2 Korintiyu 1:3, 4. Malabo mamodha, nnowanana wukuuwa mwaha wa omuyelela muthu nnamudhivelihu muukwani, obe nnothuwathuwa mwaha osegedheya. Podi wera onofwanyiwa makathamiho ohiyana-iyana enuthukulela wubuwela wi oli weka. Nnerege ohukalawo muthu anonelamo dhithu dhinupadduwela? Hee! Yehova anowonelamo pamadhene dhithu dhinupadduwela. Ohiya wonelamove baahi dhithu dhinupadduwela, oliye “anonitodola mmakathamihoni mwehu mwatemwene.” Yehova anerana eyo nimakalelo baani? Nalobelaga wa Yehova nipigireyelaga wihina anikavihere, oliye onoonivaha “murenddele . . . [waaye] onapitha enonelo yaathu.” (Fil. 4:6, 7) Teto namwilerigi Bibiliya, Yehova anonitodola, mwaha wihina Bibiliya anonikavihera wonelamo makalelo Yehova ananidhiveliye ni anonihudhiha okala athu athotho ni anonivaha ejhehedho yohagalasa. Ohiya eyo, mutugumano dhinonilibiha, mwaha dhinonikavihera woona odhivela enna addibila, teto nnolibihiwa ni dhithu nnahudherihu mBibiliyani.

16. Yopadduwa ya Nathan ni Priscilla enanihudhiha ddi?

¹⁶ Kasugwa dhithu dhipadduwile ni Nathan vamodha ni Priscilla enakala elabo ya Wistadu Unidu. Yopadduwa yewa, enowooniha wihina Yehova onomulabihedha Bibiliya wihina anitodole ni anilibihe. Yaka dhamundduli, aliwa othoma otamela murudda wahoweleya anamalaleya Omwene. Ddibila Nathan anowoga eegi: “Iyo nahikanna ebaribari wi Yehova eere oreeliha wilibihedha wehu.” Mbwenye nufiya murudda wahoweleya anamalaleya, aliwa wambela ofwanyiwa makathamiho a oredda ni ohukanna korowa. Mwaha wa yeyo, nuuvira mudhidhi aliwa ohogolowela vadeviwa. Mbwenye aliwa odidela wawanana makathamiho ohukanna korowa. Ddibila Nathan ubuwelaga dhithu dhaapadduwile mudhidhi yole, anowoga eegi: “Yehova kaanireelihile ninga nubuwelihu. Mwaha wa yeyo, miyo wambela wikoha geegi: Dhithu ndha dhinanipadduwela mwaha wa ddi? Niviriganihile vaavi?” Nuuvira mudhidhi, Nathan ni mwadhiye Priscilla wonelamo wihina Yehova kaasukumile mudhidhi yole yahoweliwa nikavihero. Nathan anowogave eegi: “Mudhidhi yole worusa Bibiliya akala ninga mukwaaga apama, mwaha wihina ogivaha dholaga dhathotho ni oogilibiha. Okuma mudhidhi yole, iyo wambela osugwa makalelo Yehova anikaviheriye, ohiya wapwasedha wasugwa makathamiho yanifwanya. Werana eyo yahinikavihera wonelamo wi Yehova anere odidela okala epaddi yehu nafwanyiwaga makathamiho mamodha osogolo.”

17. Yehova amutodole aavi murogola Helga? (Osugwe fotu.)

¹⁷ Addibila naarogola ntxela na otodola. Kasugwa yopadduwa ya murogola Helga, anakala elabo yo Ungriya. Muwari mwa yaka dhowinjhivadhene, oliye ahawanana makathamiho ohiyana-iyana yamuthukulela wubuwela wi oliye kanna thima. Vano ubuwela mundduli, oliye anowonelamo wihina Yehova omusamalela aalabihedhaga addibila. Murogola Helga anowoga eegi: “Miyo gohowela olaba, omusamalela mwanaga ali muredda ni gowawanana makathamiho mamodhaya. Yehova owoona wihina gaali nenne nuyelela kopolo dhaaga dhatedhene, mwaha wa yeyo, oliye ogikavihera. Kavo nlabo navira, Yehova ahakwanihedhe mpaganyo waye wogitodola. Dila dhowinjhivadhene oliye oweresana eyo aalabihedhaga madhu apama ni oohagalasa aaddibila. Mudhidhi gahowelimi nikavihero, gowakelesa mensaje, kartawu obe madhu otamalela aaddibila.”

18. Nnande aavi watodola athu amodha?

¹⁸ Naatodolaga amodha, nnamutajhiha Mulugu ehu, teto ola oneti munlubale. Mbwenye nnande aavi watodola athu amodha? Nnere wanda watodola wodhela wavuruwana nuuvilela, owoga mwamakalelo oolibiha ni wakavihera yahowelaga. (Pro. 3:27) Iyo nnowilibihedha watodola athu aatene enoona goyi, naaleya ehinamulabela Yehova. Amwanddamani ehu yakweliwa, yakala aredda obe akala eli oothuwathuwene, nnafuna nawaaredhele wihina navuruwane ni nawonihe dholebela dholibiha dhinafwanyeya mBibiliyani. Omutajhiha Yehova ali “Mulugu ootodola waateweene” winodhana mareeliho owinjhiva. Iyo podi wakavihera addibilihu wi ekale athu oovilela ni oodahinya murima wa ale ehinamulabela Yehova wihina ekanne efunelo yohudhera ebaribari. — Mat. 5:16.

YEHOVA KANAHIYEGE OKALA EPADDI YEHU

19. Yehova ananisamalela aavi, ki nnaamutajhihe ni makalelo baani?

¹⁹ Yehova onothabwa wathuwathuwela ale enamudhivela, teto oliye kananisukuma nafwanyiwaga makathamiho. Mwebaribarene Yehova anonisamalela ndala ninga baabi anamusamalela mwanaye nuudhivela. Ohiya eyo oliye ononiholela, onoonivaha ele nnahowelihu, onoonibarela ni onoonitodola. Iyo podi omutajhiha baabi oodhivela Yehova wodhela wakavihera ni walibiha ale enafwanyiwa makathamiho. Ebaribari wi mudhidhi nnakalegihu malabo ala abure, nnerege ofwanyiwa dhoweha ni makathamiho. Mbwenye iyo podi oororomela wihina Yehova anerege okala epaddi yehu, mwaha wihina oliye ohupaganya eegi: ‘Kuwoove, miyo giri ni we.’ (Isa. 41:10) Bumwahaya kananganyedhe! Iyo kannakalege yeekihu.