OHUDHERA 28
JHIBO 88 Mugihudhihe dila dhinyu
Mwahaya bwaddi nigahowela osayela dholaga?
‘Thotho dhili naale enasayela dholaga.’ — PRO. 13:10.
DHITHU NNAAHUDHERIHU
Nnere woona ethu baani nnahowelihu werana wihina nipurelemo dholaga nnavahiwihu.
1. Mowiwanana ni Provérbios 13:10 ni 15:22 nnande aavi werana dhothoma dhathotho ni weeriha wihina dhothoma dhehu dhineddele pama? (Provérbios 13:10; 15:22)
AATENE iyo nnofuna werana dhothoma dhapama. Teto nnofuna wihina dhothoma ndho dhineddele pama. Mbibiliyani nnofwanyamo dholaga dhinanikavihera werana dhothoma dhapama. — Mmwileri Provérbios 13:10; 15:22.
2. Ethu baani Yehova ananipaganyiye onerela?
2 Ebaribari wihina muthu nnahowelihu omusayela wihina anivahe dholaga dhapama di Baabihu, Yehova. Oliye ononipaganya eegi: ‘Ginere wulaga mento aaga egaali txithi gusugweraga.’ (Sal. 32:8) Madhu ala enowoniha wi Yehova kananivaha dholaga bure-bure, mbwenye ananivaha dholaga nnahowelihu. Ohiya eyo, oliye ononikavihera oparihedha mabasa yolagaya.
3. Makoho baani nnafunihu wawakula muwari mwa ohudhera wula?
3 Ohudhera wula, nnere woona makalelo Bibiliya ananikaviheriye wawakula makoho mannayi: (1) Dhikalelo baani nnahowelihu okanna negi nipurelemo yolaga yapama? (2) Baani anaanivahe yolaga yapama? (3) Nnere ddi wihina naakele yolaga? (4) Mwahaya bwaddi kannahowela waloba athu amodha wihina enithomele ethu nnahowelihu werana?
DHIKALELO BAANI NNAHOWELIHU OKANNA NEGI NIPURELEMO YOLAGA YAPAMA?
4. Dhikalelo baani nnahowelihu okanna neegi nipurelemo dholaga?
4 Wihina nipurelemo yolaga yapama, nnohowela okala athu owiyeviha ni amanddile. Sapama ohuddiwala wi kannone dhithu dhaatedhene nnahowelihu werana naafwanyiwaga ethu-siithu, ni wihina nnohowela nikavihero naathu amodha wihina nerena yothoma yapama naafwanyiwaga makathamiho ehinanifwanyege. Nahikala athu owiyeviha ni amanddile Yehova kanande onikavihera. Yokumelelavoya kannandege woonelamo newene oparihedha mabasa dholaga dhinafwanyeya mBibiliyani. (Miq. 6:8; 1 Ped. 5:5) Mbwenye nakala athu owiyeviha ni amanddile, nnere osayela dholaga dhinafwanyeya mBibiliyani ni oparihedha mabasa mwigumini mwehu.
5. Dhithu baani dhamwerihe mwene Davidi okala muthu owithukula?
5 Kasugwa yopadduwa ya mwene Davidi. Oliye aherana dhithu dhowinjhiva dhotikiniha, mbwenye oliye kanakalege muthu owithukula. Ahinathi okala mwene oliye aali namiiba apama ni aali muthu oovuwa. Teto oliye ahiithaniwa wihina amwibelege mwene. (1 Sam. 16:18, 19) Nuthikitheliwa wihina akale mwene ooharela, muzimu wa Yehova onvaha kopolo Davidi. (1 Sam. 16:11-13) Oliye aali muthu aanoniwe ni athu owinjhiva, mwaha ahaagonjhiha amwiddani aamwaana Ezarayeli, vamodha ni Goliya aali munyakoddo oolapa akopolo amaFilistewu. (1 Sam. 17:37, 50; 18:7) Ahere Davidi akala muthu owithukula, oliye eerege wubuwela wi woona wihina oherana dhithu dhotikiniha, oliye kahowela ovahiwa dholaga. Mbwenye Davidi kubuwela ndo.
