Anamahara a Yesu Enowakela Muzimu Wotxena

Nuuvira malabo 10 Yesu agahogolowele odhulu, anamahara a Yesu wakela muzimu wotxena. Teto yaka ya 33 M.W., athu owinjhiva yahidhowa oJeruzale wihina yaajhe mathanga yithaniwa Pentekoste. Vano labo na Pentekoste nuufiya, anamahara a Yesu owakwana 120 yahitugumana nyumba dhaala. Vano morurumusa opadduwa ethu yootikiniha, nuwindo wiweya oruma wadhela odhulu.

Athu yaadhele wajha mathanga a Pentekoste wiwa onyagula wule, nuwindo aliwa odhowa wihina yoone ethu yapadduwa. Aliwa yahitikina vanlubale nuwoona wihina anamahara ale yawoga dhiwogelo dhohiyana-iyana. Vano aliwa wambela wikoha yegi: Athu ala kahiyo ooGalileya, ki enanda aavi owoga ewogelo yehu?

Vano Peduru ni anamahara amodha odhowa owoga ni athu yaali murudda yoole. Oliye owoga wihina Yesu ahikwa mbwenye Yehova ohunvenyiha muukwani, teto oliye owoga egi: ‘Vano Yesu ali odhulu ni aakaratile moono woojha wa Mulugu ni anonivaha muzimu wotxena ninga anipaganyiliye, bumwahaya mugoona dhithu ndha dhotikiniha.’

Dhithu Peduru aawogiliye dhahahagalasa athu owinjhiva ofiyedha aliwa okoha ethu baani yahoweliwa werana. Peduru wawaddela egi: ‘Muthwaruwe mwaha dhithu dhabure mwerilinyuna voharela mbaddiziwe ni ndina na Yesu Kiristu, mwerando munere wakela muzimu wotxena.’ Labo nenne athu owakwana 3000 yahibaddiziwa, okuma labo nenne anamahara a Yesu wenjhedhedheya, teto nnikavihero na muzimu wotxena, ofuguliwa mulogo dhowinjhiva. Ohiya eyo, anamahara a Yesu wahudhiha athu aatene dhithu Yesu aarumiliye wihina ehudhihe.