Okanne ebaribari wi Yehova onowudhivela

1. Ddiniyani yuthukulele wipeleka wa Yehova? (Osugwe foto.)

ONOWUBUWELA makalelo waaliwe labo wipelekiliwe wa Yehova? Werilena yothoma ela mwaha wahimunona pamadhene ni womudhivela. Teto wahimpaganya Yehova opweha efunelo yaye mburo wobajha mwigumini mwawo ni omudhivela ni murima wawo waatene, emuthu yatene ni mubuwelo waatene ni kopolo dhawo dhaatedhene. (Mar. 12:30) Obajha labo nenno ofiyedha peeno, odhivela wawo onna odhowave wenjhedhedheyaga. Ki waamwakule aavi muthu ahukohe eegi: “We onomudhivela Yehova?” Mohanganyedha weere omwaakula weegi: “Miyo ginomudhivela Yehova opitha ethu-siithu obe muthu di muthu!”

2-3. a) Yehova anafuna wi nikanne ebaribari baani? (Jeremias 31:3) b) Ohudhera wula nnoone ddi?

² Ki muthu ahukohe eegi: “Ohukanna ebaribari wi Yehova onowudhivela?” Were omala mudhidhi wowinjhivene wubuwelaga yowakula ya nikoho nna, wubuwelaga wi kunafwanelela odhivela wa Yehova? Murogola dhaala aafwanyiwe makathamiho ohiyana-iyana agaali mwaana, anowoga eegi: “Miyo gihinona wi ginomudhivela Yehova, teto kaginanganyedha eyo. Mbwenye malabo owinjhiva ginowikoha: ‘Yehova onogidhivela?’” Onande aavi onona akala Yehova onowudhivela obe naari?

³ Yehova anafuna wihina okanne ebaribari wi oliye anowudhivela. (Mmwileri Jeremias 31:3.) Yehova dusakunle wihina omwebedhege. Teto nuwipeleka wa Yehova ni nubaddiziwa, Yehova wuvaha mukono wathima vanlubale oli: odhivela waye wohimala. Eyo enatapulela wi Yehova onowudhivela vanlubale ni kanadha uusukuma. Fudhivela wewula winamuthukulela Yehova wawoona adhaari aye vamodha ni we ninga muthu “avayeka.” (Mal. 3:17, nota) Yehova anafuna wiwonege ninga murumiwi Pawulo. Oliye ahikanna ebaribari wihina Yehova oomudhivela ofiyedha oleba eegi: “Miyo kaginanganyedha wihina newene okwa, newene egumi, newene angero, newene anamathonga, newene dhithu dhiriwo, newene dhithu dhinafuna odha, newene kopolo, newene otaama, newene oddiiha, newene yopaddusa eli yatene, kinande onimwalaniha ni odhivela wa Mulugu.” (Rom. 8:38, 39) Ohudhera wula nnere woona mwahaya bwaddi nigahowela wenjhedhedha ebaribari ninnihuna wihina Yehova ononidhivela ni ethu enaanikavihere ohanganyedha odhivela wa Yehova.

MWAHAYA BWADDI SAPAMA OKANNA EBARIBARI WIHINA YEHOVA ONONIDHIVELA?

4. Nnande aavi owanana murako munlubale wa Saddana?

⁴ Nakanna ebaribari wihina Yehova ononidhivela, nnowanda owanana “murako” mmodha wa Saddana. (Efe. 6:11) Saddana anere werana dhithu dhaatedhene anandiye wihina animwalanihe ni Yehova. Murako mmodha munlubale analabihedhiye fuuwoga wihina Yehova kananidhivela. Kuddiwale wihina Saddana ananiddodda nasegedheya. Oliye ananiddodda nakala ookwerebeyene mwaha wa dhithu dhinipadduwele kale, makathamiho enanifwanya ovanene obe nanganyedhaga dhithu dhinaanipadduwele osogolo. (Pro. 24:10) Saddana ali ninga poddogoma anamuddodda mwanenyama ahikanna kopolo obe ahandaga wibarela. Nakala owukuwene Saddana onopatha mudhidhi yoyo wihina anithukulele wubuwela wihina Yehova kananidhivela. Mbwenye nadidela olibiha ebaribari ninnihuna yowihina Yehova anonidhivela nnere wanda ‘omugonjhiha’ Saddana vamodha ni murako dhaaye.— 1 Ped. 5:8, 9; Tiya. 4:7.