6. Nnonne aavi wi mwene Davidi oodhiveliwa wakela dholaga? (Osugwe yavakapani.)
6 Nuukala mwene, Davidi wasakula athu wihina envahege dholaga. (1 Cró. 27:32-34) Ela kiyaali dila yoobajha oliye eeriliyena yothoma ela. Mwaha Davidi ahinathi okala mwene, ahikanna elemelelo yovuruwana dholaga dhaathu amodha. Davidi ahirumedha olagiwa ohiya baahi ni alobwana, mbwenye ni ahiyana ninga motajhiha, Abigayili. Muhiyana ola aateliwe ni Nabale aali mulobwana owithukula, ohitamalela ni ahariha athu amodha. Moohiyana ni Nabale, Davidi aali muthu owiyeviha. Oliye othoma ohara yolaga ya Abigayili yambarele wihina aherena ethu yabure. — 1 Sam. 25:2, 3, 21-25, 32-34.
Davidi ahiyeviha wodhela orumedha ni ohara yolaga aanvahile Abigayili (Osugwe ddima 6)
7. Nnahudhera ddi ni yopadduwa ya mwene Davidi (Eclesiastes 4:13) (Osugwe fotu.)
7 Iyo podi ohudhera ethu-siithu ni Davidi. Motajhiha, iyo podi onona werana pama ethu-siithu obe nikanna oneti wowavaha dhoholela athu amodha. Naarive dhigaali ndo, kanubuwele wi nihinona dhithu dhaatedhene ni kannahowela ovahiwa dholaga. Teto ninga Davidi, sapama orumedha dholaga dhaathu amodha naarive dhidhelaga wa athu nahalemelihu. (Mmwileri Eclesiastes 4:13.) Nerana ndo, podi wera nnere orabela dhithu dhabure dhanitatamulele makathamiho iyo naathu amodha.
Nnohowela ovuruwana dholaga dhapama naarive dhidhelaga wa muthu nihimulemelihu pama (Osugwe ddima 7)c
BAANI ANAAGIVAHE YOLAGA YAPAMA?
8. Mwahaya bwaddi Jonata ahikanna dholaga dhapama wihina anvahe Davidi?
8 Iyo podi ohudhera ethu emodha ni yopadduwa ya Davidi. Oliye oovuruwana dholaga dhaathu yanna wandana wapama ni Yehova ni yanda wonelamo makathamiho yanfwanya. Motajhiha, Davidi nusayela onona ethu ahoweliye werana wihina andane ni mwene Sawuli, oliye othoma ovuruwana yolaga ya Jonata, mwaana a Sawuli. Mwahaya bwaddi Davidi adhe avuruwanege yolaga ya Jonata? Mwaha Jonata ahikanna wandana wapama ni Yehova ni ahanona pama ababe. (1 Sam. 20:9-13) Nnande aavi omutajhiha Davidi?
9. Athu baani nnahowelihu wasayela nahowelaga yolaga? Owogemo. (Provérbios 13:20)
9 Nasayelaga dholaga, sapama omusayela muthu anna wandana wapama ni Yehova ni enanpadduwelaga ethu emodhave ni enanipadduwela.a (Mmwileri Provérbios 13:20.) Motajhiha, kamubuwele ddibila ali muzombwe, anamusayela murogola wihina amutele. Baani aanvahe yolaga yapama? Mukwaye ahitenle podi onvaha yolaga yapama, mbwenye yiwananaga ni malagano a mBibiliyani. Mbwenye yere okala yapama omuloba yolaga ddibila atenle, amunonniye pamadhene ni anamulabela Yehova ni mwariye nuuhagalala. Mwaha ddibila oyo anere omukavihera waparihedha mabasa malagano a mBibiliyani ni anere omwaddela dhithu ahudheriye ni matelo aye.
10. Ddiniyani nnafunihu woona vano?
10 Nihiwoga wodhela dhikalelo biili nnahowelihu okanna, ni muthu baani nnahowelihu omuloba dholaga. Vano nnere woona makalelo ookala ootapuwene wihina nivahiwe dholaga ni akala nnohowela waloba athu amodha wi enithomele dhithu nnahowelihu werana.
NNERE DDI WIHINA NAAKELE YOLAGA?
11-12. a) Ddiniyani nahinahowelihu werana? b) Ddiniyani Robowawu eriliyena mudhidhi afuniye werana yothoma yathima?
11 Malabo mamodha muthu podi osayelaga yolaga, wula agerilena yothoma yaye, ethu anafuniye baahi funfwanya muthu anarumedha ele athomiliye. Muthu owindo kali ootapuwene wihina aakele dholaga. Yopadduwa yabure ya mwene Robowawu enonikavihera okala pasope akala nihikanna emanya yowerana ethu ninga yela.
