Nnande aavi ovaha yolaga

1. Baani anahowela ovaha yolaga, ki mwahaya bwaddi?

WE ONODHIVELIWA ovaha yolaga? Amodha enohagalala mwaha werana eyo. Mbwenye amodha enowoova, teto amodha kinakanna efunelo yowavaha yolaga athu amodha. Naarive dhigaali ndo, iyo aatene nnohowela ovaha yolaga. Mwahaya bwaddi? Mwaha Yesu ohuwoga wihina anamahara aye eebaribari yerege ononiwa mwaha wonihana odhivela mmodha ni mukwaye. (Juwa. 13:35) Teto makalelo mamodha owoniha odhivela wula, fuudhela wavaha dholaga addibila ni arogola enahowela olagiwa. — Pro. 27:9.

2. Ddiniyani anamaholela mulogo enahoweliwa onona werana, ki mwahaya bwaddi? (Osugwe kwaduru enna musolo “Dholaga dhinavahiwa vamutugumanoni wa vaari va sumana.”)

² Anamaholela mulogo enohowela onona ovaha dholaga dhapama. Mwaha Yehova ni Yesu ehathoma alobwana ala wihina eholelege mulogo. (1 Ped. 5:2, 3) Teto makalelo apama anamaholela mulogo ovaha dholaga dhinadhela mBibiliyani, bumudhidhi yawogaga mwaha wavathaddo. Teto aliwa enohowela onvaha kadda ddibila dholaga anahoweliye ni aleya esukume nikuru na Yehova. Ki anamaholela mulogo vamodha nihiyoya, nnande aavi ovaha dholaga dhapama?

3. a) Nnande aavi ohudhera ovaha dholaga dhapama? (Isaías 9:6; Osugwe kwaduru enna musolo “Omutajhihe Yesu wavahaga yolaga.”) b) Ohudhera wula nnone ddi?

³ Iyo podi ohudhera makalelo oovaha dholaga dhapama wodhela ohudhera dhopadduwa dhinafwanyeya mBibiliyani, thabwa-thabwa yopadduwa ya Yesu. Motajhiha, mBibiliyani Yesu onowithaniwa ninga ‘Namalaga ootikiniha.’ (Mmwileri Isaías 9:6.) Ohudhera wula, nnere woona ethu baani nnahowelihu werana negi nivahe yolaga nilobiwihu ni nnere woona ethu baani nnahowelihu werana negi nivahe yolaga nahilobiwihu. Teto nnere woona mwahaya bwaddi sapama ovaha yolaga mudhidhi wofwanelela ni mwamakalelo apama.

NAVAHAGA YOLAGA NILOBIWIHU

4-5. Muthu aniloba yolaga, ethu baani nnahowelihu wikoha? Owoge yotajhiha.

⁴ Muthu di muthu aniloba yolaga nikalege aavi? Podi wera onere ohagalala mwaha muthu oyo onowuroromela ni mohulegela onere onvaha yolaga anahoweliye. Mbwenye nihinathi onvaha yolaga nnohowela wikoha, ‘Gerege miyo gili muthu oofwanelela wi ginvahe yolaga wodhela muselu anawogiye?’ Malabo mamodha, sapama omukavihera muthuya wodhela ohinvaha yolaga, mbwenye omwaddela muthu anahowela onvaha yolaga ni anonne pama museluya.

⁵ Motajhiha, kamubuwele mukwawo onathabwiwe omudhivela anona wi ohukanna oredda munlubale. Mwaha wa yeyo, oliye anosanyiha makalelo oojha murombwe wa oredda waye. Nuwindo onowuloba wihina omukavihere osakula murombwe anahoweliye olabihedha. Podi wera ohunona murombwe wapama anahoweliye olabihedha, mbwenye we kuli mediku newene kunanvulumusege muthu aanna oredda mmodhave. Akala dhili ndo, makalelo apama oomukavihera mukwawo oyo fumusayela muthu anonne wodhela oreddaya ni dhithu anahoweliye werana wihina avulumuwe.

6. Ethu baani nnahowelihu werana nihinathi ovaha yolaga?

⁶ Naarive wubuwelaga wi onere wanda ovaha yolaga yapama wodhela muselu bu muselu, podi wera yere okala yapama ojheha vang’ono wahinathi onvaha yolaga muthuya. Mwahaya bwaddi? Provérbios 15:28 anihina ‘muthu owogowa onopendda ahinathi waakula’. Ki wubuwelaga wihina ohunona yowakulaya? Naarive dhigaali ndo, sapama osayela mudhidhi wihina olobele, opendde ni osanyihe museluya. Werana ndo, kunanganyedhege wihina yolaga yawo enowiwanana niile Yehova anubuweliye wodhela museluya. Motajhiha, kubuwela wodhela yopadduwa ya namavuhulela Nata.