5. Mwahaya bwaddi kannahowela wanganyedha wi Yehova anonidhivela ni onoonivaha thima?

⁵ Nakanna ebaribari wihina Yehova ononidhivela nnere wanda onfiyedha oliye. Mwahaya bwaddi nigawogaga ndo? Mwaha Yehova anipaddusile ni ekalelo yowadhivela athu ni wihina athu amodha enidhivelege. Muthu anoonihaga odhivela nnokanna efunelo yomooniha odhivela wehu. Bumwahaya noonelamo wihina Yehova ononidhivela nnokanna efunelo yomooniha odhivela wehu. (1 Juwa. 4:19) Teto naathabwaga omudhivela Yehova, nuliyeya anoononiha odhivela waye. Bibiliya onowoga egi: ‘Mmwaddamele Mulugu, oliye anere wuwaddamelani.’ (Tiya. 4:8.) Nnande aavi olibiha ebaribari ninnihuna wihina Yehova ononidhivela?

DDINIYANI ENAANIKAVIHERE ORUMEDHA WIHINA YEHOVA ONONIDHIVELA?

6. Wihina nikanne ebaribari wi Yehova ononidhivela, ddiniyani nnahowelihu omuloba Yehova nalobelaga?

⁶ Odidele olobela. (Luk. 18:1; Rom. 12:12) Omulobe Yehova wihina wiwonege ndala ninga oliye anuwooniye. Omulobe Yehova dila dhowinjhivadhene kadda labo yahoweleyaga. Ebaribari wihina kahi yokweya osaddula mubuwelo ola oli mmurimani. Mbwenye kuddiwale wihina Yehova munlubale opitha murima wawo. (1 Juwa. 3:19, 20) Oliye ohunona wupitha we wamwinnyo. Oliye onowanda wuwonana dhithu ohunandiwe woona. (1 Sam. 16:7; 2 Cró. 6:30) Bumwahaya kuhiye ‘ompigiriyela’ Yehova omwaddelaga dhithu onubuweliwe, ni omulobe wihina ukavihere orumedha odhivela waye. (Sal. 62:8) Wamala olobela, sapama ohara thalo dhimodha dhathima. Kabeni noone dhithudha nnahowelihu werana.

7-8. Anamaleba Salmo yonihile aavi wi Yehova ononidhivela?

⁷ Ororomelege ndhe anawoga Yehova. Yehova ohavethela anamaleba a Bibiliya wihina elebe makalelo oliye aliye. Kasugwa makalelo oodhivela Davidi aalebiliye wodhela makalelo Yehova ananithuwathuweliye: “Yehova onowawaddamela ale enna murima woohoseya, teto onowavulusa ale ekwerebeyile.” (Sal. 34:18, nota) Wakala owuukuweene podi wubuwelaga wihina kaavo anuthuwathuwela. Mbwenye Yehova onopaganya wukavihera mwaha oliye onowonelamo wi mudhidhi yoyo we onohowela nikavihero. Va yolebela emodha Davidi ohuleba eegi: “Mpwehe mitori dhaaga muthumbani mweenyu.” (Sal. 56:8) Yehova onowoona wi oli owukuwene ni onofwanyiwa makathamiho. Oliye onowuthuwathuwela ni onowoona opa onooniwe. Ndala ninga nthotho na manjhe nliwa nathima mwiddeddereni, Yehova anovaha thima mitori dhawo. Teto yolebela ya Salmo 139:3 enihina: “Nyu [Yehova] . . . muhunona pamadhene dila dhaaga dhaatedhene.” Yehova anowoona dhithu dhaatedhene oneriwena, mbwenye oliye anapwasedha baahi osugwa dhithu dhapama oneriwena. (Ebe. 6:10) Mwahaya ddi? Mwaha oliye anovaha thima dhithu dhaatedhene dhapama oneriwena wihina omuhagalase.a

⁸ Wodhela dholebela ndha dhotodola dhinafwanyeya mBibiliyani, enakala ninga Yehova anawoga ni iyo eegi: “Miyo ginafuna onone wihina ginowudhivela ni ginowuthuwathuwela vanlubale.” Mbwenye ninga nonilihu omabajhowene, Saddana anafuna nirumedhege wihina Yehova kananidhivela. Bumwahaya, wabajha wanganyedha wodhela odhivela wa Yehova, wikohe: ‘Ginamurumedhe aani “baabi owoota” obe “Mulugu eebaribari?”’ — Juwa. 8:44; Sal. 31:5.

9. Ddiniyani Yehova anapaganyiye aatene ale anamudhivela? (Êxodo 20:5, 6)

⁹ Openddege makalelo Yehova anakaliiye wamoonihaga odhivela. Kawubuwele madhu Yehova aawogiliye ni Moyizeji ni amwaana Izarayeli. (Mmwileri Êxodo 20:5, 6.) Yehova ahapaganya wawoniha odhivela ohunamala ale enamudhivela. Madhu ala enowooniha wi kinandeya Yehova ohadhivela ale enamudhivela. (Nee. 1:5) Bumwahaya wambela wanganyedha akala Yehova anowuudhivela, osayele mudhidhi wi wikohe: ‘Miyo ginomudhivela Yehova?’ Akala onomudhivela ni onowilibihedha werana dhithu dhinamuhagalasa oliye anopaganya wi anere wudhivela ni murima waye waatene. (Dan. 9:4; 1 Kor. 8:3) Ni madhu mamodha, akala kunanganyedha odhivela onniwena ni Yehova, ddiniyani enuthukulela wanganyedha odhivela wa Yehova? Kuwanganyedhe wi Yehova onowudhivela vanlubale, mwaha odhivela ni ororomeleya wa Yehova winlubale opitha ethu-siithu.

