Wehiwa wa Abaraawu

Abaraawu oomudhivela ni oomuroromela Yehova, teto ahimuhudhiha mwanaye werana emodhave. Mbwenye Izaki aganna yaka 25 Yehova omuloba Abaraawu ethu yorusa. Yaali ddi? Yehova omuloba Abaraawu egi:

‘Ginaloba odhowe mwango onithaniwa Moriya, wafiya wengo ogikuthele mukutho. Mbwenye vano kaginanfuna mwanenyama. Ginafuna ogivahe mwanawo Izaki.’

Abarawu konenlemo mwahaya bwaddi Yehova adhe amulobege mwanaye. Mbwenye woona wi aali muthu owiwelela, oliye werana ethu aalobiwiye. Vati nuusa Abarawu omuthukula mwanaye, wathukula adharaaye abiili odhowaga mburo aatonyihedhiwiye ni Yehova. Numala malabo mararu yeeddaga aliwa obajha woona mwango Moriya. Vano Abarawu othukula mbeni ni omuloba Izaki wihina athukule kwini. Izaki wakoha ababe egi: ‘Babani, ki mwanenyamaya duuvi wihina nampahe mukutho?’ Ababe waakula egi: ‘Kuthuwathuwe mwanaga, Yehova aneere onivaha.’

Nufiya vamwangoniva, aliwa wegeredha mburo wihina epwehevo kwini. Nuwindo, Abarawu omaga mada ni mweddo dha Izaki teto ompweha vadhulu va kwini.

Abaraawu othukula mbeni. Vano afunaga omulatana Izaki, omwiwa mungero amwithanaga egi: ‘Abaraawu! Kumporose mwaana oyo! Vano gihikanna ebaribari wi onomuroromela Mulugu, naarive ehili ethu yokweya, wahanle neena wihina ompahe mwanawo ninga mukutho.’ Vano Abarawu woona mwana-nimbila nigaali vanikupuni. Oliye othukula mwana-nimbila nne ompahela mukutho Yehova.

Okuma labo nenne odhowa osogolo Yehova obajha omwithana Abaraawu ninga mukwaye. Ohunona mwahaya bwaddi? Mwaha naarive ahonenlemo pama Abaraawu owiwelela dhaatedhene aalobiwiye ni Yehova.

Vano Yehova ohogolowela mpaganyo eeriliyena egi: ‘Emudhi yawo enere othabwa winjhiva. Miyo ginulabihedhe we vamodha ni emudhaawo wihina gaadhena mareeliho mwilaboni.’