Yesu Onowawigara Anamaguliha Mutempulu

Nuuvira mweridhene agabaddiziwe, Yesu odhowa oJeruzale. Athu owinjhiva yodhowa wengo wihina yajhe mathanga a Paskwa. Mudhidhi wa mathanga a Paskwa athu yodhowa otempulu wihina yavelele anenyama ninga mukutho. Athu amodha yowathukula anenyama ewa wihina yaapahe mukutho, mbwenye amodha yaagula anenyama ayo yafiya oJeruzale.

Yesu nufiya otempulu, wawoona athu yaagulihaga mambila, ng’ombe ni kangayiwa. Athu ale kiyaali otempulu wihina emwebedhe Yehova mbwenye yadhowela wawerana malondda. Ohunona ethu Yesu eeriliyena? Oliye othukula mungohi osasanya muwaxuxo ni wathamagihanamo anenyama aateene mutempulu. Nuwindo wabidhula meza aanamaguliha ni orahilela vati korowadha. Yesu owoga naalobwana yaguliha kangayiwa egi: ‘Kavenyihamoni dhithu ndha! Muselele wawerana malondda nyumba ya Ababa!’

Athu yaali mutempulu otikina vanlubale niithu Yesu eeriliyena. Anamahara a Yesu wubuwela yovuhulela enawoga wodhela Mesiya yegihina: ‘Miyo ginere oviheyana vanlubale nyumba ya Yehova.’

Nuuvira yaka tharu, Yesu odhowa otempulu ni ohogolowela wawigaramo anamaguliha aatene. Oliye afuna wihina athu aatene erihege nyumba ya Ababe.