7. Nnahudhera ddi ni ele yapadduwe ni namavuhulela Nata?

⁷ Awogaga ni namavuhulela Nata, mwene Davidi omwaddela wihina afuna ammagele tempulu Yehova. Mohulegela, Nata omwaddela wihina yothoma yaye yaali yapama. Mbwenye namavuhulela Nata ahinathi omwaakula Davidi, yere okala yapama ahere oliye amukoha Yehova wodhela muselu ole. Mwaha wa ddi? Mwaha Yehova kafuna wihina Davidi amage tempulu. (1 Cró. 17:1-4) Yopadduwa ela enowoniha wihina naalobiwa yolaga, ethu yapama nnahowelihu werana, ‘fulegela owoga.’ — Tiya. 1:19.

8. Ddiniyani enaanithukulele okala pasope nihinathi ovaha yolaga si yolaga?

⁸ Kubuwela ethu emodha enaanithukulele okala pasope nihinathi onvaha yolaga muthu di muthu. Kubuwela ogamanle ovaha yolaga, muthuya werana yothoma nuwindo yothomaya omutotela makathamiho. Epaddi modha, nibilina thehu. Mohanganyedha nihikanna dhithu dhinanithukulela wubuwela nihinathi ovaha yolaga si yolaga.

NAVAHAGA YOLAGA NAHILOBIWIHU

9. Yahinathi ovaha yolaga, ebaribari baani anamaholela mulogo enahoweliwa okanna? (Gaalata 6:1)

⁹ Malabo mamodha, anamaholela mulogo enohowela okala oobajha omulaga ddibila obe murogola “anathukula mweddelo wabure wula ahinonaga.” (Mmwileri Gaalata 6:1.) Nota dhaala na versikulu ela, nnawoga wihina muthu athukunle mweddelo wabure wula ahinonaga “anadhowa dila yabure, naarive aherilena yothega.” Bumwahaya mutholo wa anamaholela mulogo, fumukavihera ddibila oyo odidela weedda dila enathukulela egumi yohimala. (Tiya. 5:19, 20) Mbwenye wihina avahe yolaga yapama, namaholela mulogoya onohowela okanna ebaribari wihina muthuya ohuthukula mweddelo wabure wula ahinonaga. Obe nere, akala muthuya kerilena yothoma ninga ele nubuwelihu, kinatapulela wihina yothoma yaye kinamuhagalasa Yehova. (Rom. 14:1-4) Ki namaholela mulogo oonelamo wihina ddibila ohuthukula mweddelo wabure wula ahinonaga ni anohowela ovahiwa yolaga? Ethu baani namaholela mulogo anahoweliye werana?

10-12. Ddiniyani anamaholela mulogo enahoweliwa werana, yaafunaga ovaha yolaga ehilobiwe? Owoge yotajhiha. (Osugwe fotu.)

¹⁰ Podi okala yorusa namaholela mulogo ovaha yolaga ahilobiwiye. Mwahaya bwaddi? Murumiwi Pawulo ohuwoga wihina muthu podi wubuwelaga wi kanahowela olagiwa. Bumwahaya, ethu yobajha namaholela mulogo anahoweliye werana fumwegeredha ole anahowela ovahiwa yolaga.

¹¹ Ovaha yolaga nahilobiwe podi okala ninga odhala mburo vili thaya yoovadda. Muthuya ahinathi odhala, anohowela olima thayaya. Erana ndo, mathakaya enere ofeewa ni enere okala yookweya odhala. Amala odhala, oliye anohowela ohela manjhe wihina akavihere wunnuwawa. Nimakalelo mamodhave, namaholela mulogo aafunaga ovaha yolaga ahilobiwe, oliye onohowela omwegeredha muthuya, ndala ninga namalima. Motajhiha, oliye onosayela mudhidhi wofwanelela wihina amwaddele ddibila anafuniye onvaha yolaga wi onomuthuwathuwela ni onofuna owoga nuliye wodhela muselu dhaala. Akala muthuya anafuna ovaha yolagaya, ohunoniwa ninga muthu apama ni oodhivela, enere okala yookweya orumedha yolaga anafuniye ovaha.

¹² Namaholela mulogo aavahaga yolaga anohowela onyethiha thayaya wodhela omubusedha muthuya wi athu aatene enoviriganiha, teto malabo mamodha nnohowela ovahiwa yolaga. (Rom. 3:23) Ni ndhu napama vamodha ni nriho, mbwenye awogaga mwamakalelo owoneleyamo, namaholela mulogo onomulabihedha Bibiliya wihina amoonihe ddibilaya mweddelo wabure oliye athukuliye ahinonaga. Ddibilaya oonelamo wi uherana yothega, namaholela mulogo onohowela odhala thanga wodhela omwaddela mwamakalelo ookweya dhithu anahoweliye werana wihina ahogolowela okanna wandana wapama ni Yehova. Nuwindo, namaholela oyo onohowela weeka manjhe thangaya wodhela omwaddela dhithu dhapama ddibila oyo aneresiyena ni olobela nuliye. — Tiya. 5:15.