12 Robowawu aathomiwe ninga mwene, ababe Salomawu nuukwa. Mudhidhi yole, amwaana Ezarayeli yahikanna dhithu dhowinjhiva dhapama. Mbwenye aliwa yubuwela wihina Salomawu owaloba dhithu dhowinjhiva ni owawoniha goyi. Bumwahaya amwaana Ezarayeli odhowa wa mwene Robowawu ni omuloba wihina ajajalihe mutholo wewa. Robowawu waloba mwana mudhidhi wihina asayele makalelo owakavihera. Vobajhavene Robowawu ahambela pama, mwaha ahaloba dholaga athu owunnuwelavo yanvahesa dholaga mwene Salomawu. (1 Reis 12:2-7) Mbwenye oliye othoma ohuparihedha mabasa dholaga dhaathu ale owunnuwelavo. Mwahaya bwaddi oliye adhe ahiparihedhege mabasa? Nerege Robowawu aherana yothoma yaye kale ni amusayela muthu aanvahe yolaga yiwananege niile aathomiliye? Akala siyeyo asayeliye, oliye ahifwanya ethu ahoweliye ni akwaye yaali azombwe yanvahile yolaga. (1 Reis 12:8-14) Oliye ohara yolaga aakenliye ni azombwe akwaye ni owoga ni nlogo dhithu aathomiliye. Yokumelelavoya sowihina athu aatene yahimurugunuwela ni othoma omusakula mwene mmodhaya. Okuma mudhidhi yole odhowa osogolo dhaye kadhamweddela pama. —1 Reis 12:16-19.
13. Nnande aavi onona akala mubuwelo ni murima wehu oli wotapuwene wihina naakele yolaga?
13 Iyo podi ohudhera ethu-sithu niile empadduwele Robowawu. Namuloba muthu di muthu yolaga, nnohowela okala ootapuwene wihina nivuruwane yolaga ananivaha muthuya. Makalelo apama owonelamo akala nili ootapuwene wihina nivuruwane yolaga fuwikoha: ‘Ginokodda ovuruwana yolaga akala kahi yeyo ginafunimi ovuruwana?’ Kabeni noone yotajhiha modha.
14. Ddiniyani nahinahowelihu oddiwala naavahiwaga yolaga? Owoge yotajhiha. (Osugwe fotu.)
14 Kamubuwele ddibila apaganyiwe ovahiwa mabasa yaanvahege korowa dhowinjhiva. Ahinathi warumedha mabasaya, oliye onomusayela namaholela mulogo wihina omulobe dholaga. Ddibila ole onowoga wi mabasa ale enere omuthukulela okala wolapela ni amudhi yaye. Vano namaholela mulogo ononvaha yolaga eniwanana ni malagano a mBibiliyani wi amonelihemo wihina mutholo wa namasogolela eemudhi, fumusamalela mwadhiye vamodha ni anaaye epaddi yomuzimuni. (Efe. 6:4; 1 Tim. 5:8) Vano kubuwela ddibila ole agakoddile yolaga ele ni odidela wasayela athu amodha ofiyedha onfwanya muthu anamwaddele wi onohowela warumedha mabasa ale. Nerege mwebaribarene ddibila ole anasayela yolaga, obe oliye oherana yothoma yaye, mbwenye amusayela muthu ananvahe yolaga eniwanana ni yothoma yaye? Kanidduwale wi murima onoleketha vanlubale. (Jer. 17:9) Malabo mamodha, yolaga nnahowelihu siile nihinafunihu ovuruwana.
Nerege nnasayela yolaga yapama obe nnamusayela muthu anaanivahe yolaga eniwanana ni yothoma yehu? (Osugwe ddima 14)
MWAHAYA BWADDI KANNAHOWELA WALOBA ATHU AMODHA WIHINA ENITHOMELE ETHU NNAHOWELIHU WERANA?
15. Ddiniyani nnahowelihu okala pasope wi naherena? Ki mwahaya bwaddi?
15 Kadda muthu wa iyo ohukanna mutholo wowerana yothoma yaye. (Gal. 6:4, 5) Ninga noonilihu muthu athotho anosayela dholaga dha mBibiliyani ni anowaloba dholaga addibila owithwelavo epaddi yomuzimuni ahinathi werana yothoma. Mbwenye nnohowela okala pasope wihina nihalobe athu amodha, wi enithomele ethu nnahowelihu werana. Athu amodha enowerana eyo wodhela omukoha muthu enamurihiwa yeegi: “Ahakale we yothoma yawo yakale eevi?” Amodha enotajhiha dhothoma dhaathu amodha, naarive ehinonne ethu emuthukulele muthuya werana yothoma eyo.
