OHUDHERA 31
“Mukale txith ni ohuthikeya”
‘Addibilaga ginudhivelimini, mukale ooliba, ohuthikeya.’ — 1 COR. 15:58.
JHIBO 122 Nikale owikomeene!
DHITHU NNAAHUDHERIHUa
1-2. Mwahaya bwaddi mukiristawu podi oladdanihiwa ni perediyu yotaama? (1 Coríntios 15:58)
OMAGOMIHEDHO wa yaka ya 1970, obajha omagiwa perediyu yanna andare 60 oTokiyu elabo yoJapawu. Athu yasugwa perediyu ele, yotikina ni yowikoha akala perediyu ele yere wanda okalave txithi naarive wigaaliwo oddiginyeya weelabo. Ethu baani yerilena menjinyero wihina perediyuya ekaleve txithi? Menjinyero yahilabihedha dhipano wihina perediyuya ekaleve yolibene ni ehiddurumuwe naarive eddiginyeyaga wakalawo oddiginyeya wa elabo. Makiristawu podi oladdanihiwa ni perediyu ela yootama. Nimakalelo baani?
2 Mukiristawu onohowela okala txithi mudhidhi mmodhave ookweya. Onohowela okala ooliba ni ohuthikeya aabarelaga ni awiwelelaga malagano a Yehova. (Omwileri 1 Coríntios 15:58.) Oliye anakala owiwegeredhene wihina “iwelele” ni kanahiya ethu-siithu osaddula efunelo yaye. Mudhidhi mmodhave oliye anohowela okala “ookweya” dhandeyaga obe dhahoweleyaga. (Tia. 3:17) Mukiristawu anilibihedha okanna ekalelo yela kanathabwa okala ookweya newene oorusa. Ohudhera wula, nnere woona mudhidhi baani nnahowelihu okala txithi ni ohuthikeya teto nnere woona dhithu tanu analabihedha Saddana wihina akwerebeyihe efunelo yehu yohuthikeya.
NNANDE AAVI OKALA TXITHI?
3. Malamulo baani aavahile Yehova enafwanyeya va Atos 15:28, 29?
3 Yehova baahi dinna ofuru wovaha malamulo nikuru naaye teto malamulo ala bowoneleyamo. (Isa. 33:22) Motajhiha, mudhaari oororomeleya a nsaka noobajha ahisoriha dhithu tharu dhinaakavihera makiristawu okalave txithi wodhela: (1) okoodda webedha wowoota, mbwenye omwebedha Yehova baahi, (2) ovaha thima nikame, ni (3) wahara malamulo enafwanyeya mBibiliyani wodhela ohawerana mararuwo. (Omwileri Atos 15:28, 29.) Makiristawu enaamwiwelele aavi Yehova dhipaddi ndha tharu?
4. Nnande aavi onvaha Yehova webedha onanfwanelela? (Apocalipse 4:11)
4 Iyo nnokodda webedha wowoota wodhela omwebedha Yehova baahi. Oliye ahawaddela amwaana Izarayeli wihina emwebedhege mwamakalelo anafwaneleliye. (Deut. 5:6-10) Yesu nuwehiwa ni Saddana, oliye ahiwoga pamadhene wihina nnohowela omwebedha Yehova baahi. (Mat. 4:8-10) Bumwahaya, iyo kanneebedha dhikwamuthu. Newene kannawebedha athu — ninga motajhiha, anamaholela gereja, mapolitiku, aliba wiiba ethabwile ovuwa obe athu ethabwile ononiwa — ninga amulugu. Mbwenye nnokala epaddi ya Yehova nimulabelaga oliyeene baahi mwaha ‘ohupaddusa dhithu dhatedhene.’ — Omwileri Apocalipse 4:11.
