Yesu Onowawerana Matikiniho Owinjhiva

Yehova omuruma Yesu elabo yavati wihina alaleye wodhela Omwene wa Mulugu. Teto onvaha kopolo dhowawerana matikiniho. Matikiniho ala yoniha dhithu Yesu anafuniye wawerana abajha othonga elabo yavati. Yesu owanda wavulumusa athu yanna dhiredda dhohiyana-iyana. Bumwahaya athu yaali aredda yomusayela ni owavulumusa aatene. Yesu owavulumusa aliba ohoona, oohiwa, ooragala ni owigara muzimu dhootakala. Amodha yoovulumuwa yahidda yoowara yaye. Athu yomuhara Yesu mburo bumburo wadhowiye. Naarive afuna wihina akalevo yeeka, adha muthu oomukavihera.

Labo nimodha, alobwana dhaala omuthukulela muliba oragala vaade vafiyedhile Yesu. Mbwenye nyumba ele mwahidhala athu ofiyedha aliwa ohandaga ovolowa. Nuwindo, alobwana ale ogwela vadhulu va nyumba ele otatarulavo nuwindo aliwa onvolosihedha venvo. Voharela, Yesu owoga ni mulobwana ole egi: ‘Kavenya odhowege!’ Mulobwana ole ooragala ovenya ni okuma eeddaga, athu aatene otikina vanlubale!

Labo nimodha, Yesu odhowa murudda dhaala. Nuwindo alobwana kumi yanna oredda wa maranya odhowa ogumana nuliye. Mudhidhi yoole, muthu akanna maranya kamwaddamela muthu. Bumwahaya aliwa okala wolapelawene ni omwithana Yesu yegi: ‘Nabwiya, nikavihereni!’ Yesu wawaddela alobwana ale wihina edhowe otempulu. Egaali mudila edhowaga otempulu aliwa ovulumuwa. Mmodha waaliwa nuwoona wi ahivulumuwa ohogolowa ni odhowa omutamalela Yesu vamodha ni Mulugu. Waaliba maranya ale kumi mmodha baahi daadhowile omutamalela Yesu.

Muhiyana dhaala aamanle yaka 12 abulelaga oofuna ovulumuwa. Oliye odhowa vaari va muthithi waathu, omwaddamela Yesu ni ohidda yowara yaye. Mudhidhi yoole oliye ovulumuwa! Yesu nuwoona wihina ohukala ahiddile yowara yaye okoha akala ahikalavo muthu ahiddile yowara yaye. Muhiyana ole obajha woova, mwaha mudhidhi yoole muthu akanna oredda ninga yola kawaddamela athu. Naarive dhigaali ndo oliye owoga wihina duliye ahiddile dhowara dha Yesu. Oliye omukurumusa muhiyana ole ni owoga egi: ‘Mwanaga, odhowe ni murenddele.’

Mulobwana dhaala iithaniwa Jayiro omuloba Yesu wihina adhowe owaniwa wi anvulumuse mwanaye aali muredda. Mbwenye Yesu ahinafiye vaade va Jayiro mwaana ole omariheya. Yesu nufiya wule wawoona athu owinjhiva yunlaga. Yesu owoga egi: ‘Kamunle. Oliye anoogona.’ Vano Yesu ohiddela nlada na namwali ole ni owoga egi: ‘Namwali, kavenya!’ Mohilegela namwali ole ovenya! Nuwindo Yesu owoga ni makolo aye wihina envahe yoojha. Kubuwela makalelo makolo aye yaaliwa oohagalalene!