10-11. Yehova anafuna wihina woonege yowobola ni makalelo baani? (Gaalata 2:20)

¹⁰ Openddege wodhela yowobola. Mukutho wa Yesu, nvaho munlubale Yehova aavahiliye athu aatene. (Juwa. 3:16) Mbwenye nerege mukutho ola onowupatha? Hee! Motajhiha, kamubuwele murumiwi Pawulo. Oliye aherana dhithu dhowinjhiva dhabure. Teto naarive agaali mukiristawu, oohowela owanana ohulogomana waye. (Rom. 7:24, 25; 1 Tim. 1:12-14) Mbwenye oliye oona mukutho wa Yesu ninga nvaho Yehova anvahiliye. (Mmwileri Gaalata 2:20.) Kuddiwale wi di Yehova anvethele murumiwi Pawulo waleba madhu ala, teto dhithu dhaatedhene dhilebiwe mBibiliyani dhilebiwe wihina dhinihudhihe. (Rom. 15:4) Madhu a murumiwi Pawulo enowooniha makalelo Mulugu anafuniye wihina woonege yowobola, ninga: nvaho waye wavayeka uvahiliye. Bumwahaya woonaga yowobola nimakalelo yaala, onere wenjhedhedha ebaribari onniwena wi Yehova onowudhivela.

¹¹ Iyo nnomutamalela Yehova mwaha omuruma mwanaye Yesu wihina adhe velaboni yavati wi anikwele. Mbwenye ethu emodha emuthukulele Yesu odha velaboni yavati fuhudhiha ebaribari wodhela Mulugu. (Juwa. 18:37) Ebaribari ela enovolowela odhivela Yehova anniyena ni anaaye.

YESU ANANIKAVIHERA AAVI ORUMEDHA ODHIVELA WA YEHOVA?

12. Mwahaya bwaddi nigahowela ororomela dhithu Yesu awogiye wodhella Yehova?

¹² Yesu agaali velaboni yavati, oodhiveliwa owoga wodhela makalelo Yehova aliye. (Luk. 10:22) Dhihikalawo dhithu dhowinjhiva dhinanithukulela orumedha dhithu Yesu awogiliye wodhela Yehova. Mwaha Yesu ohukala mudhidhi wowinjhiva ni Ababe ahinathi odha velaboni yavati. (Kol. 1:15) Yesu ahinona wi ababe yomudhivela. Teto ahoona makalelo Yehova anaadhiveliye anaaye oororomeleya. Ki vano Yesu ananikavihera aavi okanna ebaribari wihina Yehova anonidhivela?

13. Yesu anafuna wi nimonege Yehova nimakalelo baani?

¹³ Yesu anonikavihera omoona Yehova ndala ninga anamooniye. Mwinvanjelyuni Yesu onomwithana Yehova “Ababa” dila dhokwaranya 160. Teto aawogaga ni anamahara aye oomwithana Yehova “Baabi aaga” ni “Baabi eenyu.” (Mat. 5:16; 6:26) Nota nohudherana nnafwanyeya va Matewuji 5:16 nnawoga neegi: “Adhaari a Yehova yaaliwo mudhidhi Yesu ahinadhe velaboni yavati yolabihedha mwithaneliwo ninga ‘Akopolo Dhaatene,’ ‘Namadhuludhulu’ ni ‘Mpaddusi Munlubale.’ Mbwenye Yesu aalabihedha madhu ookweya owi ‘Ababa.’ Ndala, oliye uhoniha wi Mulugu anafuna wi adhaari aye ekalege ootapuwene nuliye.” Teto eyo enowooniha wi Yesu anafuna wihina nimoonege Yehova ndala ninga oliye anamooniye, ninga Baabi apama anaadhivela anaaye. Kabeni noone dhotajhiha biili dhinoniha wihina Yesu owalabihedha madhu owihina “Baabi” aawogaga wodhela Yehova.