16. Muselu baani wakumelele oKorintiyu mwaha wa nyama dhakutheliwa dhikwamuthu, ki baani ahowela othoma akala yohowela ojha nyama ndhe, obe naari? (1 Korintiyu 8:7; 10:25, 26)
16 Kubuwela ethu yapadduwe nsaka noobajha. Addibila ooKorintu wambela wanganyedha akala yohowela otakuna nyama yakutheliwe dhikwamuthu. Murumiwi Pawulo walebela addibila ale eegi: “Nihinona wihina mwilaboni dhikwamuthu kadhinna mabasa, teto kawo Mulugu ahili mmodha baahi.” (1 Kor. 8:4) Mwaha wa yeyo, addibila amodha othoma otakuna nyama dhakutheliwa dhikwamuthu ni dhagulihiwa vamerkadu. (1 Kor. 10:25, 26) Teto amodha yahithoma otakuna nyama ndhe, mubuwelo wewa wahanyemelaga. (Mmwileri 1 Korintiyu 8:7; 10:25, 26.) Ela yaali yothoma ya kadda muthu. Murumiwi Pawulo kanaathomelege makiristawu ale, ethu yahoweliwa werana, mwaha kadda muthu wa aliwa eere “wakulela vamentoni va Mulugu.” — Rom. 14:10-12.
17. Ddiniyani enaapadduwe natajhihaga dhothoma dhaathu amodha? Owogwe yotajhiha. (Osugwe fotu.)
17 Nimakalelo baani ethu ninga yela podi opadduwa peeno? Kubuwela wodhela dhipaddi dha nikame. Kadda mukiristawu podi othoma waakela obe naari dhipaddi dha nikame.b Ebaribari wi podi okala ethu yorusa wonelamo wodhela muselu ola, mbwenye werana yothoma ela mutholo wa kadda mukiristawu. (Rom. 14:4) Nathoma otajhiha yothoma ya muthu mmodha, iyo podi okwerebeyiha mubuwelo wehu. Mbwenye iyo podi wooniha wi nili athu athotho nalabihedha mubuwelo wehu oxagihiwe ni Bibiliya. (Ebe. 5:14) Ki vano mudhidhi baani nnahowelihu omuloba dholaga mukiristawu owithwelavo epaddi yomuzimuni? Namala osanyiha museluya ni noonelamo wi nnohowela nikavihero wi noone makalelo malagano a mBibiliyani eniwananiwa ni museluya.
Nisayelege dholaga namala osanyiha pamadhene wodhela museluya (Osugwe ddima 17)
ODIDELE OSAYELA DHOLAGA
18. Ddiniyani Yehova ananereliye?
18 Yehova onowooniha wi ononiroromela wodhela onihiya wihina nerena dhothoma dhehu. Oliye onoonivaha Bibiliya ni akwaye athotho enanikavihera wonelamo makalelo ooparihedha mabasa malagano a mBibiliyani. Nimakalelo yala Yehova anonisamalela ninga Baabi oodhivela. (Pro. 3:21-23) Ethu baani nnahowelihu werana wihina noonihe wi nnomutamalela?
19. Nnere ddi wihina nidhowegeve nimuhagalasaga Yehova?
19 Kabiha wubuwela: Abaabi enodhiveliwa yawoonaga aniwa ethomaga okala adhaari a Yehova owithwelavo, athotho ni enaakavihera athu amodha. Nimakalelo mamodhave, Yehova anohagalala aanoonaga niithwelagavo epaddi yomuzimuni, aanoonaga nisayelaga dhoolaga ni neragana dhothoma dhinamuthithimiha oliye.
JHIBO 127 Gikale munyamuthu baani?
a Malabo mamodha mukiristawu podi omuloba dholaga muthu ahinamulabela Yehova wodhela muselu wa korowa, ospitale ni dhimodha.
b Wihina onone dhithu dhimodha osugwe livuru Ofwanye egumi yohagalasa ya malabo amatene! ohudhera 39 ponto 5 ni “Wegi onone dhithu dhimodha.”
c OTAPULELIWA WA FOTU: Namaholela mulogo amulagaga muthu mmodhaya wodhela makalelo awogiliye omutugumanoni.