Mungero a Yehova Ahimbarela Ezekiya

Anyakoddo owAsiriya yahigonjhiha omwene wa mahimo kumi wa amwaana Ezarayeli, teto yofuna ogujhula omwene wa mahimo menli woJuda. Senakeribi, mwene owAsiriya, wambela ogujhula kadda luwani dhooJuda. Mbwenye luwani afuniye vanlubale wi agujhule yaali yoJeruzale. Oliye kaannone ethu yafuna ompadduwela. Mwaha Yehova aanna obarela luwani yoJeruzale.

Ezekiya mwene ooJuda, onvaha korowa dhowinjhiva mwene Senakeribe wihina anaagujhule luwani yoJeruzale. Senakeribe wakela korowa ndhe. Mbwenye naarive dhigaali ndo, oliye waruma anyakoddo aye akopolo wihina yagujhule luwani yoJeruzale. Mwaha wa yeyo nlogo wambela woova vanlubale. Teto kadda labo navira anyakoddo owAsiriya yanna waddamela luwani yoJeruzale. Vano mwene Ezekiya owoga ni nlogo egi: ‘Kamoove. Ebaribari wi anyakoddo owAsiriya ehikanna kopolo, mbwenye Yehova aneere onikavihera okala akopolo wapitha aliwa.’

Vano Senakeribe waruma anamukathi aye wi edhowe oJeruzale. Nuufiya oJeruzale mwanamukathi ole wimela ode wa luwani yooJeruzale ni wambela wateya athu aatene ooJeruzale ni okuwa egi: ‘Yehova kanukavihereni. Ezekiya anowulekethani, teto kaawo mulugu anabarele luwani yenyu mmadani mwehu!’

Nuwindo Ezekiya omukoha Yehova ethu ahoweliye werana, vano Yehova omwakula egi: ‘Kuwawove madhu awonge mwaanamukathi ole. Senakeribe kanadha amugujhula Jeruzale.’ Nuuvira mwaana mudhidhi, Ezekiya wawakela makarta aalembe Senakeribe. Makartaya yawoga yegihina: ‘Mwipeleke. Mwaha Yehova kanuvuluseni.’ Nuwindo mwene Ezekiya olobela wa Yehova egi: ‘Kamwerena Yehova, nivuluseni. Mwerana ndo, athu aatene enere onona wi nyu baahi dili Nabwiya ni Mulugu eebaribari.’ Yehova omwakula Ezekiya egi: ‘Mwene owAsiriya kanaavolowe luwani yoJeruzale, mwaha miyo ginere obarela luwani ela.’

Vano anyakoddo owAsiriya odha ni orijha luwani yoJeruzale. Teto mwene Senakeribe ahikanna ebaribari wi eere ogujhula luwani yooJeruzale. Mbwenye ohunona ethu yapadduwe? Emahiyu yeele, Yehova omuruma mungero aye ni waapa anyakoddo owakwana 185 000! Senakeribe wayelela anyakoddo aye aatene akopolo, vano oliye wathukula manyazo ni ohogolowela owaniwe. Ni makalelo yaala, Yehova ahakwanihedha ele aapaganyiliye wodhela ombarela mwene Ezekiya ni luwani yooJeruzale. Ki ahakale we ogaali oJeruzale, weere omuroromela Yehova?