Athu Owinjhiva Enokala Makiristawu

Anamahara a Yesu yahiwelela nlamulo Yesu aavahiliye wihina elaleye muthenga dhapama elabo yaatene. Yaka ya 47 M.W., addibila owAntiyokiya yahimuruma Pawulo ni Barnabe wihina yalaleye. Olenddo ole Pawulo ni Barnabe yeriliwana, yahilaleya mburo dhowinjhiva dhoAziya Mung’ono, ninga oDerbe, oListra ni wIkoniyu.

Pawulo ni Barnabe yowalaleya muthenga dhapama athu aatene. Aliwa yowalaleya athu ooreela, oohawa, anakalaba ni azombwe. Teto athu owinjhiva obajha omuroromela Yesu. Vano Pawulo ni Barnabe numulaleya musadoro ooXipere ithaniwa Serjiyu Pawulo, mukwiri dhaala ahixixa wakoddiha. Mbwenye Pawulo owoga ni mukwiri ole egi: Yehova usinyuse. Mudhidhi yole mukwiri ole obajha ohoona. Vano musadoro ole nuwoona ele yapadduwile otikina vanlubale ni othoma okala mukiristawu.

Pawulo ni Barnabe yolalaleya mburo dhaatedhene, aliwa yolaleya nyumba ni nyumba, mmaferani, musinagoga, mmerkadu ni murampani. Teto nufiya luwani yoListra, yahinvulumusa mulobwana dhaala ooragala, vano athu yahonile matikiniho ale, wambela wubuwela wihina Pawulo ni Barnabe yaali amulugu ni obajha wawebedha. Mbwenye Pawulo ni Barnabe wakoddiha yegi: Kamwerena yeyo! Nihiyoya nili athu ninga nyu, mmwebedhege Mulugu baahi. Mbwenye maJudewu dhaala wambela omuwoga obure Pawulo ni Barnabe ni watujela athu yakala oListra. Bumwahaya aliwa ompwesa Pawulo ni mabwe ni omburulela ode wa luwani yubuwelaga wihina ahimala okwa. Mbwenye Pawulo kaakwile. Vano mohilegela addibila odha omukavihera ni omuhogolosela muluwani, nuuvira mwana mudhidhi Pawulo ohogolowela wAntiyokiya.

Vano yaka ya 49 M.W., Pawulo obajha olenddo waye wanabiili wemisiyonariyu. Wobajha oliye wawaredhela addibila oAziya Mung’ono, nuwindo werana olenddo woolapa ofiyedha wEuropa, oliye odhowa wAtena, oEfezu, oFilipu, oTesalonika ni luwani dhimodha. Teto Silaji, Lukaji, vamodha ni muzombwe dhaala ithaniwa Timotiyu yaali vamodha ni Pawulo mulenddoni mwaye. Aliwa wiita mulogo dhowinjhiva ni okavihera wihina mulogodha dhunnuwege. Murumiwi Pawulo ahimala yaka yantero agaali oKorintu, wihina aalibihe addibila yakala wewule. Oliye oolaleya, oohudhiha ni owaleba makarta owinjhiva wihina alibihena mulogo dhohiyana-iyana. Teto Pawulo owapara mabasa ohiyana-iyana. Nuuvira mudhidhi, murumiwi Pawulo ohogolowela wAntiyokiya.

Vano yaka ya 52 M.W., Pawulo obajha olenddo waye wanatharu wemisiyonariyu elabo yoAziya Mung’ono. Oliye odhowa oFilipu nuwindo oKorintu. Pawulo ahimala yaka dhowinjhivadhene agaali oEfezu alaleyaga muthenga dhapama, aavulumusaga athu ni akaviheraga mulogo wunnuwa. Teto malabo aamatene oliye oodhowa eskola dhaala wihina eerena mwaha dhavathaddo. Vano athu owinjhiva yavuruwana mwaha ndhe yothoma okala makiristawu. Numala olaleya muthenga dhapama mburo dhowinjhiva, Pawulo ohogolowela oJeruzale.