Yesu Onowedda Vadhulu va Manjhe

Yesu owavulumusa aredda ni owavenyiha athu muukwani. Ohiya eyo, oliye ahikanna kopolo yosugwera nipevo ni muzongwe. Nudhowa omwangoni wihina alobele, Yesu osugwa niya yoGalileya ni woona wihina nahambela nipevo ninlubale. Teto ahawona anamahara aye egaali mmwanddeyani, etxapaga ni kopolo dhewa dhaatedhene, mwaha wa nipevo nne ninlubale. Vano Yesu okita vamwangoni vale ni obajha weedda vadhulu va manjhe adhowaga waali anamahara aye. Mbwenye anamahara aye numoona muthu eeddaga vadhulu va manjhe, obajha woova vanlubale. Vano Yesu owoga naliwa egi: ‘Di miyo! Kamoove!’

Mbwenye Peduru omwakula egi: ‘Nabwiyani akala dinyu, girumeni wihina gigumane ninyu geeddaga vadhulu va manjhe!’ Yesu omwakula egihina: ‘Kadhawuno!’ Nuwindo Peduru okuma mmwanddeyani mune ni wambela weedda vadhulu vamanjhe, wula nipevo ninlubale noobaga. Mbwenye numwaddamela Yesu, Peduru obajha osugwa nipevo nne ninlubale ni wambela woova. Mwaha wa yeyo, oliye wambela oddadda! Vano Peduru okuwa egi: ‘Nabwiyani, givuluseni!’ Nuwindo Yesu omwihiddela nlada ni owoga egi: ‘Woovela ddi? Nroromelo nawo nili wuuvi?’

Vano Yesu ni Peduru nuugwela mmwanddeyani mune, nipevo nne omaala. Kubuwela makalelo yaali anamahara aye nuwoona dhithu ndhe dhapadduwile, aliwa yahifiyedha owoga yegi: ‘Mwebaribarene nyu muli Mwaana a Mulugu!’

Ela kayali dila yobajha Yesu osugwera nipevo. Nlabo dhaala Yesu ni anamahara aye yaali mmwanddeyani, vano Yesu ogonelavo. Mudhidhi Yesu agonaga wambela nipevo ninlubale, teto manjhe obajha ovolowa mmwanddeyani. Vano anamahara aye onvenyiha Yesu ekuwaga yegi: ‘Nabwiyani, nivuluseni! Nihanle nenaa nuukwa!’ Nuwindo, Yesu ovenya ni osumulula niya egi: ‘Omalewo ni okurumuwe!’ Nuwawoga madhu ale, nipevo nne omaala. Vano Yesu wakoha anamahara aye egi: ‘Nivanove kamunna nroromelo?’ Anamahara aye wambela owoga vikaleliwa yegi: ‘Nipevo nniya nnomwiwelela!’ Yopadduwa ele yahahudhiha anamahara aye wonelamo wi yamuroromela Yesu, aliwa kiyahowelege woova ethu-sithu.