Abarawu ni Sara Omwiwelela Mulugu

Waddamela oBabeli yahikalawo sidadi dhaala yithaniwa Uri. Athu yakala wengo kiyamwebedha Yehova, aliwa yahikanna amulugu ewa. Mbwenye sidadi modhave, ahikalawo mulobwana dhaala ithaniwa Abarawu. Oliye amwebedha Yehova baahi.

Yehova owoga ni Abarawu egi: ‘Okume vaade vawo, wahiye amudhawo odhowe mburo ginuutonyihedhimi.’ Nuwindo, Yehova ompaganya Abarawu egi: ‘Emudhi yawo enere othabwa winjhiva. Miyo ginulabihedhe we vamodha ni emudhaawo wihina gaadhena mareeliho mwilaboni.’

Abarawu kaanonne mburo wadhowiye. Naarive dhigaali ndo oliye omuroromela Yehova ni omwiwelela. Abarawu vamodha ni mwariye iithaniwa Sara, othukula dhoobo dhewa omaga olenddo. Baabe Abarawu iithaniwa Tera vamodha ni mudhule Abaraawu iithaniwa Loti wahara.

Abarawu aganna yaka 75 ofiya oKanaa vamodha naamudhaye, waali mburo Yehova afuniye wihina edhowewo. Egaali wengo Yehova werana mpaganyo mmodhaya egi: ‘Mburo ola waatene ginere wavaha anawo vamodha naadhulo.’ Mbwenye mudhidhi yoole Abarawu ni Sara yahimala wuluvala ni kiyanna mwaana. Ki vano, Yehova aakwanihedhe aavi mpaganyo waye?