5. Mwahaya bwaddi nigawiwelela malamulo a Yehova enawoga wodhela nikame ni egumi?
5 Iyo nnowawiwelela malamulo a Yehova enawoga wodhela nikame ni egumi. Mwahaya bwaddi? Mwaha Bibiliya anawoga wi nikame, egumi, oli nvaho wathima onadhela wa Yehova. (Lev. 17:14) Yehova nuwenya wihina athu yajhege anenyama, oliye waruma wihina yahijhege nikamena. (Gén. 9:4) Oliye ahihogolowela owoga nlamulo nna nuwavaha malamulo amwaana Izarayeli. (Lev. 17:10) Teto, Yehova omuholela mudhaari oororomeleya a nsaka noobajha wawonelihamo Makiristawu wihina “edidele okoodda . . . ojha nikame.” (Atos 15:28, 29) Teto nnowiwelela nlamulo nenna nathomaga osakula makalelo baani oojha murombwe nnahowelihu orumedha.b
6. Ethu baani nnahowelihu werana wihina nande wahara malagano a Yehova?
6 Iyo nnowahara malagano a Yehova enafwanyeya mBibiliyani. (Heb. 13:4) Murumiwi Pawulo ohunikongomedha, “okwiha” yaano dha mwiili wehu — winatapulela osukuma mubuwelo watene oli wabure. Iyo kannerana newene kannasugwa dhithu dhanithukulele wawerana mararuwo. (Col. 3:5; Jó 31:1) Nehiwaga wihina nerena dhithu dhabure, iyo nnosukuma mubuwelo watene wanthukulele werana dhithu dhaniyelelihe wandana wehu ni Mulugu.
7. Ethu baani nnahowelihu othoma werana, ki mwahaya bwaddi?
7 Yehova anafuna wi ‘nimwiwelelege ni murima wamutene.’ (Rom. 6:17) Malamulo aye enowoniha wi Oliye ananifunana opama ni kannahowela wasaddula malamuloya. (Isa. 48:17, 18; 1 Cor. 6:9, 10) Iyo nnowilibihedha vanlubale omuhagalasa Yehova ni okanna monelo mmodhave anna salmista alebile egi: ‘Miyo gihithoma wawiwelela malamulo enyu mudhidhi wamutene ofiyedha omakuthulo.’ (Sal. 119:112) Mbwenye, Saddana onoxixa okwerebeyiha efunelo yehu. Dhithu baani analabihedhiye?
SADDANA ANAXIXA AAVI OKWEREBEYIHA EFUNELO YEHU?
8. Nimakalelo baani Saddana analabihedhiye oharahariwa wihina anikwerebeyihe?
8 Oharahariwa. Saddana anolabihedha obure ni owaddihedhiwa wihina anikwerebeyihe. Efunelo yaye “funitakuna”, obe okwerebeyiha wandana ninnihuna ni Yehova. (1 Ped. 5:8) Makiristawu oobajha yahithusiwa, yahukuthiwa teto amodha yahifiyedha opiwa mwaha efunelo yewa yokalave oororomeleya wa Yehova. (Atos 5:27, 28, 40; 7:54-60) Ofiyedha peeno Saddana anna olabihedhave oharahariwa. Iyo nnowona eyo wodhela makalelo anamathonga oRusiya ni a dhilabo dhimodha enawoonihiwa goyi addibilihu. Elabo yaatene amwiddanihu enowaharahara addibilihu mwamakalelo oohiyana-hiyana.
9. Yopadduwa baani enanoniha wihina sapama okala pasope ni owaddihedhiwa ni makalelo nahinandihu wonelamo.
9 Owaddihedhiwa mwamakalelo nahinandihu wonelamo. Ohiya olabihedhave oharahariwa, Saddana onolabihedha “murako dhimodha” wihina anikwerebeyihe. (Efé. 6:11) Kasugwa yopadduwa ya Bob, aali ospitale wihina ooperariwe. Oliye wawaddela amediku wihina kaarumedhe nikame. Vano mediku afuna omoperari orumedha ohulabihedha nikame. Mbwenye, emahiyu dhaala mediku dhaala odhowa othapanya nuliye amudhaaye egaadhowile vade. Oliye owoga wi amediku kiyanvahe nikame, mbwenye yahoweleyaga aliwa yahikanna nikame wihina envahe. Podi wera mediku ole ubuwela wihina Bob eere weenya mwaha okalavo yekaye. Mbwenye Bob okalave txithi ni owoga wihina kaarumedhe nikame.
