Yesu ni Musamaritana

Mathanga a Paskwa nuuvira, Yesu ni anamahara aye odhowa oGalileya. Ehinafiyewo, ovira oSamariya. Vano aliwa wiimela waddamela vatxelani wihina yithuwe vang’ono, vano anamahara aye odhowa muluwani wihina yagule dhoojha.

Nuwindo, Musamaritana dhaala ofiya vatxelani vale wihina aarugwe manjhe, nuwindo Yesu omuloba manjhe. Muhiyana ole otikina ni owoga egi: ‘Miyo gili muSamaritana. Majudewu kinawoga ni aSamaritanu.’ Yesu omwaakula egi: ‘Onawoga ndo mwaha kuginonne. Wahaginone, were ogiloba manjhe nuwindo gere wuvaha manjhe enavaha egumi.’ Muhiyana ole omwaakula egi: ‘Aavi? Nabwiya nyu kamunna ethu yowarugwana manjhe.’ Yesu owoga egi: ‘Muthu yoole anang’we manjhe ginaanvahimi kadha akanna nthona.’ Muhiyana ole waakula egi: ‘Nabwiya, kagivaheni manjhe ayo.’

Vano, Yesu omuloba muhiyana ole wihina amwiithane mamune. Mbwenye oliye omwakula egi, kagiteliwe. Yesu owoga ni muhiyana ole wihina ahinona wi aahiteliwa dila tanu ni wihina akala ni mulobwana dhaala ahaali mamune. Muhiyana ole otikina vanlubale, ni woonelamo wi Yesu aali namavuhulela. Vano oliye weera: ‘Asamaritanu enorumedha wihina podi omwebedha Mulugu oSamariya wewuno, mbwenye maJudewu enubuwela wi yegi emwebedhe Mulugu enohowela odhowa oJeruzale. Gihinona wi Mesiya anere odha ni anihudhihe makalelo apama oomwebedha Mulugu.’ Nuwindo, Yesu owoga ethu ahinawogegiye ni muthu mmodha. Oliye owoga egi: ‘Miyo gili Mesiya.’

Muhiyana ole othamagela muluwani ni wawaddela aSamaritanu egi: ‘Mulobwana gathapanyimina ohunona dhaatedhene woodhela miyo. Ginoona wihina oliye di Mesiya. Kabeni mwamoone!’ Asamaritanu ale odhowa ni muhiyana ole vatxelani vale wihina yanvuruwane Yesu.

Nuwindo, aSamaritanu ale omuloba Yesu wihina akale sidadi yeele. Yesu okala wewule malabo menli aahudhihaga athu, teto owinjhiva obajha ororomela wihina oliye di Mesiya. Nuumala onvuruwana Yesu, athu a sidadi yeele owoga ni muhiyana ole yegi: ‘Vano nihinona wihina mulobwana ola duule anaavuluse athu aatene amwilaboni.’