13. Anamaholela mulogo enere ddi wihina yonelemo akala muthuya ohonelamo yolagaya?

¹³ Malabo mamodha, dhithu anawoga muthu anavaha yolaga, podi omuthukulela ole anavahiwa yolagaya ohonelamo pama. Ki anamaholela mulogo enere ddi wihina eyo yahipadduwe? Mwamakalelo apama, aliwa podi omukoha muthuya enanvihiwa yolaga akala ohunelamo yolagaya ni makalelo ooparihedha mabasa yolagaya. — Ecl. 12:11.

OVAHEGE YOLAGA MUDHIDHI WOFWANELELA NI MWAMAKALELO APAMA

14. Mwahaya bwaddi kahi yapama ovaha yolaga nigaali ootakaleliwene?

¹⁴ Aatene iyo nili athu oohilogomana, bumwahaya iyo podi werana obe owoga dhithu dhinaapihe mbani athu amodha. (Kol. 3:13) Bibiliya onowoga wihina iyo podi okala ootakaleliwene ni werana dhithu dhinaathukulele athu okala ootakaleliwene. (Efe. 4:26) Mbwenye nnohowela wilibihedha wihina nihivahe yolaga nigaali ootakaleliwene. Mwahaya bwaddi? Mwaha ‘muthu atakaleliwa kanerana dhithu dhiniwanana ni wogowa wa Mulugu.’ (Tiya. 1:20) Naavahaga yolaga nigaali ootakaleliwene, iyo podi othabwiha dhithudha. Eyo kinatapulela wihina kannahowela owoga ethu nnubuwelihu obe makalelo nilihu ni muthu eerilena ethu enithukulele okala oonyanyuweene. Mbwenye nnande owoga pama najheeha vang’ono wihina nikurumuwe. Teto iyo podi ohudhera werana eyo, ni yopadduwa ya Eliyu.

15. Nnahudhera ddi ni yopadduwa ya Eliyu? (Osugwe fotu.)

¹⁵ Eliyu ahimala malabo owinjhiva anvuruwanaga Jo iwakihedhaga mwaha dhowoota yawoga akwaye araru (3). Mwaha wa yeyo, Eliyu omweddela thagaraga Jo. Mbwenye mudhidhi Jo iwakihedhaga, oliye owoga dhithu dhahaali dheebaribari wodhela Yehova. Mwaha wa yeyo, Eliyu otakaleliwa ni Jo. Naarive dhigaali ndo, oliye ojheha mudhidhi waye wihina awoge. Mwaha wa yeyo, Eliyu ahiwoga mwamakalelo apama ni anriho mudhidhi amulagaga Jo. (Jó 32:2; 33:1-7) Yopadduwa ya Eliyu enonihudhiha ethu yathima. Mudhidhi wapama wovaha yolaga, bu mudhidhi nnakalihu ookurumuwene. Teto makalelo apama oovaha yolaga, fuuwoga ni nriho vamodha nuudhivela. — Ecl. 3:1, 7.

ODIDELE ORUMEDHA NI OVAHA YOLAGA

16. Nnahudhera ddi ni yolebela ya Salmo 32:8?

¹⁶ Yolebela ya ohudhera wula enihina ‘Yehova ononilaga mento aye egaali txithi anisugweraga.’ (Mmwileri Salmo 32:8.) Eyo enowooniha wihina ofiyedha peeno Yehova ononikavihera. Oliye kananivaha baahi dholaga, mbwenye ononikavihera wonelamo makalelo ooparihedha mabasa yolagaya. Ela yotajhiha yapama nnahowelihu ohara! Wakanna ofuru wovaha yolaga, omutajhihe Yehova wodhela ompwasedha muthuya ni onvaha nikavihero anahoweliye wihina eerena yothoma ni thotho.

17. Mwahaya bwaddi sapama okanna anamaholela mulogo enanivaha dholaga dhowoneleyamo dhinadhela mBibiliyani? (Isaías 32:1, 2)

¹⁷ Malabo yaala ookuthula nnakalihu, nnohowela ovaha ni wakela dholaga. (2 Tim. 3:1) Anamaholela mulogo enavaha dholaga mwamakalelo owoneleyamo ni dhinadhela mBibiliyani eli ninga “manjhe ooridha mwiddeddereni”. (Mmwileri Isaías 32:1, 2.) Nakanna mukwihu anonne ethu nnafunihu ovuruwana ni ananaddela ethu nnahowelihu ovuruwana, oliye ananivaha mukono wathima onakala ninga ‘masa a oru egaali mu badejani na parata.’ (Pro. 25:11) Bumwahaya iyo aatene nididele osayela thotho nnahowelihu wihina nivahe ni naakele dholaga dhapama.