10. Mwahaya bwaddi mubuwelo wa elabo bowopiha? (1 Coríntios 3:19, 20)
10 Makalelo owubuwela aathu ehinamwiwelela Mulugu. Nakanna mubuwelo mmodhave ni waathu ehinawiwelela malamulo a Yehova, iyo nnere okala ninga aliwa. (Omwileri 1 Coríntios 3:19, 20.) “Mubuwelo wa elabo” malabo owinjhiva onowathukulela athu ohawiwelela malamulo a Yehova. Makiristawu amodha oPergamu ni oTiyatira yahivoloweliwa ni mubuwelo waathu yawapeele yawerana mararuwo ni yawebedha amulugu owoota. Yesu ahasumulula mwaha aliwa yowawenya mararuwo. (Apo. 2:4, 20) Peeno, nnowaddihedhiwa vanlubale wihina nikanne monelo wa elabo. Amudhihu vamodha naale eninonne podi owogaga wihina nnothabwiha dhithudha ni wihina kawo muladdu nalupa malamulo a Yehova. Motajhiha, malabo mamodha aliwa podi owoga wihina kahi ethu yabure werana ele nnafunihu teto malagano a mBibiliyani bakale.
11. Ethu baani nahinahowelihu werana?
11 Malabo mamodha iyo podi wubuwelaga wihina malamulo a Yehova kinoneleyamo. Teto iyo podi wehiwa wihina ‘nalupe malamulo’ nubuwelaga wihina kahi ethu yabure. (1 Cor. 4:6) Anamaholela gereja a mudhidhi wa Yesu yowalupa malamulo. Aliwa yowawenjhedhedha malamulo a Moyizeji ni dhilemelelo dhewa, yaathukulela athu ohanda wahara. (Mat. 23:4) Yehova ononivaha malamulo owoneleyamo wodhela Bibiliya ni alabihedhaga nikuru naye. Kannahowela wenjhedhedha dhithu mu dhoholela ananivaha Yehova. (Pro. 3:5-7) Bumwahaya, kannaalupa malammulo enafwanyeya mBibiliyani newene kannaawaddihedha addibilihu ohara monelo wehu.
12. Saddana analabihedha addi “muselu dhowoota”?
12 Muselu dhowoota. Saddana anolabihedha “muselu dhowoota” ni “dhithu dhohiyana-hiyana dhinavuwiha elabo” wihina aholosena athu. (Col. 2:8) Mudhidhi wa makiristawu oobajha eyo yovolowelavo dhohudhiha dhaathu, dhohudhiha dha maJudewu dhahiwanana ni dholebela, ni yohudhiha yawoga wihina makiristawu yohowela wiwelela Malamulo a Moyizeji. Dhohudhiha ndha dhowathukulela athu omusukuma Yehova ali ntxela na enonelo yeebaribari. Peeno Saddana anolabihedha mídia ni redes socias wihina avuwihe muselu dhowoota dhinavuwihiwa ni mapulitiku. Dhithu ninga ndha dhahipadduwa mudhidhi wa mutipa wa koronaviru.c Anamoona a Yehova yaapwasedhe ovuruwana muselu dhavuwihiwa nnikuru na Yehova yahiibarela mohiyana ni ale yarumedha muselu dhowoota. — Mat. 24:45.
13. Mwahaya bwaddi nigahowela okala pasope ni muselu dhamwilaboni?
13 Dhithu dhamwilaboni. Kannafuna ohiya ‘osogoliha dhithu dhihili dhathima.’ (Fil. 1:9, 10) Nabajha osugwera dhithu dhamwilaboni iyo podi oyelela mudhidhi wehu ni kopolo naalabihedhihu neragana dhithu dhathima. Naathabwaga othuwathuwela dhithu dha kadda labo ninga — ojha, ong’wa, waredha ni mabasa — iyo podi ohiya werana dhithu dhili dhathima mwigumini mwehu. (Luc. 21:34, 35) Ohiya eyo, malabo amatene iyo nnovuruwana muselu dhohiyana-hiyana wodhela notisiya dhinawoga wodhela gereve ni okangana wa mapolitiku. Nnohowela okala pasope wihina nahibajhe othuwathuwela muselu dhendha. Mwaha wi iyo podi obajha osakula mmurimani mwehu ni mmubuweloni mwehu wakavihera athu yala enakosa epaddi ya pulitika. Saddana onolabihedha dhithu dhendha nisorihilihu wihina akwerebeyihe efunelo yehu yowerana ele eli yapama. Vano nnere woona makalelo oogonjhiha ni ookalave txithi.