14. Yesu oonihile aavi wi kadda muthu wa iyo da thima vamentoni va Yehova? (Matewuji 10:29-31) (Osugwe fotu.)

¹⁴ Vobajha, kabeni noone madhu aasorihile Yesu enafwanyeya va Matewuji 10:29-31. (Mmwileri.) Pera balame dhing’ono dhihinadha dhimudhivelaga, newene dhimparelaga mabasa Yehova. Naarive dhigaali ndo, Baabi ehu onovaha thima balame ndho ni onowoona kadda balame enamothela vati. Vano kubuwela makalelo Yehova ananvahiye thima kadda mudhaari aye anamulabela nuudhivela! Niwogaga wodhela madhu owi “mathithi ammuruni mweenyu ehimala okontariwa,” nota nohudherana na versu 30 nnihina: “Makalelo Yehova anaathuwathuweliye anamahara a Yesu, naarive dhigaali ni dhithu dhing’ono, enowoniha wi Yehova onoompwatha kadda muthu.” Mohanganyedha, Yesu anafuna wi kadda muthu akanne ebaribari wi nili athima vamentoni va Yehova.

15. Ethu emodha nnahudherihu ni madhu asorihile Yesu wodhela Yehova ddi? (Juwawu 6:44)

¹⁵ Kasugwa yopadduwa yanabiili, Yesu aalabihedhiye madhu owi “Baabi” va Juwawu 6:44. (Mmwileri.) Di mwinnyene Yehova, uwonihile odhivela ni opama ofiyedha wusakula wihina ohudhere ebaribari. Mwahaya bwaddi adhe usakulege? Mwaha wi Baabi awo Yehova, uhoona wi ohukanna murima wapama ni dhikalelo dhapama. (Dho. 13:48) Nota noohudherana nnafwanyeya va Juwawu 6:44, nnihina podi wera Yesu aaliganihe madhu enafwanyeya livuru na Jeremiya enihina: ‘Miyo guwithana ni odhivela ohunamala, [obe, gihididela wuwoniha odhivela ohunamala]’ ni madhu eli musolo wa ohudhera wula. (Jer. 31:3; nota; teto omusugwe Oseias 11:4.) Kubuwela eyo enatapuleliwa. Baabi ehu onodidela woona dhikalelo dhawo dhapama, naarive we wamwinnyo ohandaga woona.

16. a) Ddiniyani Yesu ananihudhihiye wodhela Yehova, ki mwahaya bwaddi nigahowela ororomela dhithu Yesu anawogiye wodhela Ababe? b) Onande aavi olibiha ebaribari onniwena wihina Yehova baabi apama onahoweliwe okanna? (Osugwe kwaduru ‘Baabi, aatene iyo nnamuhowelihu.’)

¹⁶ Numuwoga Yehova ninga Baabi ehu, enakala ninga Yesu awoga eegi: “Yehova kahi Baabi aaga baahi; mbwenye di Baabi awo. Teto ginowuwaddela wihina oliye anowuudhivela ni anowuthuwathuwela.” Bumwahaya akala malabo mamodha onowanganyedha odhivela wa Yehova, wikohe: ‘Kayakale yapama waroromela madhu a Yesu, amunonne pama Baabi ehu ni anawogesa ebaribari?’ — 1 Ped. 2:22.

ODIDELE OLIBIHA EBARIBARI ONNIWENA WI YEHOVA ANOWUDHIVELA

17. Mwahaya bwaddi nigahowela olibiha ebaribari ninnihuna yowihina Yehova ononidhivela?

¹⁷ Nnohowela wilibihedha wi nlibihe ebaribari ninnihuna wihina Yehova ononidhivela. Ninga noonilihu muwari mwa ohudhera wula, Saddana mwiddani abure anafuna wi niselele omulabela Yehova. Oliye anere odidelave okwerebeyiha nroromelo ninnihuna nowihina Mulugu ononidhivela. Mbwenye kanimorele murako wa Saddana wowi Yehova kananidhivela! — Jó 27:5.

18. Onande aavi olibiha ebaribari onniwena yowihina Yehova onowudhivela?

¹⁸ Wihina nlibihe ebaribari ninnihuna wihina Yehova ononidhivela, nnohowela odidela olobela nilobaga wihina anikavihere wiwoona ninga oliye ananoniye. Ohiya eyo openddege dholebela dha mBibiliyani dhinoniha odhivela winlubale wa Yehova ni dhinoniha wi onowathuwathuwela ale enamudhivela. Kuddiwale wi muthu amudhivelaga Yehova, oliye onodidela omooniha odhivela waye. Teto kuddiwale wi yowobola nvaho wa Yehova wa kadda muthu wahiyo. Ohiya eyo, waroromelege madhu a Yesu awogiliye eegi: Yehova di Baabi awo. Werana ndo, muthu di muthu ukoha eegi: “Ohukanna ebaribari wi Yehova onowudhivela?” Onere omwaakula ohubuwele dila biili weegi: “Hee, oliye onogidhivela! Teto miyo ginowilibihedha wooniha wi ginomudhivela!”