Yesu Onohudhiha Makalelo Apama Oolobela

Mafarizewu yadhiveliwa werana dhithu dhapama wihina athu yawonege. Aliwa yahikanna emanya yoolobela mburo vili athu owinjhiva wihina yoniwege. Teto yowadekorari malobelo oolapa, nuwindo aliwa yodhowesa musinagoga ni murampani ni yowawerana malobelo mamodhave ni ndhu nootaama wihina athu aatene yavuruwane. Mbwenye Yesu wahudhiha anamaharaye olobela mwamakalelo apama, oliye owoga egi: ‘Kamulobelege ninga Afarizewu, aliwa enubuwela wihina Mulugu anodhiveliwa malobelo ewa oolapa. Mbwenye ebaribariya sowihina Mulugu kanadhiveliwa malobelo ewa. Mwaha wi malobelo makalelo oothapanya onakanniwena we ni Yehova baahi. Bumwahaya kamuwogege dhithu dhimodhave mwaalobelaga. Yehova anafuna wi omwaddelege dhithu dhaatedhene dhinupadduwela.’

Vasogolova Yesu wenjhedhedha egi: “Mulobelege ayi: ‘Baabihu muli odhulu, ndina nenyu ntxenihiwe. Omwene weenyu odhe. Efunelo yenyu yereye, elabo yavati, ni odhulu.’” Teto ahahudhiha anamaharaye wihina yalobelaga elobege yoojha ya kadda labo, wihina eleveleliwe dhoothega dhewa ni elobege ethu-sithu enahoweliwa.

Yesu owogave egi: Kamuselele olobela. Mudidele omuloba Yehova dhithu dhapama. Oliye di Baabihu teto abaabi aatene enofuna wavaha aniwa dhithu dhapama. Mwaana aaloba ababe pawu nerege aliwa enere onvaha nibwe? Teto akala mwaana analoba oba nerege ababe enere onvaha nowa?

‘Akala abaabi enowanda wavaha aniwa dhithu dhapama ki owoga wodhela Yehova! Oliye anofuna wuvahani muzimu wotxena. Ethu munahowelinyu werana fumuloba baahi. We onolobela ndala ninga Yesu ahudhihiliye? Walobelaga onawoga wodhela muselu baani?