NNANDE AAVI OKALA TXITHI?
Wegi okale txithi wubuwele ethu baani yuthukulele wipeleka ni obaddiziwa, wahudherege Madhu a Mulugu ni Waapenddege olibihe murima wawo ni omuroromelege Yehova (Osugwe ddima 14-18)
14. Enaanikavihere ddi odhowagave nikalaga txithi epaddi ya Yehova?
14 Wubuwele ethu baani yuthukulele wipeleka ni obaddiziwa. Osakunle obaddiziwa mwaha were othoma okala epaddi ya Yehova. Kudduwale ethu yukavihere ohanganyedha wihina ohufwanya ebaribari. Mwaha omunona Yehova, we obajha omudhivela ni omuriha ninga Baabo oodhulu. We okanna nroromelo teto nroromelo nenna nahuthukulela othwaruwa. Odhivela wanniwena ni Mulugu ohuthukulela osukuma dhithu dhabure ni osakula werana dhithu dhinamuhagalasa Mulugu. (Sal. 32:1, 2) Wahihagalala vanlubale nunona wihina Mulugu ohuulevelela, vano we obajha woona mutugumano ni othapanya naathu amodha dhithu wahudheriwe. Ninga mukiristawu owivelela ni abaddiziwe, vano onna weedda dila yegumi, ni ohuthoma werana ndhe onandiwe wihina odhowegeve weddaga dila yela. — Mat. 7:13, 14.
15. Mwahaya bwaddi sathima wahudhera ni wapendda madhu a Mulugu?
15 Wahudherege ni wapenddege Madhu a Mulugu. Muthanko onathabwa okala wooliba wakanna musisi dhinathabwa odhowa vati. Nimakalelo mamodhave naathabwaga wahudhera Madhu a Mulugu, nroromelo nehu nnakala nooliba. Ndo iyo nnere wanda okalave txithi. Nahudheraga ni naapenddaga Madhu a Mulugu nnokanna ebaribari wihina ndhe Yehova ananilobiye sapama. (Col. 2:6, 7) Openddege makalelo dhoholela dha Yehova ni dholaga dhaye dhakaviheriwa adhaari aye akale. Motajhiha, yowoona anna Ezekiyeli oliye ahipwasedha omusugwa pamadhene mungero dhaala apimaga tempulu. Yowoona ele yahimulibiha Ezekiyeli, ni enonihudhiha makalelo oobarela ni owawiwelela malagano a Yehova wihina nimwebedhe mwamakalelo apama.d (Eze. 40:1-4; 43:10-12) Ni iyoya nnopurelamo nadhuheraga ni naapenddaga dhopadduwa dhendha ni dhithu dhoviteya dhinafwanyeya mBibiliyani.
16. Okanna murima woliba ombarele aavi Bob? (Salmo 112:7)
16 Olibihe murima wawo. Mwene Davidi ahiwoga wi kaaselele omudhivela Yehova. Ofiyedha wiiba egihina: ‘Nyu Yehova, murima waga oli wolibene.’ (Sal. 57:7) Ni iyoya podi okanna murima woliba womuroromela omuroromela Yehova. (Omwileri Salmo 112:7.) Kasugwa yopadduwa ya Bob, asorihiwe mundduli. Amediku nuwoga wi yahikanna nikame wihina envahe mudhidhi ooperariwaga, ahubuwele dila biili oliye owoga wi akala mubuwelo wewa waali wonvaha nikame oliye eere okuma ospitale wule mohilegela. Nuuvira mudhidhi, Bob onowoga egihina: “Miyo kaganganyeha wihina gere werana ele gathomilimi ni kagova ethu yagipadduwele osogolowa.”
