Yesu Anovenyihiwa Muukwani

Yesu nuukwa, mulobwana dhaala oreela ithaniwa Juze, odhowa omuloba Pilatu wihina athukule muruthu wa Yesu waali vantxikwani na goyi. Nuwindo Juze ohela makura oonukwela muruthu wa Yesu ni opotha ni lensori nathima. Voharela okoya muruthu wa Yesu mmahame maxa ni ofugawo nnibwe ninlubale. Nuwindo anamakutha odhowa owoga ni Pilatu yegi: ‘Nnoova wihina anamahara a Yesu yakumihemo muruthu wa Yesu mmahame, yamala yambele owoga wihina oliye ohuvenyihiwa muukwani. Bumwahaya nnaloba wihina mwarume anyakoddo yasugwerege mahameya.’

Nuuvira malabo mararu, Mariya Madalena ni ahiyana amodha, odhowa omahame mambeseene. Nuufiya omahame wule, aliwa woona wihina nibwe ninlubale naafugiwena mahameya nahisusihiwawo. Vano nuuvolowa mmahame mune, aliwa omoona mungero, vano mungeroya owoga egi: ‘Kamoove, Yesu ohuvenyihiwa muukwani. Vano mudhowe mwawaddele anamahara aye wihina yagumane ni Yesu oGalileya.’

Mohilegela Mariya Madalena odhowa omusayela Peduru ni Juwawu ni wawaddela egi: ‘Ohukalawo muthu athukunle muruthu wa Yesu!’ Nuwaddeliwa muselu ole, Peduru ni Juwawu othamagela omahame. Nuufiya omahame wule, kiyafwanyilemo muruthu wa Yesu. Mwaha wa yeyo, aliwa ohogolowela vaade.

Mbwenye Mariya nuhogolowela vaade, wawoona angero abiili egakiratile mmahame mwakoyiwe Yesu. Vano Mariya owoga ni angero ale wihina kanonne wathukuleliwe muruthu wa Yesu. Voharela oliye omoona mulobwana dhaala, nuwindo Mariya wambela wubuwela wi aali muliba omurepela jardi. Mwaha wa yeyo, Mariya owoga nuliye egi: ‘Kamwerena nabwiya kagaaddeleni, muthukulenle waani muruthu wa Yesu.’ Nuwindo, mulobwana ole omwithana Mariya alabihedhaga ndina naaye. Vano Mariya woonelamo wi mulobwana ole aali Yesu. Nuwindo Mariya, omukubarela. Teto Yesu omuruma Mariya wihina awaddele anamahara aye wi oliye ohuvenyihiwa muukwani.

Labo nenne, anamahara abiili yadhowa mburo dhaala withaniwa Emawu. Vano mulobwana dhaala wambela weedda ni aliwa aakohaga dhithu dhaapadduwe. Aliwa omwakula yegi: ‘We kunonne dhipadduwile? Nzana vale, anamasogolela aanamakutha ehimpa Yesu. Mbwenye enanitikiniha sowihina ahiyana dhaala enihina Yesu ohuvenyihiwa muukwani.’ Vano mulobwana ole wakoha egi: ‘Nyu kamunaaroromela anamavuhulela? Aliwa kayawogile wi Yesu eere okwa ni eere ovenyihiwa?’ Voharela mulobwana ole wambela wawonelihamo dhovuhulela dhalebiwe mBibiliyani. Nuufiya luwani yo Emawu, aliwa odhowa ojha ni mulobwana ole, mbwenye yahinathi wambela ojha, mulobwana ole werana nlobelo. Numala olobela, anamahara ale wonelamo wi mulobwana ole aali Yesu. Nuwindo Yesu orimeela.

Voharela anamahara ale abiili, wambela othamaga wihina yawaddele anamahara amodha dhithu yoniliwa. Vano anamahara ale nuufiya oJeruzale, Yesu okumelela morurumusa mba mwaaliwa. Naarive dhigaali ndo, aliwa kiyarumedha wihina ole yamoniwa aali Yesu. Mbwenye Yesu owoga naaliwa egi: Mwasugwe mada aaga ni mugihidde. Madhu a Mulugu yawoga wihina Kiristu eere okwa ni eere ovenyihiwa.