Nakanna nroromelo nooliba nnere wanda odhowagave nikalaga ohuthikeya naarive nifwanyiwaga makathamiho bi makathamiho (Osugwe ddima 17)
17. Nnahudhera ddi ni yopadduwa ya Bob? (Osugwe fotu.)
17 Bob ahanda okala txithi mwaha erilena yothoma yaye ahinathi odhowa ospitale. Vobajha, Bob afuna wi yothoma yaye emuhagalase Yehova. Yanabili, ahimuhudhera Bibiliya nupwaseya ni malivuru ehu enawoga wodhela thima enna egumi nnikame. Yanatharu, oliye ahikanna ebaribari wihina ohara dhoholela dha Yehova yakale ethu yapama yaamukavihere. Ni iyoya podi okalave txithi naafwanyiwaga makathamiho bi makathamiho.
Baraki vamodha ni alobwana aye ewanaga nuuliba murima ni anyakoddo a Sizera (Osugwe ddima 18)
18. Yopadduwa ya Baraki enanihudhiha ddi wodhela omuroromela Yehova? (Osugwe fotu yavakapani.)
18 Omuroromele Yehova. Woone makalelo Baraki andiliye ogonjhiha koddo mwaha ororomela dhoholela dha Yehova. Mudhidhi wa Baraki amwaana Izarayeli kiyaali owiwegeredhene wihina ewane koddo newene kiyanna futhi. Mbwenye Yehova omwaddela Baraki wihina awane ni namaholela koddo aakananewu, Sizera aanna futhi dhowinjhiva. (Juí. 5:8) Namavuhulela Debora omwaddela wihina adhowe mburo wamusalasala wihina agumane ni Sizera anna karo dhowanana koddo dhowakwana 900. Waakananewu yere okala ethu yokweya owana mburo wamusalasala mwaha yahikanna karo dhowanana koddo, mbwenye naarive dhigari ndo, Baraki wiwelela. Akitelaga mwango Tabor, Yehova omurubwiha muzongwe. Vano karo dhowanana koddo dha Sizera obajha oddora mwaha wa yeyo Yehova omukavihera Baraki omugonjhiha Sizera. (Juí. 4:1-7, 10, 13-16) Nimakalelo mamodhave, namuroromela Yehova ni dhoholela ananivahiye wodhela nikuru naye oliye anere onikavihera. — Deut. 31:6.
OTHOME OKALAVE TXITHI NI OHUTHIKEYA
19. Mwahaya bwaddi ogafuna odhowagave okalaga ohuthikeya?
19 Mudhidhi nnakalegihu mwilaboni ela ya Saddana nnerege odhowave niwanaga koddo negi nikaleve txithi. (1 Tim. 6:11, 12; 2 Ped. 3:17) Othome ohuthikeya waharahariwaga, wawaddihedhiwaga mwamakalelo ohunoneliwemo vamodha ni makalelo owubuwela aathu yahinawiwelela Malamulo a Yehova, dhaavuwihiwaga muselu dhowoota ni dhithu dhamwilaboni. (Efé. 4:14) Ohiya eyo, nithome okalave txithi ohuthikeya nimudhivelaga Yehova ni niwelelaga dhoholela dhaye. Teto nnohowela okala athu ookweya. Ohudhera winaharela nnere woona makalelo Yehova ni Yesu eliwa yotajhiha yologomana yaathu ookweya.
JHIBO 129 Ginerege ovilela
a Okuma mudhidhi wa Adawu ni Eva, Saddana anna wathukulela athu wubuwela wihina kinahowela nikavihero na Mulugu yegi ethome ethu-siithu ni anowerana emodhave ni iyo. Oliye anafuna anithukulele wubuwela wihina kannahowela malamulo a Yehova obe dhoholela dhinadhela munikuruni mwaaye. Ohudhera wula, nnere woona makalelo owibarela ni muzimu onaathukulela athu wubuwelaga wihina kinahowela nikavihero na Mulugu yegi ethome ethu-siithu ni nnere woona makalelo oolibiha efunelo yehu yokala txithi nimulabelaga Yehova.
b Wihina onone dhithu dhimodha wodhela makalelo mukiristawu anahoweliye okanna monelo wa Mulugu wodhela nikame, osugwe ohudhera 39 wa livuru Ofwanye egumi yohagalasa ya malabo amatene!
c Osugwe mu jw.org muselu onihina “Wibarele wodhela muselu dhowoota.”
d Wihina onone dhithu dhimodha, osugwe kapitulu 13 ni 14 ya livuru A Adoração Pura de Jeová É Restaurada!